<

ရန်ကုန်တိုင်းအတွင်းရှိ မြို့နယ် ၃၀ တွင် အမှိုက်ထုပ်ကောက် အမှိုက်သိမ်းစနစ်ကို ဆောင်ရွက်နေပြီး ခေတ်မီအမှိုက်သိမ်းစနစ် ပြောင်းလဲသွားရန် ရည်ရွယ်ထားဟု မြို့တော်ဝန် ပြောကြား

မြို့နယ်စည်ပင်နယ်နိမိတ် အတွင်းရှိ မြို့နယ်တစ်ခုတွင် နောက်ဖေးလမ်းကြား အမှိုက်များကို ရှင်းလင်းနေသည်ကို တွေ့ရစဉ် (ဓာတ်ပုံ-ကျော်ဇင်ဖြိုး)

ရန်ကုန်တိုင်းအတွင်း မြို့နယ် ၃၀ ရှိ ရပ်ကွက်ပေါင်း ၇၁ ရပ်ကွက်တွင် အမှိုက်ထုပ်ကောက် အမှိုက်သိမ်းစနစ်ကို ဆောင်ရွက်နေပြီး ခေတ်မီအမှိုက်သိမ်းစနစ် ပြောင်းလဲသွားရန် ရည်ရွယ်ထားကြောင်း ရန်ကုန်မြို့ တော်ဝန် ဦးမောင်မောင်စိုးက စက်တင်ဘာ ၂၀ ရက်တွင်ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ပဉ္စမပုံမှန် အစည်းအဝေး (သတ္တမနေ့) တွင် ပြောကြားသည်။

မရမ်းကုန်းမြို့နယ် မဲဆန္ဒနယ်အမှတ် (၁) လွှတ်တော်ကိုယ်စားလှယ် ဦးရန်ရှင်း၏ ‘ရန်ကုန်မြို့တော် စည်ပင်သာယာ နယ်နိမိတ်အတွင်းရှိ မြို့နယ်အသီးသီးတွင် အမှိုက်သိမ်းယာဉ် အရေအတွက် ထပ်မံတိုးမြှင့်ပေးရန် အစီအစဉ် ရှိ မရှိ၊ လူဦးရေ ထူထပ်များပြားသော မြို့နယ်များတွင် အမှိုက်သိမ်းစနစ်ကို တစ်နေ့နှစ်ကြိမ်ထက်မနည်း သိမ်းဆည်းဆောင်ရွက်ပေးရန် အစီအစဉ်ရှိ မရှိ သိလိုကြောင်း’ မေးခွန်းအား ပြန်လည်ဖြေကြားရာတွင် မြို့တော်ဝန်က ထည့်သွင်းပြောကြား ခဲ့ခြင်းဖြစ်သည်။

“လူနေထူထပ်ပြီးတော့ အမှိုက်စွန့်ပစ်မှုများတဲ့ မြို့နယ်၊ ရပ်ကွက်အချို့မှာ အမှိုက်ပုံးတွေ ချထားပြီးတော့ သတ်မှတ်ရက်အတိုင်း အချိန်တိကျစွာ ဆောင်ရွက်ပေးတဲ့ အမှိုက်ထုပ်ကောက် အမှိုက်သိမ်းစနစ်ကို ၂၀၁၆ ခုနှစ် ဇွန် ၁ ရက်က စပြီးတော့ အကောင်အထည် ဖော်ခဲ့တာ။ မြို့နယ် ၃၀၊ ရပ်ကွက်ပေါင်း ၇၁ ရပ်ကွက် ရှိပြီဖြစ်ပါတယ်။ အဲဒီအမှိုက်ထုပ်ကောက် အမှိုက်သိမ်းစနစ်က ဖွံ့ဖြိုးပြီးနိုင်ငံတွေမှာ ကျင့်သုံးတဲ့အတွက်ကြောင့် ခေတ်မီအမှိုက်သိမ်းစနစ်ကို ပြောင်းလဲသွားဖို့ ရည်ရွယ်ထားပါတယ်။ နောက် ကားတိုင်းမှာ အလေအလွင့် နည်းအောင် ဒီကားက ဘယ်ရောက်သွားတယ်။ ဘယ်သွားတယ်။ သွားတဲ့လမ်းကြောင်းကို ထိန်းသိမ်းထားတဲ့ အတွက်ကြောင့် ဒီကားက ဘယ်အချိန်မှာ ဘယ်သွားတယ်ဆိုတာ သိပါတယ်။ သို့သော်လည်း တချို့လူမှုကွန်ရက် စာမျက်နှာမှာ အမှိုက်မသိမ်းဘူး ဆိုတာတွေက အမှိုက်သိမ်းကားပျက်လို့ ခေတ္တပြင်ရတဲ့ အချိန်လောက်ပဲ ဖြစ်ပါတယ်” ဟု မြို့တော်ဝန် ဦးမောင်မောင်စိုးက ပြောကြားသည်။

