ဘင်္ဂါလီ မွတ်စလင်များအား ကျူးလွန်မှုများအတွက် မြန်မာနိုင်ငံကို အပြစ်ပေးမည်ဟု အယ်ကေးဒါးတို့ သတိပေး

ဘင်္ဂါလီ မွတ်စလင်များအား ကျူးလွန်မှုများအတွက် မြန်မာနိုင်ငံကို အပြစ်ပေးမည်ဟု အယ်ကေးဒါးတို့ သတိပေး
Published 14 September 2017

ဘင်္ဂါလီ မွတ်စလင်တို့ိကို “ရာဇဝတ်မှု” ကျူးလွန်ခြင်းအတွက် မြန်မာနိုင်ငံသည် “အပြစ်ပေးမှု” နှင့် ရင်ဆိုင်ရမည်ဟု အယ်ကေးဒါးတို့က သတိပေးခဲ့ကြောင်း အကြမ်းဖက်မှု စောင့်ကြည့် လေ့လာရေးအဖွဲ့ SITE က ပြောကြားခဲ့သည်။ ၂၀၀၁ ခုနှစ် စက်တင်ဘာ ၁၁ ရက်က အမေရိကန်တွင် တိုက်ခိုက်မှုများ ဆောင်ရွက်ခဲ့သည့် အစ္စလာမ္မစ်အဖွဲ့ အယ်ကေးဒါးက မြန်မာနိုင်ငံရှိ မွတ်စလင်တို့အား လက်နက်နှင့် စစ်ရေး အကူအညီများ ပံ့ပိုးပေးရန် ကမ္ဘာတစ်ဝန်းရှိ မွတ်စလင်တို့ကို တိုက်တွန်းကြောင်း ကြေညာချက် ထုတ်ပြန်ခဲ့သည်ဟု SITE က ပြောကြားခဲ့သည်။

“ကျုပ်တို့ရဲ့ မွတ်စလင်ညီနောင်တွေ ခံစားနေရသလို မြန်မာအစိုးရလည်း ခံစားရလိမ့်မယ်” ဟု အယ်ကေးဒါးတို့က ယင်းကြေညာချက်တွင် ပြောကြားခဲ့သည်။

မြန်မာနိုင်ငံတွင် ရခိုင်ပြည်နယ်၌ သြဂုတ် ၂၅ ရက်က ရဲစခန်းများနှင့် စစ်စခန်းများကို ဘင်္ဂါလီ မွတ်စလင် အကြမ်းဖက်သမားများက တိုက်ခိုက်ခဲ့ကြပြီးနောက် ရခိုင်ပြည်နယ်တွင် ပဋိပက္ခများ အရှိန်မြင့်တက်နေသည်။

အရပ်သားများနှင့် လုံခြုံရေးတပ်ဖွဲ့ဝင်များကို အကြမ်းဖက်သမားများက တိုက်ခိုက်ခဲ့ကြောင်း မြန်မာအာဏာပိုင်များက ပြောကြားထားသည်။

အာစာဘင်္ဂါလီ အစွန်းရောက် အကြမ်းဖက်သမားများက နေပြည်တော်၊ ရန်ကုန် အပါအဝင် မြို့ကြီးများ၌ အကြမ်းဖက် ဖောက်ခွဲ တိုက်ခိုက်မှုများ လုပ်ဆောင်ရန် စီစဉ်နေသဖြင့် မသင်္ကာဖွယ်ရာ လှုပ်ရှားမှု သိရှိရပါက အကြောင်းကြားရန် စက်တင်ဘာ ၅ ရက်တွင် တပ်မတော် ကာကွယ်ရေးဦးစီးချုပ်ရုံးက အသိပေးနှိုးဆော်ချက် ထုတ်ပြန်သည်။

