ဖားကန့်အပါအ၀င် ရတနာနယ်မြေများတွင် သက်တမ်းကုန်ဆုံးသဖြင့် ဆက်လက် လုပ်ကိုင်ခွင့်မရတော့သည့် လုပ်ကွက်များ၏ ယာဉ်၊ ယန္တရားများဖြင့် သက်တမ်းရှိနေသည့် လုပ်ကွက်များသို့ ၀င်ရောက်ကာ ကျောက်စိမ်း အရှိန်အဟုန်မြှင့် တူးဖော်နေ

ဖားကန့်ဒေသရှိ ကျောက်စိမ်းလုပ်ကွက်များအား ယခုရက်ပိုင်းအတွင်း တွေ့ရစဉ်

လက်ရှိအစိုးရလက်ထက်တွင် ဖားကန့်အပါအ၀င် ရတနာနယ်မြေများ၌ ကျောက်စိမ်းလုပ်ကွက်များကို သက်တမ်းကုန်ဆုံးပါက ဆက်လက် လုပ်ကိုင်ခွင့် သက်တမ်းတိုးမြှင့်ပေးခြင်း မရှိသော်လည်း အဆိုပါလုပ်ကွက်များမှ ယာဉ်၊ ယန္တရားများဖြင့် သက်တမ်းရှိကာ တူးဖော်နေဆဲဖြစ်သည့် လုပ်ကွက်များသို့ ၀င်ရောက်ပြီး ကျောက်စိမ်းထုတ်လုပ်မှုများကို အရှိန်အဟုန်မြှင့် တူးဖော်မှုများ ပြုလုပ်နေကြောင်း မေ ၁၇ ရက်က ရန်ကုန်မြို့ Park Royal ဟိုတယ်တွင် ပြုလုပ်သည့် Global Witness ၏ Jade and The General မှတ်တမ်းရုပ်ရှင်ပြသပွဲတွင် Global Witness မှ Campaign Leader Mr. Paul Donowitz နှင့် Ms. Juman Kubba နှင့်ကချင်လူမှုဖွံ့ဖြိုးရေး ကွန်ရက် KDNG မှ Tsa Ji ကပြောကြားသည်။

“၂၀၁၅ မှာထုတ်ပြန်ခဲ့တဲ့ အစီရင်ခံစာကို ဆက်လက်တင်ပြတာပါ။ အဲဒီအစီရင်ခံစာမှာဆို တရုတ်ကို ကျောက်စိမ်းတင်ပို့မှုက ၃၁ ဘီလျံအထိရှိကြောင်း ဖော်ပြခဲ့တယ်။ လိုင်စင်ရပ်ခံရတဲ့ ကုမ္ပဏီတွေရဲ့ ယာဉ်၊ ယန္တရားတွေက လိုင်စင်ရှိပြီး ဆက်လုပ်နေတဲ့ ကုမ္ပဏီတွေဆီ ပြောင်းလုပ်နေတာ တွေ့ရတယ်” ဟု Paul Donowitz ကဆိုသည်။

စစ်အရာရှိဟောင်းများ၊ ခရိုနီများနှင့် မူးယစ်ရာဇာများက ၂၀၁၄ ခုနှစ်အတွင်း တရုတ်နိုင်ငံသို့ အမေရိကန်ဒေါ်လာ ၃၁ ဘီလျံတန်ဖိုးရှိ ကျောက်စိမ်းများကို တင်သွင်းခဲ့ကြောင်း “ကျောက်စိမ်း၊ မြန်မာနိုင်ငံ၏ ကြီးမားသည့် နိုင်ငံတော်လျှို့ဝှက်ချက် အစီရင်ခံစာ” ထုတ်ပြန်ခဲ့သည့် Global Witness အနေဖြင့် လက်ရှိတွင် အဆိုပါအစီရင်ခံစာ၏ နောက်ဆက်တွဲအဖြစ် Jade and The General မှတ်တမ်းရုပ်ရှင်ပြသရန် ကြိုးပမ်းခဲ့သော်လည်း အဆိုပါမှတ်တမ်းရုပ်ရှင်မှာ ပြသရန် ခွင့်ပြုချက်မယူရသေးသဖြင့် ပြသခြင်းမပြုရန် Park Royal ဟိုတယ်မှ တာဝန်ရှိသူများက ပြောကြားသဖြင့် ပြသနိုင်ခဲ့ခြင်းမရှိကြောင်း Mr. Paul Donowitz နှင့် Ms. Juman Kubba ကပြောကြားသည်။

“တိုးချဲ့တယ်။ ထပ်တိုးတယ်ဆိုပြီး တရားမ၀င်ယာဉ်၊ ယန္တရားတွေနဲ့ သတ်မှတ်ချက်ကျော်လွန်ပြီး တူးဖော်နေတာ အများကြီးတွေ့နေရတယ်” ဟု KDNG မှ Tsa Ji ကဆိုသည်။

