အွန်လိုင်းလောင်းကစားခြင်းအား စစ်ဆေးရန် တရုတ်နိုင်ငံမှ ပိတ်ထားသည့် ဘဏ်အကောင့် ၃၄၉ အနက် မြန်မာနိုင်ငံသားပိုင် ဘဏ်အကောင့် ၁၃၂ ခု ပါဝင်နေပြီး အမြန်ဆုံး ပြန်လည်ဖွင့်လှစ်နိုင်ရန် ဆောင်ရွက်သွားမည်ဟုဆို

ဇွန် ၁၈ ရက်က တရုတ်နိုင်ငံ ရွှေလီမြို့ ဒုတိယမြို့တော်ဝန်နှင့် မြန်မာနိုင်ငံမှ ဘဏ်ငွေစာရင်း အပိတ်ခံရသူများ ဆွေးနွေးစဉ် (ဓာတ်ပုံ - မြန်မာနိုင်ငံဆိုင်ရာ တရုတ်သံရုံး)

အွန်လိုင်းလောင်းကစားမှုကို စစ်ဆေးရန် တရုတ်နိုင်ငံမှ ပိတ်ထားသည့် ဘဏ်အကောင့် ၃၄၉ ခုအနက် မြန်မာနိုင်ငံသားပိုင် ဘဏ်အကောင့် ၁၃၂ ခု ပါဝင်နေပြီး အမှုနှင့်မသက်ဆိုင်သော ဘဏ်အကောင့်များ အမြန်ဆုံးပြန်လည် ဖွင့်လှစ်နိုင်ရန် ဆောင်ရွက်မည်ဟု ရွှေလီမြို့ ပြည်သူ့အစိုးရ ဒုတိယမြို့တော်ဝန်က ပြောကြားခဲ့ကြောင်း မြန်မာ့အသံနှင့် ရုပ်မြင်သံကြား သတင်းဖော်ပြချက်အရ သိရသည်။

ဇွန် ၁၅ ရက်မှစပြီး မြန်မာနိုင်ငံသား ပို့ကုန်-သွင်းကုန် ကုန်သည်လုပ်ငန်းရှင်များ၏ ဘဏ်စာရင်းများအား တရုတ်နိုင်ငံဘက်မှ ယာယီပိတ်သိမ်းခဲ့ကြောင်း၊ ဘဏ်စာရင်းများ ပိတ်သိမ်းခဲ့မှုနှင့်ပတ်သက်ပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးဆောင်သည့် ကိုယ်စားလှယ်အဖွဲ့သည် တရုတ်နိုင်ငံခရီးစဉ်တွင် သိလျှင်သိချင်း တရုတ်ပြည်သူ့သမ္မတနိုင်ငံ စီးပွားရေးကောင်စစ်ဝန်နှင့် စတင်ညှိနှိုင်းခဲ့ပြီး ၂၀၁၇ ခုနှစ် ဇွန် ၁၆ ရက်တွင် ဘဏ်စားရင်းများ ထပ်မံပိတ်သိမ်းခဲ့မှု သတင်းများအပေါ် မြန်မာနိုင်ငံဆိုင်ရာ တရုတ်ပြည်သူ့သမ္မတ နိုင်ငံသံရုံးသို့ တယ်လီဖုန်းဖြင့်ဆက်သွယ်ပြီး ဖြေရှင်းဆောင်ရွက်ပေးရန် ညှိနှိုင်းခဲ့ကြောင်း သိရသည်။

ထို့ပြင် မြန်မာကုန်သည်များ၏ ငွေစာရင်း၊ အကောင့်များ ပိတ်သိမ်းခဲ့မှုအား မည်သည့်အတွက်ကြောင့် ပြုလုပ်ခြင်းဖြစ်သည်ကို ပိတ်ထားသည့် မြန်မာနိုင်ငံသားလုပ်ငန်းရှင်များ၏ ငွေစာရင်းများကို အမြန်ဆုံးပြန်လည် ဖွင့်လှစ်ပေးရန် ရွှေလီမြို့ ပါတီကော်မတီအတွင်းရေးမှူးနှင့် ရွှေလီမြို့ အစိုးရဌာနတာ ၀န်ခံတို့ထံ ညှိနှိုင်းအကြောင်းကြားထားခဲ့ပြီး ကုန်သွယ်မှုလုပ်ငန်းများကို ပုံမှန်ဆက်လက် ဆောင်ရွက်ပေးနိုင်ရေးအတွက် ဖြေရှင်း ကူညီပေးရေးအတွက် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးသို့ ညှိနှိုင်းအကြောင်းကြားခဲ့ကြောင်း သိရသည်။

