ရက်မှန်ကြေး ပေးချေခြင်း မရှိသဖြင့် မင်္ဂလာဒုံစက်မှုဇုန်ရှိ Honey Garment 2 အထည်ချုပ်စက်ရုံမှ အလုပ်သမား ၁၀၀၀ ခန့် လုပ်ငန်းခွင်မ၀င်ဘဲ ဆန္ဒထုတ်ဖော်

မင်္ဂလာဒုံစက်မှုဇုန်ရှိ Honey Garment 2 အထည်ချုပ်စက်ရုံမှ အလုပ်သမား ၁၀၀၀ ခန့် လုပ်ငန်းခွင်မ၀င်ဘဲ ဆန္ဒထုတ်ဖော်စဉ်

ရန်မှန်ကြေးများ ပေးချေခြင်း မရှိသဖြင့် မင်္ဂလာဒုံစက်မှုဇုန်ရှိ Honey Garment 2 အထည်ချုပ်စက်ရုံမှ အလုပ်သမား ၁၀၀၀ ခန့် လုပ်ငန်းခွင်မ၀င်ဘဲ ဆန္ဒထုတ်ဖော်လျက် ရှိကြောင်း သိရသည်။

မင်္ဂလာဒုံ စက်မှုဇုန်အတွင်း Honey Garment 1 နှင့် 2 စက်ရုံနှစ်ရုံ ရှိသည့်အနက် စက်ရုံတာဝန်ရှိသူများသည် စက်ရုံ (၁) ရှိ အလုပ်သမားများကိုသာ ရက်မှန်ကြေး ပေးချေပြီး စက်ရုံ (၂) ရှိ အလုပ်သမားများကိုမူ ရက်မှန်ကြေးပေးချေခြင်းမရှိ ဟုဆိုကာ စက်ရုံ (၂) မှ အလုပ်သမားခေါင်းဆောင် နှစ်ဦးက ရက်မှန်ကြေးများ ရရှိရန် တောင်းဆိုခဲ့ကြောင်း သိရသည်။

ယင်းသို့တောင်းဆိုနေစဉ် အလုပ်သမားခေါင်းဆောင် တစ်ဦးဖြစ်သည့် ကိုဝင်းနိုင်အား အလုပ်မှ ထုတ်ပယ်ခဲ့သည့်အတွက် စက်ရုံအလုပ်သမား ၁၀၀၀ ခန့်သည် မေ ၁၅ ရက်မှစ၍ လုပ်ငန်းခွင်မ၀င်ဘဲ ဆန္ဒထုတ်ဖော်ခဲ့ခြင်း ဖြစ်သည်။

“ကျွန်တော်တို့ အခုရက်မှန်ကြေးတွေ မရဘူး။ Honey စက်ရုံ ၁ နဲ့ ၂ ရှိတယ်။ နှစ်ရုံရှိတဲ့ဟာကို Honey ၁ ကိုကျတော့ပေးပြီး Honey ၂ ကိုတော့မပေးဘူး။ အဲဒီလို မပေးလို့ ကျွန်တော်တို့ အလုပ်သမားခေါင်းဆောင် နှစ်ယောက်က ရုံးပေါ်တက်ပြီး ရက်မှန်ကြေးရဖို့ တောင်းဆိုတယ်။ သူတို့က (စက်ရုံတာဝန်ရှိသူများ) ခေါင်းဆောင်တစ်ယောက်ကို အလုပ်က ထုတ်လိုက်တဲ့အတွက် အခုလို တောင်းဆိုနေရတာပါ။ ရက်မှန်ကြေးတွေ ပြန်ရဖို့နဲ့ အလုပ်ထုတ်ခံရတဲ့ အလုပ်သမား ခေါင်းဆောင်ကို အလုပ်ကပြန်ခန့်ဖို့ဆိုတဲ့ နှစ်ချက်ကို တောင်းဆိုထားတယ်” ဟု Honey ၂ အထည်ချုပ်စက်ရုံမှ အလုပ်သမား ကိုရန်မျိုးအောင်က ပြောကြားသည်။

အလုပ်မလုပ်ဘဲ ဆန္ဒထုတ်ဖော် တောင်းဆိုနေသည့် အလုပ်သမားများ အနေဖြင့် မေ ၂၀ ရက်တွင် လုပ်ငန်းခွင်အတွင်း ပြန်လည်ဝင်ရောက်ခြင်း မရှိပါက အလုပ်မှ ထုတ်ပယ်မည်ဟု စက်ရုံတာဝန်ရှိသူများက သတိပေးစာ ထုတ်ပြန်ထားသည်။ သို့သော် စက်ရုံအလုပ်သမားများက ၎င်းတို့တောင်းဆိုထားသည့် အချက်များ မရရှိပါက စက်ရုံတွင်းသို့ ပြန်လည်ဝင်ရောက်မည် မဟုတ်ကြောင်း The Daily Eleven သို့ ပြောကြားသည်။

Honey Garment (၁) (၂) စက်ရုံမှ အလုပ်သမားများသည် သင်္ကြန်ပိတ်ရက်ကိစ္စနှင့် ပတ်သက်၍ ဧပြီလအတွင်းက အလုပ် မလုပ်ဘဲ ဆန္ဒထုတ်ဖော်ခြင်းများ ရှိခဲ့ကြောင်း၊ အဆိုပါ ဆန္ဒထုတ်ဖော်မှုများနှင့် ပတ်သက်၍ အလုပ်သမား ကိုယ်စားလှယ်များနှင့် ဆွေးနွေးမှုများ ရှိခဲ့ကြောင်း၊ ဧပြီလအတွင်း ဆန္ဒထုတ်ဖော်ရာ၌ အလုပ်သမားများဘက်မှ အလုပ်မလုပ်သည့် ရက်များအား စက်ရုံဘက်မှ ငွေကြေးပြန်လည် ဖြတ်တောက်ရာတွင် မှားယွင်းမှုအချို့ ဖြစ်ပေါ်ခဲ့ခြင်းသာဖြစ်ကြောင်း စက်ရုံတာဝန်ရှိသူ HR မန်နေဂျာ ဒေါ်ထားတင်ဖုန်း က မေ ၁၉ ရက်က ပြောကြားသည်။

“သူတို့က Complain လာတော့ အစ်မတို့ ကြည့်လိုက်တော့ မှားတွက်ထားတာ တွေ့ရတယ်။ မှားတွက်မိတာကို ရုံ (၁) ကျတော့ မဖြတ်ဘဲပေးပြီး ရုံ (၂) ကိုလည်း လစာမဖြတ်ဘဲ အကုန်ပေးပါဆိုပြီး တောင်းဆိုလာတာ ဖြစ်ပါတယ်” ဟု ဒေါ်ထားတင်ဖုန်းက ပြောကြားသည်။

Writer: 
ရှိုင်းလင်းအောင်