အောက်တိုဘာ ၃ ရက်တွင် ကမ္ဘာ့ဒေါ်လာဈေး အညွှန်းကိန်း ၉၃ ပွိုင့်အထက် ပြန်တက်ခဲ့သော်လည်း ပြည်တွင်းဈေးကွက်၌ နိုင်ငံခြားငွေလဲနှုန်း တစ်ဒေါ်လာ ၁၃၄၉ ကျပ်အထိ ကျဆင်းခဲ့ကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။
ကမ္ဘာ့ဒေါ်လာဈေး အညွှန်းကိန်းသည် ၂၀၁၄ ခုနှစ် ဒီဇင်ဘာလနောက်ပိုင်း အနိမ့်ဆုံးနှုန်းထားအဖြစ် စက်တင်ဘာ ၈ ရက်တွင် ၉၁ ဒသမ ၀၁ ပွိုင့်အထိ ကျဆင်းခဲ့သည်။ ပြီးခဲ့သည့် ဇူလိုင် ၅ ရက်တွင် ၉၆ ဒသမ ၂၀ ပွိုင့်အထိ ဖြစ်ပေါ်ခဲ့သော်လည်း ဇူလိုင် ၆ ရက်မှစတင်ကာ ၉၆ ပွိုင့်အောက်၊ ဇူလိုင် ၁၈ ရက်တွင် ၉၅ ပွိုင့်အောက်၊ ဇူလိုင် ၂၁ ရက်တွင် ၉၄ ပွိုင့်အောက်၊ သြဂုတ် ၁ ရက်တွင် ၉၃ ပွိုင့်အောက်၊ သြဂုတ် ၂၉ ရက်တွင် ၉၂ ပွိုင့်အောက် ကျဆင်းခဲ့သည်။ စက်တင်ဘာ ၂၇ ရက်တွင် ၉၃ ပွိုင့်အထက်သို့ ပြန်ရောက်ခဲ့ပြီး စက်တင်ဘာ ၃၀ ရက်တွင် ၉၃ ပွိုင့်အောက်သို့ကျကာ အောက်တိုဘာ ၃ ရက်တွင် ၉၃ ဒသမ ၇၆ ပွိုင့်အထိရောက်ခဲ့သည်။
ဒေါ်လာဈေးသည် ဇူလိုင်လကုန်ပိုင်းတွင် ၁၃၅၇ ကျပ်ဝန်းကျင်ဖြစ်ပေါ်ခဲ့ပြီး သြဂုတ်လအတွင်း အမြင့်ဆုံးဈေးနှုန်းမှာ ၁၃၅၈ ကျပ်ဖြစ်ပြီး အနိမ့်ဆုံးဈေးနှုန်းမှာ ၁၃၅၃ ကျပ်ဖြစ်ရာ ယခင်လများနှင့် နှိုင်းယှဉ်ပါက ဈေးနှုန်းကွာဟချက် နည်းပါးကာ တည်ငြိမ်လျက်ရှိသည်။ သြဂုတ် လကုန်ပိုင်းရက်တွင် ၁၃၅၅ ကျပ်ဝန်းကျင် ဖြစ်ပေါ်နေသော နိုင်ငံခြားငွေလဲနှုန်းသည် စက်တင်ဘာ ၂၇ ရက်အထိ အနိမ့်ဆုံးဈေးနှုန်းအဖြစ် စက်တင်ဘာ ၈ ရက်တွင် ၁၃၄၈ ကျပ်အထိ ကျဆင်းခဲ့ပြီး အမြင့်ဆုံးဈေးနှုန်းအဖြစ် စက်တင်ဘာ ၁၉ ရက်တွင် ၁၃၅၆ ကျပ်အထိ မြင့်တက်ခဲ့သည်။ ပြီးခဲ့သည့် စက်တင်ဘာ ၂၁ ရက်တွင် ၁၃၅၅ ကျပ်ဖြစ်ပေါ်ခဲ့သော နိုင်ငံခြားငွေလဲနှုန်းသည် စက်တင်ဘာ ၂၆ ရက်တွင် ၁၃၅၁ ကျပ်အထိကျဆင်းခဲ့ပြီး စက်တင်ဘာ ၂၇ ရက်တွင် ၁၃၅၂ ကျပ်အထိ ပြန်လည်မြင့်တက်ခဲ့သည်။ စက်တင်ဘာ ၂၉ ရက်မှ အောက်တိုဘာ ၂ ရက်အထိ ၁၃၅၁ ကျပ်ဝန်းကျင်ဖြစ်ပေါ်ခဲ့ပြီး အောက်တိုဘာ ၃ ရက်တွင် ၁၃၄၉ ကျပ်အထိ ကျဆင်းခဲ့ခြင်းဖြစ်သည်။ ဈေးကွက်အတွင်း ဒေါ်လာဈေးနှုန်း အတက်အကျ နည်းပါးသောကြောင့် မြန်မာနိုင်ငံတော်ဗဟိုဘဏ်က ၎င်း၏ ရည်ညွှန်းနိုင်ငံခြားငွေလဲနှုန်းကို အောက်တိုဘာ ၃ ရက်၌ တစ်ဒေါ်လာကျပ် ၁၃၆၀ အဖြစ် ဆက်လက်သတ်မှတ်ခဲ့သည်။