ထို့ပြင် ရန်ကုန်မြို့အတွင်း ထွက်ရှိသည့် အမှိုက်များကို စနစ်တကျ သိမ်းဆည်းနိုင်ရေးအတွက် ဘဏ္ဍာနှစ်အလိုက် အမှိုက်သိမ်းယာဉ်များကို တိုးမြှင့်ဝယ်ယူခဲ့ကြောင်း၊ မြို့နယ်တစ်ခုချင်းအလိုက် ထွက်ရှိသည့် အမှိုက်ပမာဏပေါ် မူတည်ပြီး လိုအပ်သော ယာဉ်အမျိုးအစားကို  ဖြည့်တင်းဆောင်ရွက်နေကြောင်း၊ ယာဉ်အမျိုးအစားများ ဖြည့်တင်းဆောင်ရွက်မှုနှင့်အတူ လူအင်အား၊ စက်အင်အား၊ ပစ္စည်းအင်အားတို့ကို တစ်ပြိုင်တည်း တိုးမြှင့်ရန်လိုကြောင်း၊ အမှိုက်သိမ်း လုပ်ငန်းအတွက် ယာဉ်၊ ယန္တရား ၀ယ်ယူမှုအနေဖြင့် ၂၀၁၁-၂၀၁၂ ဘဏ္ဍာနှစ်မှ ၂၀၁၆-၂၀၁၇ ဘဏ္ဍာနှစ်အထိ အမှိုက်သိမ်းယာဉ် စုစုပေါင်း ၁၁၅ စီး ၀ယ်ယူဖြည့်ဆည်း ခဲ့ကြောင်း၊ ရန်ကုန်မြို့တော် စည်ပင်သာယာရေး နယ်နိမိတ်အတွင်းရှိ မြို့နယ် ၃၃ မြို့နယ်မှ တစ်ရက်လျှင် အမှိုက်တန်ချိန် ၂၅၀၀ ခန့် နေ့စဉ်သိမ်းဆည်း နေရကြောင်း၊ အဆိုပါနှုန်းအတိုင်းသွားမည် ဆိုပါက ၂၀၂၀-၂၀၂၁ ခုနှစ်တွင် တစ်ရက်လျှင် အမှိုက်တန်ချိန် ၃၃၀၀ ခန့် သိမ်းဆည်းရနိုင်ကြောင်း ၎င်းကဆက်လက် ပြောကြားသည်။

“လာမယ့် ဘဏ္ဍာရေးနှစ်အတွင်းမှာလည်း လိုအပ်တဲ့ အမှိုက်သိမ်းယာဉ်တွေ ဖြည့်ဆည်းနိုင်ရေး ရေးဆွဲထားပါတယ်။ ရန်ကုန်တိုင်းဒေသကြီး အစိုးရအဖွဲ့အနေနဲ့ ရန်ကုန်မြို့တော် စည်ပင်သာယာရေး ကော်မတီမှ အမှိုက်သိမ်းယာဉ်များကို ဘဏ္ဍာနှစ်အလိုက် တိုးမြှင့်ဝယ်ယူခဲ့သလို အသုံးပြုလို့ မသင့်တော့တဲ့၊ မြို့ပြအင်္ဂါရပ်နဲ့ မကိုက်ညီတဲ့ အမှိုက်သိမ်းယာဉ်များကို ၂၀၁၁-၂၀၁၂ ဘဏ္ဍာနှစ်ကနေပြီး ၂၀၁၆-၂၀၁၇ ဘဏ္ဍာ နှစ်အထိ စုစုပေါင်း အမှိုက်သိမ်းယာဉ် ၁၉၁ စီးကို ဖျက်သိမ်းခဲ့ပြီးတော့ အခုအမှိုက်သိမ်းဆည်းနေတဲ့ လုပ်ငန်းအတွက် အမှိုက်သိမ်းယာဉ် စုစုပေါင်း ၄၁၁ စီး ရှိပါတယ်။ ဘဏ္ဍာနှစ်အလိုက် ၀ယ်ယူဖြည့်ဆည်းခဲ့တဲ့ အမှိုက်သိမ်းယာဉ်တွေကို မြို့နယ်အလိုက် တိုးမြှင့်ပြီးတော့ အမှိုက်ထွက်ရှိမှု ပမာဏ နောက် မြို့နယ် အကျယ်အ၀န်း၊ ရှိနေတဲ့ လူဦးရေ၊ တိုးတက်လာတဲ့ လူဦးရေနဲ့ လူဦးရေ သိပ်သည်းဆပေါ် မူတည်ပြီးတော့ တိုးမြှင့်ချထားပြီး ဖြစ်ပါတယ်” ဟု မြို့တော်ဝန် ဦးမောင်မောင်စိုးက ပြောကြားသည်။

 

September 20, 2017














Copy Protected by Chetan's WP-Copyprotect.