အဆိုပါ ထုတ်ပြန်ချက်တွင် ရခိုင်ပြည်နယ် မြောက်ခြမ်း၌ အာစာဘင်္ဂါလီ အစွန်းရောက် အကြမ်းဖက်သမားများက အကြမ်းဖက်တိုက်ခိုက်မှုများ ပြုလုပ်နေချိန်နှင့် ကုလသမဂ္ဂ အထွေထွေ ညီလာခံ ကျင်းပရန်ရှိသည့် စက်တင်ဘာလအတွင်း အချိန်ကိုက်လျက် မြန်မာနိုင်ငံအတွင်းပိုင်း ဒေသများတွင် အကြမ်းဖက် ဖောက်ခွဲတိုက်ခိုက်မှုများ လုပ်ဆောင်ရန် အကြမ်းဖက်မှုများကို အားပေးထောက်ခံသည့် ပြည်ပနိုင်ငံတစ်ခု၌ စီစဉ်နေကြောင်း သိရှိရသည်ဟု ဖော်ပြထားသည်။

ထို့ပြင် အဆိုပါနိုင်ငံတို့၌ မြန်မာနိုင်ငံမှ သွားရောက် အလုပ်လုပ်နေကြသည့် အလုပ်သမားအချို့အား လွန်ခဲ့သည့် လေးလခန့်ကပင် အခြားနိုင်ငံတစ်နိုင်ငံတွင် အကြမ်းဖက် သင်တန်းများ စေလွှတ်သင်ကြားစေခဲ့ပြီး အဆိုပါအဖွဲ့များသည် ဒေသန္တရ ပစ္စည်းများနှင့် မိုင်းလုပ်နည်းများကို ကျွမ်းကျင်ကြသူများ ဖြစ်ကြောင်း သိရှိရသည်ဟု တပ်မတော် ကာကွယ်ရေးဦးစီးချုပ်ရုံး၏ ထုတ်ပြန်မှုတွင် ပါရှိသည်။

“ဘင်္ဂလားဒေ့ရှ်၊ အိန္ဒိယ၊ ပါကစ္စတန်နဲ့ ဖိလစ်ပိုင်က အားလုံးသော မူဂျာဟစ် ညီနောင်တွေအနေနဲ့ သူတို့ရဲ့ မွတ်စလင်ညီနောင်တွေကို ကူညီဖို့ မြန်မာနိုင်ငံကို သွားရောက်ကြဖို့ ကျွန်တော်တို့ တိုက်တွန်းပါတယ်။ အဲဒီအပြင် လေ့ကျင့်မှုနဲ့ ဖိနှိပ်မှုကို တွန်းလှန်ရေးဆိုင်ရာ လိုအပ်တဲ့ ပြင်ဆင်မှုတွေ ဆောင်ရွက်ကြဖို့ ကျွန်တော်တို့ တောင်းဆိုပါတယ်”ဟု အယ်ကေးဒါးအဖွဲ့က ကြေညာချက်တွင် ပြောကြားခဲ့သည်။

ဆီးရီးယားနှင့်အီရတ်တွင် နယ်မြေများ ဆုံးရှုံးနေသော ဂျီဟတ်အဖွဲ့ IS ကလည်း ဘင်္ဂါလီ မွတ်စလင်တို့အား စစ်ရေးထောက်ပံ့မှုများ ကူညီရန် မွတ်စလင်တို့အား တောင်းဆိုချက် ထုတ်ပြန်ထားသည်။ အာရေဗျကျွန်းဆွယ် အယ်ကေးဒါးအဖွဲ့ AQAP ၏ သြဇာ အကြီးဆုံး လက်ရုံးအဖွဲ့ ခေါင်းဆောင်တစ်ဦးက မြန်မာအာဏာပိုင်များကို တိုက်ခိုက်မှုများ ဆောင်ရွက်ရန် အလားတူ ကြေညာချက် ထုတ်ပြန်ခဲ့ဖူးသည်။

 

Most Read

Most Recent