စက်တင်ဘာ ဒုတိယပတ်အတွင်းက လှိုင်သာယာမြို့နယ်ရှိ ဆေးဆိုင်များကို FDA က ရှောင်တခင် စစ်ဆေးနေစဉ်
ရန်ကုန်မြို့အပါအဝင် ဒေသအချို့တွင် လိုင်စင်မရှိ ဆေးဆိုင်များ၊ တရားမဝင် မှတ်ပုံမတင် ဆေးဝါး၊ စံမညီဆေးဝါး၊ ဆေးဝါးအတု ရောင်းချသည့် ဆေးဆိုင်များကို တိုင်းဒေသကြီးအဆင့် ရှောင်တခင် စစ်ဆေးမှုများ ပြုလုပ်နေကြောင်း မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနမှ သိရသည်။
လက်ရှိ ရန်ကုန်တိုင်းဒေသကြီး အပါအဝင် မန္တလေး၊ ဧရာဝတီ၊ မကွေးတိုင်းဒေသကြီး စသည့်ဒေသများတွင် ပြုလုပ်လျက်ရှိပြီး တရားမဝင် ဆေးဝါးများ၊ ဆေးဝါးအတုနှင့် စံမမီဆေးဝါးများကို တိုက်ဖျက်သည့် Operation Pangea အစီအစဉ်ကို ဒေသအချို့တွင် ဆက်လက် လုပ်ဆောင်သွားရန်ရှိကြောင်း သိရသည်။
၂၀၁၃ ခုနှစ်မှ ၂၀၁၇ ခုနှစ် ဇွန်လအထိ အမျိုးသားဆေးဝါး ဥပဒေအရ တရားစွဲဆိုခဲ့သည့် အမှုပေါင်း ၂၆၅ မှုရှိပြီး လိုင်စင်မရှိ ဆေးဆိုင်များ၊ စပ်ဆေး၊ မှတ်ပုံတင်ထားခြင်း မရှိသော ဆေးဝါး၊ တရားမဝင် ဆေးဝါးရောင်းချသည့် ဆေးဆိုင်များလည်း ပါဝင်ကြောင်း၊ နှစ်အလိုက် အမျိုးသားဆေးဝါး ဥပဒေဖြင့် အရေးယူခဲ့သည့် အမှုများမှာ ၂၀၁၃ ခုနှစ်တွင် ၇၁ မှု၊ ၂၀၁၄ ခုနှစ်တွင် ၁၉ မှု၊ ၂၀၁၅ ခုနှစ်တွင် ၅၁ မှု၊၂၀၁၆ ခုနှစ်တွင် ၉၉ မှု၊ ၂၀၁၇ ခုနှစ် ဇွန်လအထိ ၂၅ မှု စုစုပေါင်း ၂၆၅ မှုရှိ ကြောင်းနှင့် ယင်းအမှုများအနက် ထောင်ဒဏ်ချမှတ်ခဲ့သည့် ဖြစ်စဉ်များလည်း ရှိကြောင်း သိရသည်။
“အမှုဖွင့် အရေးယူခဲ့တဲ့ ဆေးဆိုင်တွေထဲမှာ လိုင်စင်မရှိဘဲရောင်းတဲ့ ဆေးဆိုင်တွေလည်းပါတယ်။ အများဆုံးကတော့ မှတ်ပုံမတင်ဆေးဝါးတွေ ရောင်းချတဲ့ ဆေးဆိုင်တွေပါ။ နောက်တစ်ခုက စပ်ဆေးလည်း ပါပါတယ်။ ဒီနှစ်ထဲမှာ ထောင်ဒဏ်အရ ပြစ်မှုပြစ်ဒဏ် ပေးလိုက်တာတွေက တစ်မှုပါပါတယ်။ တပ်ကုန်းမှာ မိတဲ့ကိစ္စက ထိန်းချုပ်ဆေးပါ ရောင်းတဲ့အတွက်ကြောင့် ထောင်လေးနှစ် ချမှတ်လိုက်တယ်။ မူးယစ်ဆေးပါပါလို့ပါ။ ဒီနှစ်ထဲမှာ ၂၅ မှုရှိတယ်။ တချို့ကတော့ မပြီးပြတ်သေးဘူး။ စိစစ်ဆဲပဲ ရှိပါသေးတယ်” ဟု မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနမှ ညွှန်ကြားရေးမှူးချုပ် ဒေါက်တာသန်းထွဋ်က ပြောကြားသည်။
ယခုနှစ် ပထမခြောက်လအတွင်း အစားအသောက်နှင့် ဆေးဝါးကွပ်ကဲရေး ဦးစီးဌာန၊ ဆေးဝါးဌာနခွဲ အနေဖြင့် ဆေးဝါးလက်ခံစစ်ဆေးခြင်း ၁၇၇၈ ခု၊ ဆေးဝါးမှတ်ပုံတင် ထုတ်ပေးခြင်း (အသစ်၊ သက်တမ်းတိုး) ၁၁၆၂ ခု၊ ဆေးဝါးကြော်ညာ စိစစ်ခြင်း ၄၁ ခု၊ ကွင်းဆင်းစစ်ဆေးခြင်း ၄၅ ခုနှင့် အမျိုးသားဆေးဝါးဥပဒေအရ တရားစွဲဆိုခဲ့သည့် အမှုပေါင်း ၂၅ မှုထိရှိကြောင်း သိရသည်။
အမျိုးသားဆေးဝါး ဥပဒေအရ မှတ်ပုံတင်ထားခြင်းမရှိသော ဆေးဝါး၊ မှတ်ပုံတင် ခေတ္တရုတ်သိမ်းခြင်း၊ ပယ်ဖျက်ခြင်း ပြုလုပ်ထားသော ဆေးဝါး၊ ဆေးဝါးအတု၊ စံမညီဆေးဝါး၊ ပျက်စီးဆေးဝါး၊ ရောနှောဆေးဝါးများ၊ ဘေးဥပါဒ် ဖြစ်စေနိုင်သည့် ပစ္စည်းများဖြင့် ဖော်စပ်ထုတ်လုပ်ထားသော ဆေးဝါး၊ ကျန်းမာရေး ဝန်ကြီးဌာနက သုံးစွဲရန်မသင့်ဟု မိန့်ကြေညာစာ ထုတ်ပြန်၍ သတ်မှတ်ထားသော ဘေးအန္တရာယ်ရှိသည့် ဆေးဝါးများကို ထုတ်လုပ်ခြင်း၊ ပြည်တွင်းသို့ တင်သွင်းခြင်း၊ ပြည်ပသို့ တင်ပို့ခြင်း၊ သိုလှောင်ဖြန့်ဖြူးရောင်း ချခြင်းများ ပြုလုပ်ခဲ့ပါက ယင်းဥပဒေဖြင့် အရေးယူနိုင်ကြောင်း သိရသည်။
ဥပဒေပါ ပြဌာန်းချက် တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှား စီရင်ခံရပါက ငွေဒဏ်အနည်းဆုံး ကျပ် ၅၀၀၀၀ မှ အများဆုံးကျပ် ၅၀၀၀၀၀ အထိဖြစ်စေ၊ ထောင်ဒဏ် ခုနစ်နှစ်အထိဖြစ်စေ၊ ဒဏ်နှစ်ရပ်လုံးဖြစ်စေ ကျခံနိုင်ကြောင်း ဖော်ပြထားသည်။
