ပြည်တွင်း/ပြည်ပထုတ် အချိုရည်များအား FDA က စစ်ဆေးနေပြီး ကျန်းမာရေးနှင့် မညီညွတ်သော အချိုရည်များကို ထောက်ခံချက် ရုပ်သိမ်းခြင်း၊ ထုတ်လုပ်ရောင်းချခွင့် ရပ်ဆိုင်းခြင်းများ လုပ်ဆောင်မည်

ပြည်တွင်း/ပြည်ပထုတ် အချိုရည်များအား FDA က စစ်ဆေးနေပြီး ကျန်းမာရေးနှင့် မညီညွတ်သော အချိုရည်များကို ထောက်ခံချက် ရုပ်သိမ်းခြင်း၊ ထုတ်လုပ်ရောင်းချခွင့် ရပ်ဆိုင်းခြင်းများ လုပ်ဆောင်မည်
Published 11 September 2017

စူပါမားကက်များတွင် ရောင်းချနေသည့် အချိုရည်များအား တွေ့ရစဉ်

ပြည်တွင်း/ပြည်ပထုတ် အချိုရည်များအား မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနက စစ်ဆေးနေပြီး တွေ့ရှိချက် ရလဒ်များအပေါ် မူတည်၍ ကျန်းမာရေးနှင့် မညီညွတ်သော ပြည်တွင်းထုတ် အချိုရည်များကို ထုတ်လုပ်ရောင်းချခွင့် ရပ်ဆိုင်းခြင်း၊ လုပ်ငန်းရပ်ဆိုင်းခြင်း၊ ပြည်ပထုတ်အချိုရည်များကို ထောက်ခံချက် ရုပ်သိမ်းခြင်းများ လုပ်ဆောင်သွားမည်ဖြစ်ကြောင်း သိရသည်။

ယခုကဲ့သို့ စစ်ဆေးခြင်းမှာ ပုံမှန်ဈေးကွက် ထောက်လှမ်းခြင်းမျိုးမဟုတ်ဘဲ အထူးစီမံချက်ချ ဆောင်ရွက်ခြင်း ဖြစ်ကြောင်း၊ ထို့အတွက် FDA ထောက်ခံချက်ရှိသည် ဖြစ်စေ၊ မရှိသည်ဖြစ်စေ ဈေးကွက်အတွင်းရှိ ပြည်တွင်းထုတ်နှင့် ပြည်ပထုတ်အချိုရည် အားလုံးကို စစ်ဆေးခြင်းဖြစ်ကြောင်း သိရသည်။

သြဂုတ်၂၂ရက်က နေပြည်တော်ကုန်တိုက်များ၊ နေပြည်တော် သပြေကုန်းဈေး၊ နေပြည်တော် မြို့မဈေးများအပြင် နေပြည်တော်ရှစ်မြို့ နယ်ရှိ ဈေးများသို့ သွားရောက်စစ် ဆေးမှုများ ပြုလုပ်ထားကြောင်း၊  ပြည် တွင်းရှိ တပိုင်တနိုင်လုပ်ငန်းငယ် များမှထုတ်လုပ်သောထုပ်ပိုးမှုသပ် ရပ်ခြင်းမရှိ၊အမှတ်တံဆိပ်ကပ်ထား ခြင်းမရှိသောအချိုရည်များကိုလည်း စစ်ဆေးနေပြီး လိုအပ်ပါက ပိုးမွှားစစ်ဆေးမှုများပါ ပြုလုပ်သွားမည် ဖြစ်ကြောင်း သိရသည်။

ထိုသို့စစ်ဆေးရာတွင် FDA သို့ ပေးပို့ထားသော နမူနာပစ္စည်းနှင့် ဈေးကွက်တွင်းရှိ ရောင်းချပစ္စည်း ကွဲလွဲနေခြင်း၊ သတ်မှတ်စည်းကမ်းနှင့်အညီ ထုတ်လုပ်ထားခြင်း မရှိသည့် အချိုရည်များ တွေ့ရှိပါကလည်း ဥပဒေအရ အရေးယူသွားမည် ဖြစ်ကြောင်း သိရသည်။

ပြီးခဲ့သည့် ဖေဖော်ဝါရီလအတွင်းက ဈေးကွက်အတွင်း ရောင်းချနေသည့် အချိုရည် ၁၁ မျိုးမှာ အဏုဇီ၀ သတ်မှတ်ချက်နှင့် ကိုက်ညီမှု မရှိခြင်းနှင့် ခွင့်မပြုဆိုးဆေးများ ပါဝင်သည့်အတွက် စားသုံးရန် မသင့်ကြောင်း မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနက ထုတ်ပြန်ကြေညာခဲ့သည်။

စားသုံးရန် မသင့်ကြောင်း ကြေညာခဲ့သည့် အချိုရည်များမှာ Jelly စာသားပါ အချိုရည်(ခရမ်းရောင်)၊ အချိုရည် (ပန်းရောင်)၊ အချိုရည် (အနီရောင်)၊ အမှတ်တံဆိပ်မပါ အချိုရည် (လိမ္မော်ရောင်)၊ Cola အချိုရည် (အနီရောင်)၊ အမှတ်တံဆိပ်မပါ အချိုရည် (ပန်းရောင်)၊ အမှတ်တံဆိပ်မပါ အချိုရည် (အစိမ်းရောင်)၊ အမှတ်တံဆိပ်မပါ ဝေဖာလုံး၊ Fruit Drink Juice အချိုရည် (လိမ္မော်ရောင်)၊ Pineapple Juice အချိုရည် (ခရမ်းရောင်)၊ အမှတ်တံဆိပ်မပါ အချိုရည် (လိမ္မော်ရောင်) တို့ဖြစ်ကြောင်းနှင့် ယင်းအချိုရည်များတွင် ခွင့်မပြုဆိုးဆေး Rhodamine B နှင့် Orange II တို့ပါဝင်ကြောင်း သိရသည်။

အစားအသောက်နှင့် ဆေးဝါးကွပ်ကဲရေး ဦးစီးဌာနသည် အမျိုးသားဆေးဝါးဥပဒေနှင့် အမျိုးသား အစားအသောက် ဥပဒေပါ ပြဋ္ဌာန်းချက်များနှင့်အညီ နိုင်ငံတွင်း ထုတ်လုပ်တင်သွင်း ရောင်းချလျက်ရှိသော အစားအသောက်နှင့် ဆေးဝါးများ ဘေးအန္တရာယ်ကင်းစင်မှု၊ အရည်အသွေးပြည့်မီမှု၊ စစ်မှန်မှုများနှင့် ပတ်သက်သည့် လုပ်ငန်းများကို ဆောင်ရွက်နေ ကြောင်းနှင့်၂၀၁၇ ခုနှစ် မတ်လအထိ အစားအသောက်သွင်းကုန် ထောက်ခံချက် ၂၃၉၇ ခု၊ တင်သွင်းထောက်ခံချက် ၃၃၇၈ ခု၊ စုစုပေါင်း ၅၇၇၅ ခု၊ အစားအသောက်ပို့ကုန် ထောက်ခံချက်၂၃ ခု၊ တင်ပို့ခြင်း ထောက်ခံချက် ခြောက်ခု၊ စုစုပေါင်း ၂၉ ခုကို ထုတ်ပေးခဲ့ကြောင်း သိရသည်။

 

Most Read

Most Recent