ရန်ကုန်တိုင်းအတွင်းရှိ သက်သာဆိုင်ခန်းအားလုံး ဖယ်ရှားရန် ၁၉၅၅ ခုနှစ် အစိုးရ အိမ်ဥပစာ နှင်ထုတ်ခြင်း ဥပဒေနှင့် ဆောင်ရွက်နေပြီး ၂၀၁၈ ခုနှစ် မတ်လကုန်တွင် ဆိုင်ခန်းအားလုံး ပြောင်းရွှေ့ရမည်ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့ လူမှုရေးဝန်ကြီး ဦးနိုင်ငံလင်းက စက်တင်ဘာ ၂၀ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော် ပဉ္စမပုံမှန် အစည်းအဝေး (သတ္တမနေ့) တွင် ပြောကြားသည်။
အဆိုပါကိစ္စအား လှိုင်သာယာမြို့နယ် မဲဆန္ဒနယ်အမှတ် (၂) တိုင်းဒေသကြီးလွှတ် တော်ကိုယ်စားလှယ် ဦးမြတ်မင်းသူက လှိုင်သာယာမြို့နယ်အတွင်း အခြေခံပညာကျောင်းများရှိ ကျူးကျော်အိမ်များနှင့် ကျူးကျော်ဆိုင်ခန်းများကို ဖယ်ရှားပေးရန် အစီအစဉ် ရှိ မရှိ၊ ဖယ်ရှားရန်ရှိပါက မည်သည့်ကာလတွင် ဆောင်ရွက်ပေးမည်ကို သိရှိလိုကြောင်း ဆောင်ရွက်မပေးနိုင်ပါက မည်သည့်အတွက်ကြောင့် ဖြစ်ကြောင်း ကြယ်ပွင့်ပြမေးခွန်းနှင့် ပတ်သက်ပြီး ပြန်လည်ဖြေကြားရာတွင် ထည့်သွင်းပြောကြား ခဲ့ခြင်းဖြစ်သည်။
“ရန်ကုန်တိုင်းဒေသကြီးအတွင်း လှိုင်သာယာမြို့နယ် အတွင်းရှိ အခြေခံပညာ ကျောင်းများတွင် ကျူးကျော်အိမ် ၃၄ လုံးနှင့် သက်သာဆိုင်ခန်း ၁၈၆ ခန်း ရှိပါတယ်။ အဆိုပါ သက်သာဆိုင်ခန်းများနဲ့ ပတ်သက်ပြီး ၂၀၁၄ ခုနှစ် အောက်တိုဘာလကုန် အထိသာ ဆိုင်ခန်းလခများ ပေးသွင်းရန် စာချုပ်သက်တမ်း ကုန်ဆုံးပါက ထပ်မံစာချုပ် မချုပ်ဆိုရန်နှင့် ဆိုင်ခန်းများ အပြီးအပိုင် ဖျက်သိမ်းပေးရန် အကြောင်းကြားထားသော်လည်း သက်သာဆိုင်ခန်း ငှားရမ်းထားသူများက လိုက်နာခြင်းမရှိဘဲ ရန်ကုန်တိုင်း တစ်တိုင်းလုံး ဖယ်ရှားပေးမှသာလျှင် ဖယ်ရှားပေးမည် ဖြစ်ကြောင်း သိရပါတယ်။ အဆိုပါ သက်သာဆိုင်ခန်းများ အပါအဝင် ရန်ကုန်တိုင်းဒေသကြီးအတွင်း စာသင်ကျောင်းများရှိ သက်သာဆိုင်ခန်းအားလုံး ဖျက်သိမ်းနိုင်ရေးနဲ့ ပတ်သက်ပြီး ရန်ကုန်တိုင်းဒေသကြီး အစိုးရအဖွဲ့မှ ရန်ကုန်တိုင်းဒေသကြီး အစည်းအဝေးအ မှတ်စဉ် ၁၄/၂၀၁၇ ဆုံးဖြတ်ချက်အပိုဒ် ၄၄ အရ ကျောင်းမဖွင့်မီ ကာလအတွင်း ဖျက်သိမ်းရန် ကျန်ရှိသော အခန်းများအား ၁၉၅၅ ခုနှစ် အစိုးရအိမ်ဥပစာ နှင်ထုတ်ခြင်း ဥပဒေနှင့် ဆောင်ရွက်ပြီး ပြန်လည်တင်ပြရန် တိုင်းပညာရေးရုံးသို့ အကြောင်းကြား ထားရှိပါတယ်။ ထို့ပြင် မြို့နယ်များတွင် စာရင်းတောင်းထားပြီး ဖယ်ရှားနိုင်ရေး ဆက်လက် ဆောင်ရွက်နေပါတယ်။ တိတိကျကျ ပြောရရင်တော့ ၂၀၁၈ ခုနှစ် မတ်လကုန်မှာ ဆိုင်ခန်းအားလုံး ပြောင်းရွှေ့နိုင်ရေး ကြိုးစားဆောင်ရွက်လျက် ရှိပါတယ်။ အပြောင်းအရွေ့တွေဟာ ခက်ခဲမှုရှိပါတယ်။ တချို့ဆိုင်ခန်းများကလည်း ကျောင်းသား၊ ကျောင်းသူများ ရှိနေပါသောကြောင့် ၂၀၁၈ ခုနှစ် မတ်လကုန်မှာ ဆိုင်ခန်းအားလုံး ပြောင်းရွှေ့ရမှာ ဖြစ်ပါတယ်။ ဆိုင်ခန်းများ နေထိုင်သူများ အနေဖြင့်လည်း ယခုကတည်းက ပြောင်းရွှေ့ထားဖို့ ပြောကြားလိုပါတယ်” ဟု ဝန်ကြီးဦးနိုင်ငံလင်းက ပြောကြားသည်။
