မြိတ်မြို့တွင် သက်ငယ်မုဒိမ်းမှု ပပျောက်ရေးအတွက် လူထုလှုပ်ရှားမှုအသွင် ဆန္ဒထုတ်ဖော်

မြိတ်မြို့တွင် သက်ငယ်မုဒိမ်းမှု ပပျောက်ရေး လူထုလှုပ်ရှားမှုကို ဇူလိုင် ၁၆ ရက်က ပြုလုပ်စဉ်

မြိတ်မြို့တွင် သက်ငယ်မုဒိမ်းမှု ပပျောက်ရေးအတွက် လူထုလှုပ်ရှားမှုအသွင် ဆန္ဒထုတ်ဖော်မှု ပြုလုပ်ခဲ့ကြောင်း သိရသည်။

ဒေသခံများ၊ အရပ်ဘက်အဖွဲ့အစည်းများ၊ ကျောင်းသူ ကျောင်းသားများ ပူးပေါင်းပါဝင်သည့် ဆန္ဒထုတ်ဖော်မှုကို ဇူလိုင် ၁၆ ရက် နံနက်ပိုင်းက ပြုလုပ်ခဲ့သည့် နေရာ နှစ်နေရာခွဲပြီး လမ်းလျှောက်ဆန္ဒထုတ်ဖော်ခဲ့ကြောင်း သိရသည်။ မြိတ်မြို့ မြိတ်တောင်နယ် မြေအုပ်ချုပ်ရေးမှူးရုံးရှေ့မှစတင်ပြီး အရှေ့သိမ်ဘောလုံးကွင်းသို့တစ်ဖွဲ့၊ ကလွင်ကျေးရွာအုပ်စု ၊ ဂေါက်ကလပ်ရှေ့မှ အရှေ့သိမ်ဘော လုံးကွင်းသို့တစ်ဖွဲ့ အသီးသီးချီတက်ခဲ့ပြီး သက်ငယ်မုဒိမ်းမှု ပပျောက်ရေးအတွက် ဆန္ဒထုတ်ဖော်ခဲ့ကြကြောင်း သိရသည်။

“ဆန္ဒထုတ်ဖော်ရတဲ့ ရည်ရွယ်ချက်က သက်ငယ်မုဒိမ်းမှုဟာ မြိတ်မြို့မှာ အတော်များများ ဖြစ်နေတဲ့အတွက် လူထုအကြားမှာ သက်ငယ်မုဒိမ်းမှုနဲ့ပတ်သက်ပြီး သိရှိစေချင်တာရယ် ဌာနဆိုင်ရာတွေအနေနဲ့ သက်ငယ်မုဒိမ်းမှုကို ထိရောက်စွာ အပြစ်ပေးစေချင်တဲ့  ရည်ရွယ်ချက်နဲ့ လုပ်ဆောင်ရတာပါ။ သက်ငယ်မုဒိမ်းမှုက လက်ရှိ ၃၇၆ ပုဒ်မတစ်ခုတည်း လုပ်ထားပါတယ်။ ပြစ်မှုကျူးလွန်မှု အားနည်းရင် ထောင်ဒဏ် ငါးနှစ်လောက်နဲ့ ပြီးသွားတယ်။ ဒါပေမဲ့ ဒီလိုပြစ်မှုကျူးလွန်ရင်အနည်းဆုံး ထောင်ဒဏ် အနှစ် ၂၀၊ တစ်သက်တစ်ကျွန်း ချမှတ်စေချင်ပါတယ် ဥပဒေပိုင်းဆိုင်ရာနှင့် ထိထိရောက်ရောက် အရေးယူပေးစေချင်ပါတယ်” ဟု ဆန္ဒထုတ်ဖော်ပွဲကိုဦးဆောင်ခဲ့သူ ဒေါ်ရှင်ဌေးက ပြောကြားသည်။

ဆန္ဒထုတ်ဖော်ပွဲသို့ အင်အား ၄၀၀ ကျော် တက်ရောက်ခဲ့ပြီး သက်ငယ်မုဒိမ်းမှုပပျောက်ရေး၊ ကလေးသူငယ်များအား ကာကွယ်စောင့်ရှောက်ရေး၊ သက်ငယ်မုဒိမ်းမှုအား ကြီးလေးစွာ အပြစ်ပေးရေး၊ ကလေးသူငယ်များ၏ မသိနားမလည်မှုသည် အနိုင်ကျင့်ရန်မဟုတ်ပါ၊ သက်ငယ်မုဒိမ်းမှုချက်ချင်းသတ်၊ ချက်ချင်းရပ်စသည့် ကြွေးကြော်သံများဖြင့် ဆန္ဒထုတ်ဖော်ခဲ့ကြကြောင်း သိရသည်။ အရှေ့သိမ်ဘောလုံးကွင်းတွင် စုရပ်အဖြစ်ထားရှိပြီး သက်ငယ်မုဒိမ်းမှု ပပျောက်ရေး အသိပညာပေး ဆွေးနွေးမှုများ ပြုလုပ်နေသူ ဒေါက်တာဖြိုးသီဟနှင့် ရှေ့နေများကွန်ရက်မှ ရှေ့နေဦးလွင်အောင်တို့က ပညာပေးဟောပြောမှုများ ပြုလုပ်ခဲ့ကြောင်း သိရသည်။

“သက်ငယ်မုဒိမ်း ပပျောက်ရေးအတွက် ပါဝင်ဆောင်ရွက်တာပါ။ ဥပဒေအရ ပြစ်ဒဏ်က သေဒဏ်အထိ ပေးစေချင်ပါတယ်။ ဒါတွေက မဖြစ်သင့်ပါဘူး။ လူကြီးနဲ့ကလေးဆိုတော့ မဖြစ်သင့်ပါဘူး” ဟု ဆန္ဒထုတ်ဖော်ပွဲသို့ တက်ရောက်လာသူ မအေးသွယ်က ဆိုသည်။

မြိတ်မြို့တွင် ကလေးသူငယ်ကာကွယ် စောင့်ရှောက်ရေးနှင့် သက်ငယ်မုဒိမ်းမှု ပပျောက်ရေးအတွက် ပညာပေးဟောပြောပွဲများ ပြုလုပ်နေသည့်အပြင် ဆန္ဒထုတ်ဖော်ပွဲကို ဒေသခံများ၏ ဆန္ဒနှင့်အညီ ခွင့်ပြုချက်တင်ကာ လူထုလှုပ်ရှားမှုအသွင်ဖြင့် ဆောင်ရွက်ခဲ့ခြင်းဖြစ်ကြောင်း သိရသည်။

Writer: 
ဇော်မိုးဦး (မြိတ်)