တိုင်းတရားလွှတ်တော်၌ တင်ပြထားသော ရာဇ၀တ်ဆိုင်ရာ ပြင်ဆင်မှုတွင် ပါဝင်သည့် ဦးကိုနီ လုပ်ကြံခံမှုနှင့် ပတ်သက်ပြီး ပူးပေါင်းပါဝင်သူ အောင်ဝင်းခိုင်အား ဖမ်းဆီးနိုင်ရန် ဖမ်းဝရမ်းအသစ် လျှောက်ထားမှု ပလပ်ခံရ

အမျိုးသားဒီမိုကရေစီအဖွဲ့ချုပ် (ဗဟို) ဥပဒေအထောက်ကူပြုအဖွဲ့ဝင် တရားလွှတ် တော်ရှေ့နေ ဦးကိုနီ ရန်ကုန်လေဆိပ်တွင် သေနတ်ဖြင့် အနီးကပ်ပစ်ခတ် လုပ်ကြံခံရမှုတွင် ပူးပေါင်းပါဝင်သူ အောင်ဝင်းခိုင်အား ရှာဖွေဖမ်းဆီးနိုင်ရန် ၀ရမ်းအသစ် ထပ်မံထုတ်ပေးရန် အပါအ၀င် ရာဇ၀တ်ဆိုင်ရာ ပြင်ဆင်မှုကို မေ ၁၉ ရက် မွန်းလွဲ ၃ နာရီတွင် ရန်ကုန်တိုင်းဒေသကြီး တရားလွှတ်တော်၌ အမိန့်ချမှတ်ခဲ့သည်။

ယင်းနေ့ရုံးချိန်း၌ အမိန့်ချမှတ်ရာတွင် ဦးကိုနီ၏ ရှေ့နေဖြစ်သူ ဦးနေလ တင်ပြထား သည့် ရာဇ၀တ်ဆိုင်ရာ ပြင်ဆင်မှုတွင် ပါဝင်သော ထွက်ပြေးလွတ်မြောက်နေသူ အောင်ဝင်းခိုင် နောက်ဆုံးပျောက်ဆုံးခဲ့သော နေပြည်တော်၊ ပရဆေးဥယျာဉ်နားနှင့် ၎င်းသွားလာတတ်သော နေရာများကို ရှာဖွေဖမ်းဆီးနိုင်ရန် ၀ရမ်းအသစ် ထပ်မံထုတ်ဆင့်ပေးပါရန် ပလပ်သည်ကို အတည်ပြုခဲ့ပြီး ၀ရမ်းထပ်မံ ထုတ်ပေးရန် လျှောက်ထားမှုကို ခွင့်မပြုကြောင်း အမိန့်ချသည်။

ထို့ပြင် မတ် ၁၇ ရက်တွင် မူလခရိုင် တရားရုံးက အမိန့်ချမှတ်ထားသည့် အောင်ဝင်းခိုင်အား လတ်တလော ဖမ်းဆီးနိုင်ရန် အခြေအနေ မရှိ၍ ဆုံးဖြတ်ပြီး ၎င်း၏နောက်ကွယ်တွင် မင်နက်သက်သေများ ဆက်လက် စစ်ဆေးစေခြင်းကို ပယ်ဖျက်ကြောင်း အမိန့်ချမှတ်ခဲ့ပြီး မူလခရိုင် တရားရုံးက ထုတ်ပေးသည့် ဖမ်းဝရမ်းအပေါ် အမှုစစ်ရဲမှူး တင်မောင်ဆွေ ထွက်ချက်ပါ တရားခံဖမ်းဝရမ်း ပေးပို့ထားသည်ဆိုသော နေပြည်တော် မှုခင်းတပ်ဖွဲ့မှူးရုံး၊ တပ်ဖွဲ့ခွဲ၊ တပ်ဖွဲ့စိတ်မှ ၀ရမ်းအတည်ပြု ဆောင်ရွက်မှု အပါအ၀င် ၀ရမ်းအတည်ပြုမှုကို ပြည့်စုံစွာတင်ပြပြီး အမှုကို ဥပဒေအတိုင်း ဆက်လက်စစ်ဆေးရန် ညွှန်ကြားကြောင်း အမိန့်ချမှတ်ခဲ့သည်။

ထွက်ပြေးလွတ်မြောက်နေသူ အောင်ဝင်းခိုင် နောက်ဆုံးပျောက်ဆုံးခဲ့သော နေပြည်တော်၊ ပရဆေးဥယျာဉ်နားတွင် ရှာဖွေဖမ်းဆီးနိုင်ရန် ၀ရမ်းထပ်မံ ထုတ်ဆင့်ပေးပါရန်နှင့် တရားခံပြေး ဖမ်းဆီးရမိရေး အတွက် ပြည့်စုံစွာ ညွှန်ကြားသည့် အမိန့်ပေးပါရန် အချက်နှစ်ချက် လျှောက်ထားချက် ပါဝင်သည့် ရာဇ၀တ်ဆိုင်ရာ ပြင်ဆင်မှုကို ဦးကိုနီ၏ရှေ့နေ ဦးနေလက တိုင်းတရားလွှတ်တော်သို့ တင်ပြခဲ့ခြင်းကို ဧပြီ ၂၈ ရက်တွင် ကြားနာပြီးနောက် ယင်းကဲ့သို့ အမိန့်ချမှတ်ခဲ့ခြင်းဖြစ်သည်။

ထိုသို့ ရာဇ၀တ်ဆိုင်ရာ ပြင်ဆင်ချက်နှင့် ပတ်သက်ပြီး တိုင်းတရားလွှတ်တော်တွင် အမိန့်ချမှတ်ပြီးသောကြောင့် အောင်ဝင်းခိုင်၏ တရားခံပြေးအမှုကို မြောက်ပိုင်းခရိုင် တရားရုံး၌ စစ်ဆေးမည်ဖြစ်ကြောင်း သိရသည်။

လက်ရှိတွင် ဦးကိုနီ လုပ်ကြံခံရမှုနှင့် ပတ်သက်ပြီး မြောက်ပိုင်းခရိုင် တရားရုံး၌ ကျူးလွန်သူ ကြည်လင်းနှင့် အောင်ဝင်းဇော်၊ ဇေယျာဖြိုး၊ အောင်ဝင်းထွန်း၊ အောင်ဝင်းခိုင်တို့ ငါးဦးကို ရာဇသတ်ကြီး ဥပဒေပုဒ်မ ၃၀၂/၃၄/ ၂၁၂ တို့ဖြင့် တရားစွဲဆိုထားကြောင်း သိရသည်။

Writer: 
ပြည့်ဖြိုးအောင်