မလေးရှား ပြည်တွင်းအခြေအနေများကြောင့် မြန်မာလုပ်သားစေလွှတ်မှု ဆက်လက် ဆိုင်းငံ့ထားသင့်ကြောင်း မလေးရှားနိုင်ငံဆိုင်ရာ မြန်မာသံရုံးအကြောင်းပြန်

မလေးရှားပြည်တွင်းအခြေအနေများကြောင့် မြန်မာလုပ်သားစေလွှတ်မှု ဆက်လက်ဆိုင်းငံ့ထားသင့်သည်ဟု မလေးရှား နိုင်ငံဆိုင်ရာ မြန်မာသံရုံးက အကြောင်းပြန်ထားကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောကြားသည်။

မလေးရှားနိုင်ငံသို့ မြန်မာအလုပ်သမား စေလွှတ်သည့် လုပ်ငန်းစဉ်ကို (၃၁/၂၀၁၆) ကြိမ်မြောက် ပညာရေး၊ ကျန်းမာရေး နှင့် လူ့စွမ်းအား အရင်းအမြစ် ဖွံ့ဖြိုးတိုးတက်ရေး ကော်မတီ၏ ဆုံးဖြတ်ချက်အရ ခေတ္တရပ်ဆိုင်းခဲ့ပြီး မြန်မာအလုပ်သမားများအား မလေးရှားနိုင်ငံသို့ ပြန်လည်စေလွှတ်ရန် သင့်-မသင့် နိုင်ငံခြားရေးဝန်ကြီး ဌာနမှတစ်ဆင့် မလေးရှားနိုင်ငံဆိုင်ရာ မြန်မာသံရုံးသို့ သဘောထားမှတ်ချက် တောင်းခံခဲ့ရာ မလေးရှားနိုင်ငံဆိုင်ရာ မြန်မာသံရုံးမှ မလေးရှား နိုင်ငံသို့ မြန်မာအလုပ်သမားသစ် ပြန်လည်စေလွှတ်ရန်မှာ မလေးရှားပြည်တွင်း အခြေအနေများအရ ဆက်လက်ဆိုင်းငံ့ထားသင့်သည်ဟု အကြောင်းပြန်ခဲ့ကြောင်း ဦးသိန်းဆွေက ပြောကြားသည်။

သို့သော် မလေးရှားနိုင်ငံမှ Calling Visa ရရှိထားသည့် မြန်မာအလုပ်သမားများအား နစ်နာမှုမရှိစေရန် စေလွှတ်မည်ဆိုပါက စေလွှတ်သင့်သည်ဟု အကြောင်းပြန် ခဲ့ကြောင်း ဦးသိန်းဆွေက ဆက်လက်ပြောကြားသည်။

ပြည်ပနိုင်ငံများသို့ သွားရောက် အလုပ်လုပ်ကိုင်လိုသည့် မြန်မာအလုပ်သမားများအား ပြည်ပအလုပ်အကိုင် အကျိုးဆောင်လိုင်စင်ရ အေဂျင်စီများမှတဆင့် စေလွှတ်ခွင့်ပြုနေရာမှာ မလေးရှားနိုင်ငံတွင် ဖြစ်ပွားနေသည့် အခြေအနေများကြောင့် မလေးရှားနိုင်ငံသို့ အလုပ်သမားများ စေလွှတ်ရေး လုပ်ငန်းစဉ်ကို ၂၀၁၆ ခုနှစ် ဒီဇင်ဘာ ၆ရက်မှ စတင်ကာ ခေတ္တရပ်ဆိုင်းသွားမည် ဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာနက သတင်းထုတ်ပြန်ခဲ့ပြီး လက်ရှိတွင်လည်း မလေးရှား ပြည်တွင်းရေး အခြေအနေများကြောင့် အလုပ်သမားသစ် စေလွှတ်မှု ဆက်လက်ဆိုင်းငံ့ရန် မလေးရှား နိုင်ငံဆိုင်ရာ မြန်မာသံရုံးက အကြောင်းပြန်ခဲ့ခြင်းဖြစ်သည်။

ခေတ္တရပ်ဆိုင်းထားသည့် မလေးရှား နိုင်ငံသို့ မြန်မာအလုပ်သမား စေလွှတ်မှု ပြန်လည်ခွင့်ပြုရန်မှာ နိုင်ငံရေးအခြေအနေများအပေါ်တွင် မူတည်ပြီး မလေးရှား နိုင်ငံသို့ ရောက်ရှိပြီးမှ မြန်မာ အလုပ်သမားများ အခက်အခဲတွေ့ပါက စီမံရသည်မှာ ခက်ခဲကြောင်းနှင့် အခက်အခဲများ မရှိတော့သည့် အချိန်တွင် မလေးရှားနိုင်ငံသို့ မြန်မာ အလုပ်သမား စေလွှတ်မှု ပြန်လည်ခွင့်ပြုပေးမည်ဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာန အမြဲတမ်း အတွင်းဝန်ဦးမျိုးအောင်က ပြောကြားသည်။

မြန်မာနိုင်ငံမှ ပြည်ပနိုင်ငံများသို့ ရွှေ့ပြောင်း လုပ်သားများစေလွှတ်ရာတွင် ထိုင်း ၊ မလေးရှား၊ တောင်ကိုရီးယား စသည့်နိုင်ငံများသို့ အဓိက စေလွှတ်နေပြီး လက်ရှိအစိုးရလက်ထက် ၂၀၁၆ ခုနှစ် ဧပြီလမှ ၂၀၁၇ ခု နှစ် ဖေဖော်ဝါရီလအထိ ပြည်ပနိုင်ငံများသို့ တရားဝင်စေလွှတ်ခဲ့သည့် အလုပ်သမား ၁၆၁၂၉၅ ဦးအထိ ရှိခဲ့ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာန၏ ထုတ်ပြန်ချက်အရ သိရသည်။