ဆက်လက်ပြီး ၂၀၁၇ ခုနှစ် ဇွန် ၁၇ ရက်တွင် မူဆယ် ၁၀၅ မိုင်ကုန်သွယ်ရေးဇုန်ရှိ ပဲ၊ ပြောင်း၊ နှမ်းအသင်းမှ ဘဏ်အကောင့်များ ပိတ်ထားခြင်းနှင့် ပတ်သက်သည့် ဆွေးနွေးပွဲသို့ လွှတ်တော်ကိုယ်စားလှယ်များ၊ လွှတ်တော်ပြင်ပ အစိုးရအထောက်အကူပြု နိုင်ငံရေးအင်အားစုမှ ကိုယ်စားလှယ်များ၊ ပဲ၊ ပြောင်း၊ နှမ်း အသင်းဥက္ကဋ္ဌနှင့် အင်အား ၁၈၀ ခန့် တက်ရောက်ခဲ့ကြောင်း သိရသည်။

အဆိုပါဖြစ်စဉ်နှင့်ပတ်သက်ပြီး ၂၀၁၇ ခုနှစ် ဇွန် ၁၈ ရက်တွင် မူဆယ် ၁၀၅ မိုင် ကုန်သွယ်ရေးဇုန် ညွှန်ကြားရေးမှူး မူဆယ်ခရိုင် အထွေထွေအုပ်ချုပ်ရေးဦးစီးဌာန၊ ခရိုင်အုပ်ချုပ်ရေးမှူးတို့ ဦးစီးပြီး ခရိုင်စီမံခန့်ခွဲရေး ကော်မတီဝင်များသည် ရွှေလီမြို့ ပြည်သူ့အစိုးရ ဒုတိယမြို့တော်ဝန် ဦးစီးအဖွဲ့နှင့် မူဆယ်မြို့တွင် တွေ့ဆုံဆွေးနွေးခဲ့ပြီး ဒုတိယမြို့တော်ဝန်မှ တရုတ်နိုင်ငံပြည်နယ်သုံးခုတွင် အွန်လိုင်းမှ လောင်းကစားလုပ်ငန်းများ လုပ်ကိုင်ပြီး ငွေကြေးများ တရားမ၀င် လွှဲပြောင်းခြင်း၊ ငွေသွင်းငွေထုတ် လုပ်ငန်းများ ဆောင်ရွက်နေခြင်းများကြောင့် တစ်ဖက်နိုင်ငံရွှေလီမြို့ပေါ်ရှိ ဘဏ်ခွဲများမှ ဘဏ်အကောင့် ၃၄၉ ခုအား စစ်ဆေးရန်အတွက် ခေတ္တပိတ်ထားခဲ့ရာ မြန်မာနိုင်ငံသားပိုင် ဘဏ်အကောင့် ၁၃၂ ခု ပါဝင်နေကြောင်း၊ အွန်လိုင်းလောင်းကစားမှုကို တရုတ်နိုင်ငံရဲချုပ်ရုံးမှ တိုက်ရိုက်ကိုင်တွယ် ဖြေရှင်းနေခြင်းဖြစ်ပြီး ဘဏ်အကောင့်များ စိစစ်ခြင်းသည် ဆင့်ကဲဆင့်ကဲ တင်ပြဆောင်ရွက်ခြင်းဖြစ်ပြီး အချိန်အနည်းငယ် လိုအပ်ပါကြောင်း၊ အမှုနှင့်မသက်ဆိုင်သည့် ဘဏ်အကောင့်များ အမြန်ဆုံးပြန်လည် ဖွင့်လှစ်နိုင်ရေး ဆောင်ရွက်သွားမည်ဖြစ်ကြောင်းနှင့် ဘဏ်အကောင့်များ စိစစ်ဖြေရှင်းရေး အတွက်လည်း အထူးအဖွဲ့များ ဖွဲ့စည်းထားရှိပြီးဖြစ်ကြောင်း သိရသည်။

ယင်းအပြင် တရုတ်နိုင်ငံသံရုံး ယာယီတာဝန်ခံမှ ၂၀၁၇ ခုနှစ် ဇွန် ၁၈ ရက်တွင် ဆက်သွယ် ပြောကြားရာ၌ ယခုဖြစ်စဉ်နှင့်ပတ်သက်ပြီး သံရုံးအနေနှင့် အလေးအနက်ထား ဆောင်ရွက်လျက်ရှိကြောင်း၊ စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန၏ ညှိနှိုင်းအကြောင်းကြားမှုအရ တရုတ်နိုင်ငံအစိုးရသို့ လည်းကောင်း၊ နိုင်ငံခြားရေးဝန်ကြီးဌာနသို့လည်းကောင်း၊ စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနသို့လည်းကောင်း တင်ပြ ဆောင်ရွက်လျက်ရှိကြောင်း၊ ဖြစ်စဉ်အား ယူနန်ပြည်နယ်အစိုးရပင် သိရှိခြင်းမရှိဘဲ တိုက်ရိုက် ဆောင်ရွက်ခဲ့ခြင်းဖြစ်ကြောင်း၊ တရုတ်နိုင်ငံဘက်မှ ရွှေလီဒုတိယမြို့တော်ဝန်ကို တာဝန်ပေးပြီးအဖွဲ့နှင့် ဆောင်ရွက်နေကြောင်း၊ အမြန်ဆုံး ညှိနှိုင်းဆောင်ရွက်ပေးမည်ဖြစ်ကြောင်း သိရသည်။               

Writer: 
ဆန်းထူးအောင်