<

ထွက်ပြေးသည့် ဘင်္ဂါလီများကို ၁၉၉၃ ခုနှစ် စာချုပ်ပါအချက်များဖြင့် အမြန်ဆုံး ပြန်လည် စိစစ် လက်ခံမည်ဖြစ်ပြီး ကုန်ကျစရိတ် ကျပ်နှစ်ဘီလျံနှင့် အထက်ရှိနိုင်

င်္ဂါလီများအား ဘင်္ဂလားဒေ့ရ်ှနိုင်ငံရှိ ဒုက္ခသည်စခန်း တစ်ခုတွင် တွေ့ရစဉ် (Photo : AFP)

ဘင်္ဂလားဒေ့ရ်ှနိုင်ငံသို့  တိမ်းရှောင်သွားသော ဘင်္ဂါလီများအား ၁၉၉၃ ခုနှစ် စာချုပ်ပါ အချက်အလက်များဖြင့် အမြန်ဆုံးပြန်လည် စိစစ် လက်ခံမည်ဖြစ်ပြီး  စိစစ်လက်ခံခြင်းအတွက် ကုန်ကျစရိတ်ကျပ် နှစ်ဘီလျံအထက် ရှိနိုင်ကြောင်း  လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာ ၀င်းမြတ်အေးက ပြောကြားသည်။

နေပြည်တော်ရှိ လူမှုဝန်ထမ်း ကယ်ဆယ်ရေးနှင့် ပြန်လည်နေရာ ချထားရေး ၀န်ကြီးဌာနတွင် စက်တင်ဘာ ၂၇ ရက် မွန်းလွဲပိုင်းကပြုလုပ်သော ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော် ဆောင်ရွက်ရေးကော်မတီ၏ တတိယအကြိမ် အစည်း အဝေး အပြီးတွင် ဦးစားပေးဆောင်ရွက်မည့် အစီအမံများနှင့် စပ်လျဉ်းပြီး ပြောကြားခဲ့ခြင်းဖြစ်သည်။

ဦးစားပေးဆောင်ရွက်မည့် လုပ်ငန်းအဖြစ် နိုင်ငံသားစိစစ်ရေး လုပ်ငန်းများကို အမြန်ဆုံး ဆောင်ရွက်မည်ဖြစ်ကြောင်း၊ ဘင်္ဂါလီများအား စိစစ်လက်ခံခြင်းကို ကုန်းလမ်းတွင် တောင်ပြို လက်ဝဲ၊ ရေလမ်းတွင် ငါးခူရတို့တွင် ဆောင်ရွက်မည်ဖြစ်ကြောင်း သိရသည်။

“လက်ခံမယ့်နေရာက တောင်ပြိုလက်ဝဲ – တပ်ကုန်းလမ်းပေါ့။ ငါးခူရက ရေလမ်းပေါ့။ အဲဒီကနေ စိစစ်မယ်။ စိစစ်ပြီး ပြန်လည်နေရာ ချထားရေးကတော့ ဒါးကြီးစား ကျေးရွာလို့ လတ်တလော လျာထားတာပေါ့။ ဒါပေမဲ့ ဒါတွေ အကုန်လုံးက လုံခြုံရေးနဲ့ ပတ်သက်ပြီးတော့ ညှိနှိုင်းဆောင်ရွက်ရမယ့် ကိစ္စတွေက အများကြီးရှိတယ်။ ဒါကတော့ အခုလျာထားတဲ့ အချက်တွေ လတ်တလော အကောင်အထည်ဖော်မယ့်ကိစ္စ” ဟု ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော် ဆောင်ရွက်ရေးကော်မတီဥက္ကဋ္ဌ၊ ပြည်ထောင် စုဝန်ကြီး ဒေါက်တာဝင်းမြတ်အေးက ပြောကြားသည်။

“၁၉၉၃ က အချက်အလက်တွေနဲ့ပဲ လက်ခံမယ်လို့ အခုတော့ အားလုံး သဘောတူထားကြတယ်။ ဒါနဲ့ပတ်သက်ပြီးတော့ အဖွဲ့တွေ ဖွဲ့ပြီးတော့ ဆောင်ရွက်မယ်။ ဆိုတော့ အဆင်ပြေအောင်ဆောင်ရွက်မှာ ဖြစ်ပါတယ်”ဟု ၎င်းက ဆက်လက် ပြောကြားသည်။

ထိုသို့ ၁၉၉၃ ခုနှစ်စာချုပ်ပါ အချက်များ ဖြင့် စိစစ်မည်ဖြစ်သည့်အတွက် တိမ်းရှောင်သွားသည့် လူဦးရေပမာဏထက် ပိုမိုဝင်ရောက်လာနိုင်မည် မဟုတ်ကြောင်းလည်း ၎င်းက ပြောကြားသည်။

၁၉၉၃ ခုနှစ်တွင် ဘင်္ဂလားဒေ့ရှ် နိုင်ငံနှင့် ချုပ်ဆိုထားသော စာချုပ်တွင် ပြန်လည်ဝင်ရောက်လာသူသည် မြန်မာနိုင်ငံတွင် နေထိုင်ခဲ့သူများ ဖြစ်ရမည်၊ ၎င်းတို့ကိုယ်တိုင် ပြန်လည် ၀င်ရောက်လိုသူများ ဖြစ်ရမည်၊ ကွဲကွာနေသော မိသားစုများ စာရင်းဝင်များအတွက် ဘင်္ဂလားဒေ့ရ်ှတွင် ဗဟိုအဆင့်ရှိသော တရားရုံးမှ ထောက်ခံချက် ပါရှိရမည်၊ တစ်ဖက်နိုင်ငံတွင် ထပ်မံမွေးဖွားသော ကလေးသည် မြန်မာ နိုင်ငံတွင် နေထိုင်ခဲ့သော မိဘနှစ်ပါးမှ မွေးဖွားသည့် ကလေးဖြစ်ရမည် စသည့်အချက်အချို့ ပါဝင်ကြောင်း သိရသည်။

ရှေးယခင်က ပြန်လည်စိစစ် လက်ခံသည့် အတွေ့အကြုံများအရ တစ်ဦးလျှင် ကျပ်တစ်သိန်းခန့် ကုန်ကျကြောင်း၊ ထို့အတွက် လက်ရှိ စိစစ် လက်ခံခြင်းအတွက် အများအပြား ကုန်ကျမည်ဖြစ်ကြောင်း ဒေါက်တာ ၀င်းမြတ်အေး က ဆက်လက်ပြောကြားသည်။

“ရှေးယခင်တုန်းကတောင် အဲဒီလောက် ကုန်တယ်ဆိုတော့ အနည်းဆုံးတော့ နှစ်ဘီလျံ အထက်မှာ ရှိပါမယ်။ ရောက်ရောက်ချင်း ကုန်ကျမယ့် ကိစ္စလေ” ဟု ၎င်းက ပြောကြားသည်။

အဆိုပါကုန်ကျစရိတ်များအား နိုင်ငံတော်ထံမှ အဓိက တောင်းခံရမည်ဖြစ်ကြောင်း သိရသည်။

ဘင်္ဂါလီများအား ပြန်လည် လက်ခံရေး နှင့် ပတ်သက်ပြီး ဘင်္ဂလားဒေ့ရ်ှနိုင်ငံနှင့် ဆွေး နွေးရန် ပြည်ထောင်စုဝန်ကြီး ဦးကျော်တင့်ဆွေ သွားရောက်မည်ဖြစ်ကြောင်း သိရသည်။

September 28, 2017














Copy Protected by Chetan's WP-Copyprotect.