ဘူးသီးတောင်မြို့နယ်ရှိ ပိတ်ထားသောကျောင်း တစ်ကျောင်းအား တွေ့ရစဉ်

ရခိုင်ပြည်နယ်ဒေသရှိ အကြမ်းဖက် အန္တရာယ် ကျရောက်နေသော ဆရာ၊ ဆရာမများအား အထူးလုံခြုံရေး ဆောင်ရွက်ပေးရန် နိုင်ငံတော်အစိုးရအား တိုက်တွန်းကြောင်း မြန်မာနိုင်ငံလုံးဆိုင်ရာ ဆရာ/ဆရာမများ အဖွဲ့ချုပ်က စက်တင်ဘာ ၁၃ ရက်တွင် ထုတ်ပြန်ခဲ့သည်။

၂၀၁၇ ခုနှစ် စက်တင်ဘာ ၁၂ ရက် နေ့စွဲဖြင့် ထုတ်ပြန်ထားသော ရခိုင်ပြည်နယ်၊ ပြည်နယ်ပညာရေးမှူးရုံး၏ ထုတ်ပြန်ကြေညာချက်တွင် မောင်တောမြို့နယ်၊ ဘူးသီးတောင်မြို့နယ်နှင့် ရသေ့တောင်မြို့နယ် အတွင်းရှိ ဆရာ၊ ဆရာမများ အနေဖြင့် စက်တင်ဘာ ၁၇ ရက် နောက်ဆုံးထားပြီး မိမိတို့ တာဝန်ကျရာ နယ်မြေများသို့ ပြန်လည် တာဝန်ထမ်းဆောင်ရမည်။ မထမ်းဆောင်ပါက ဝန်ထမ်းစည်းကမ်းဖြင့် အရေးယူမည် ဖြစ်ကြောင်း၊ အတင်းအကျပ် သဘောထား ထုတ်ပြန်ကြေညာ ထားသည်ကို ဝမ်းနည်းဖွယ် တွေ့ရှိရကြောင်း မြန်မာနိုင်ငံလုံးဆိုင်ရာ ဆရာ/ဆရာမများ အဖွဲ့ချုပ်၏ ထုတ်ပြန်ချက်တွင် ပါရှိကြောင်း သိရသည်။

နိုင်ငံဖွံ့ဖြိုး တိုးတက်ရေး၊ အေးချမ်းသာယာရေးအတွက် ပညာရေးကို အားစိုက်လုပ်ဆောင်ရမည်မှာ အမှန်ဖြစ်သည်။ သို့သော်ယခုကဲ့သို့သော အခြေအနေတွင် နိုင်ငံဝန် ထမ်းဆောင်ကြရမည့် ဆရာ၊ ဆရာမများ အတွက် အကြမ်းဖက်မှုအန္တရာယ် စိုးရိမ်နေဆဲဖြစ်သော ဒေသများသို့ ဆရာ၊ ဆရာမများကို အတင်းအကျပ် ပြန်လည်စေလွှတ်ခြင်း မပြုရန်၊ အခြေအနေ တည်ငြိမ်ကြောင်း အာမခံနိုင်မှသာ စေလွှတ်ပေးရန်နှင့် ထိုသို့စေလွှတ်ရာတွင်လည်း ဆရာ၊ ဆရာမများ၏ လုံခြုံရေးကို အပြည့်အ၀ အာမခံပေးရန် အပါအဝင်၊ အကြမ်းဖက် အန္တရာယ်ကြောင့် ဆရာ၊ ဆရာမများအပေါ် ဘေးအန္တရာယ် တစ်စုံတစ်ရာ ကျရောက်လာပါက အခြေအနေ မတည်ငြိမ်သေးမီ အတင်းအကျပ် စေလွှတ်သော တာဝန်ရှိသူ အနေဖြင့် အပြည့်အ၀ တာဝန်ယူပေးရန်၊ အကြမ်းဖက်ခံရမှုကြောင့် ဆရာ၊ ဆရာများ၏ ဆုံးရှုံးမှုများအတွက် နိုင်ငံတော်နှင့် ပညာရေး ဝန်ကြီးဌာန အနေဖြင့် ပြန်လည်ဖြည့်ဆည်း ဆောင်ရွက်ပေးရန်နှင့် အကြမ်းဖက်မှုကို ကိုယ်တွေ့ တွေ့ကြုံခဲ့ရသော ဆရာ၊ ဆရာမ အချို့သည် စိတ်ဒဏ်ရာများ ရရှိခဲ့မည်ဖြစ်သောကြောင့် အကယ်၍ ကာယကံရှင်က မသွားလိုပါက အတင်းအကျပ် စေလွှတ်ခြင်းမပြုဘဲ ကာယကံရှင်၏ ဆန္ဒနှင့်အညီ ညှိနှိုင်းဆောင်ရွက်ပေးရန်တို့ တောင်းဆိုထားကြောင်း ထုတ်ပြန်ချက်အရ သိရသည်။

မကြာခင်က ဖြစ်ပွားခဲ့သော ရခိုင်ပြည်နယ် ဘူးသီးတောင် မောင်တောဒေသ  ARSA အဖွဲ့၏အကြမ်းဖက်မှု ဖြစ်စဉ်များတွင် အရပ်သား၊ အခြားပြည်သူ့ ဝန်ထမ်းများနည်းတူ ဆရာ၊ ဆရာမများသည်လည်း အကြမ်းဖက် ဘေးသင့်နယ်မြေများတွင် တာဝန်ထမ်းဆောင်ရင်း ပိတ်မိခဲ့ကြကြောင်း သိရသည်။

အချို့ အစိုးရဝန်ထမ်းများ၊ လူမှုအဖွဲ့အစည်းများ၏ အကူအညီကြောင့် ထွက်ပြေးလွတ်မြောက်ခဲ့ကြပြီး ယခုအချိန်အထိ နယ်မြေတည်ငြိမ်ရန် လုံခြုံရေးဝန်ထမ်းများ အစွမ်းကုန် ကြိုးစားနေရဆဲဖြစ်ကြောင်း သတင်းများက ဖော်ပြလျက်ရှိကြောင်း ထုတ်ပြန်ချက်တွင် ပါရှိသည်။