မတ်ပဲအား အန္ဒိယမှ မတ်လအထိသာ ပိတ်ထားပြီး မတ်ပဲပေါ်ချိန်သည် ဖေဖော်ဝါရီလ ဖြစ်သည့်အတွက် ဈေးကွက်မှာ ပြော၍မရကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူက ပြောကြားသည်။
စက်တင်ဘာ ၂၅ ရက်က နေပြည်တော်တွင် ကျင်းပသည့် ဆဋ္ဌမအကြိမ်မြောက် ကမ္ဘာ့ကျောင်းများ နို့တိုက်ကျွေးရေးနေ့ အထိမ်းအမှတ် အခမ်းအနားအပြီး သတင်းထောက်များ၏ မေးမြန်မှုကို အထက်ပါကဲ့သို့ ပြည်ထောင်စုဝန်ကြီးက ဖြေကြားခဲ့ခြင်း ဖြစ်သည်။
“တို့ကို ပိတ်တာ မတ်လအထိပဲ ပိတ်တာ။ ပဲထွက်မှာ ဖေဖော်ဝါရီလကုန် ထွက်မှာဆိုတော့ မတ်လနောက်ပိုင်း ဖြစ်လာမယ့် Future ကို ပြောမရဘူး ဖြစ်နေတယ်။ နှစ်လလောက်ဆိုတော့ ဈေးကွက်က ပြောလို့မရဘူး။ ဈေးကွက်က ပြောလို့မရဘူး။ အဲဒီအချိန်မှာ မူလ သီးနှံပြောင်းစိုက်လိုက်လို့ ပြောင်းလိုက်တဲ့ သီးနှံကို Familiar မဖြစ်လို့ အရှုံးပေါ်မှာလည်း ကြောက်တယ်” ဟု ပြည်ထောင်စုဝန်ကြီး ဒေါက်တာအောင်သူက ပြောကြားသည်။
တောင်သူများ သီးနှံပြောင်းလဲ စိုက်ပျိုးရာတွင် ထိတွေ့မှုမရှိသည့် သီနှံပြောင်းလဲ စိုက်ပျိုးရာတွင် အလျှော့အတင်းရှိစေနိုင်ပြီး သီးနှံပြောင်းလဲ စိုက်ပျိုးရန် ဆုံးဖြတ်ထားသူများအနေဖြင့် စိုက်ပျိုးရေးဦးစီးဌာနတွင် နည်းပညာယူရန် နှိုးဆော်ထားကြောင်း သိရသည်။
စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီးက “သီနှံပြောင်း စိုက်ဖို့ရာအတွက် တို့တစ်တွေပြောတဲ့ အချိန်ကျတော့ ဘယ်လိုပြဿနာမျိုး တွေကြုံရသလဲ ဆိုတော့ ထိတွေ့မှုမရှိတဲ့ သီးနှံတစ်ခုကို ပြောင်းစိုက်ဖို့ရာအတွက် အလျှော့အတင်းလည်း ရှိစေနိုင်တယ်။ ပြီးခဲ့တဲ့ သုံးရက်လောက်က ကြေညာစာ ထုတ်လိုက်တယ်။ နိုင်ငံတကာ ဈေးကွက်ဝင်တဲ့ သီးနှံတွေက ဒါဒီလိုဈေးကွက်ဝင်တဲ့ သီးနှံကို ပြောင်းစိုက်မယ်ဆိုရင်လည်း သူတို့မှာ အခက်အခဲတွေ တွေ့ရနိုင်တယ်။ စိုက်ပျိုးရေးဦးစီးဌာန အနေနဲ့ကတော့ သီးနှံပြောင်းစိုက်မည့်သူများ၊ ဆုံးဖြတ်ပြီးတဲ့သူများ မိမိဒေသမှာ ပြောင်းလဲပြီး စိုက်ပျိုးမယ်ဆိုရင် စိုက်ပျိုးရေး ဦးစီးဌာနမှာ နည်းပညာကို ယူပါဆိုပြီးတော့ တို့ရဲ့ဝန်ကြီးဌာနက နည်းပညာတွေ အပြည့်အဝပေးဖို့ ပြောင်းလဲ စိုက်ပျိုးမယ်ဆိုရင် နည်းပညာကိုယူပြီးမှ စိုက်ပါဆိုတဲ့နှိုးဆော်ချက်ကို သတင်းစာမှာ ကြေညာချက် ထုတ်ထားပါတယ်” ဟု ဆက်လက် ပြောကြားသည်။
လက်ရှိတွင် မကြာမီ ထွက်ရှိလာမည့် ပဲစင်းငုံအား နိုင်ငံတော် တောင်သူလယ်သမား အကျိုးစီးပွားကာကွယ်ရေးအသင်းမှ ရန်ပုံငွေ တစ်ခုဖြင့် ထိန်းသိမ်းရန် ဆောင်ရွက်နေပြီး သီနှံအာမခံစနစ် ထွက်ပေါ်လာစေရန် UMFCCI နှင့် ဆွေးနွေးလျက်ရှိကြောင်း ပြည်ထောင်စုဝန်ကြီးက ဆိုသည်။