လုံးခင်း၊ ဖားကန့်နှင့် အခြားရတနာနယ်မြေများရှိ ကျေက်မျက်တူးဖော်ရေး လုပ်ကွက် ၄၂၇ ခုမှာ ၂၀၁၇ ခုနှစ် ဧပြီလတွင် သက်တမ်းကုန်ဆုံးပြီဖြစ်ကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနမှ ထုတ်ပြန်ခဲ့သည်။

၂၀၁၇ ခုနှစ် ဧပြီလအတွင်း လုံးခင်း၊ ဖားကန့်ရတနာနယ်မြေတွင် သက်တမ်းကုန်ဆုံးမည့် လုပ်ကွက် ၁၂၈ ခု၊ မိုးညှင်းရတနာနယ်မြေတွင် လုပ်ကွက် ၁၅၅ ခု၊ မိုးကုတ်ရတနာနယ်မြေတွင် လုပ်ကွက် ၅၆ ခု၊ မိုင်းရှူးရတနာနယ်မြေတွင် လုပ်ကွက် နှစ်ခု၊ ခန္တီးရတနာနယ်မြေတွင် လုပ်ကွက် ၈၆ ခုတို့မှာ သက်တမ်းကုန်ဆုံးမည်ဖြစ်ကြောင်း ထုတ်ပြန်ခဲ့သည်။

မိုးညှင်းရတနာနယ်မြေရှိ လုပ်ကွက် ၁၅၅ ခုမှာ ၂၀၁၀ ပြည့်နှစ်နှင့် ၂၀၁၂ ခုနှစ်များက လုပ်ကိုင်ခွင့်ပြုခဲ့ခြင်းဖြစ်ပြီး မိုးကုတ်ရတနာနယ်မြေရှိ လုပ်ကွက် ၅၆ ခုမှာ ၂၀၁၄ ခုနှစ်က လုပ်ကိုင်ခွင့်ပြုခဲ့ကြောင်း၊ မိုင်းရှူးရတနာမြေ လုပ်ကွက်နှစ်ခုကိုလည်း ၂၀၁၄ ခုနှစ်တွင် လုပ်ကိုင်ခွင့်ပြုခဲ့ကြောင်း သိရသည်။

လုံးခင်း၊ ဖားကန့် ရတနာနယ်မြေရှိ လုပ်ကွက် ၁၂၈ ခုကို ၂၀၁၀ နှင့်၂၀၁၂ ခုနှစ်တွင် လုပ်ကိုင်ခွင့်ပေးခဲ့ခြင်း ဖြစ်သည်။ ခန္တီးရတနာနယ်မြေရှိ လုပ်ကွက် ၈၆ ခုကို ၂၀၁၂ ခုနှစ်တွင် လုပ်ကိုင်ခွင့်ပေးခဲ့ခြင်းဖြစ်ကြောင်း သိရသည်။ အဆိုပါလုပ်ကွက်များ အားလုံးသည် ၂၀၁၇ ခုနှစ် ဧပြီလတွင် သက်တမ်းကုန်ဆုံးပြီ ဖြစ်ကြောင်း အသိပေးထုတ်ပြန်ခဲ့ခြင်းဖြစ်သည်။

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ မြန်မာ့ကျောက်မျက်ရတနာ ရောင်းဝယ်ရေး လုပ်ငန်းအနေဖြင့် လုံးခင်း၊ ဖားကန့်နှင့် အခြားရတနာနယ်မြေများရှိ ကျောက်မျက် တူးဖော်ရေးလုပ်ကွက် ၂၁၀ မှာ ၂၀၁၇ ခုနှစ်မတ်လတွင် သက်တမ်းကုန်ဆုံးမည်ဖြစ်ကြောင်း ထုတ်ပြန်ခဲ့သည့်အပြင် ယင်းမတိုင်မီကလည်း လုံးခင်း၊ ဖားကန့်ရတနာနယ်မြေ ခန္တီး၊ မိုးညှင်း၊ မိုးကုတ်နှင့် မိုင်းရှူး၊ နန့်ယားဆိပ် ရတနာနယ်မြေများရှိ လုပ်ကွက် ၂၀၀၀ ကျော်မှာ သက်တမ်းကုန်ဆုံးခဲ့ကြောင်း ကြေညာထားသဖြင့် လက်ရှိအစိုးရလက်ထက်တွင် သက်တမ်းကုန်ဆုံး၍ ဆက်လက်လုပ်ကိုင်ခွင့်မပြုသည့် ကျောက်စိမ်းလုပ်ကွက် ၃၀၀၀ ခန့်ရှိပြီဖြစ်သည်။

လက်ရှိတွင် လုပ်ကွက်သက်တမ်း ကုန်ဆုံးမည့် ရတနာနယ်မြေများရှိ လုပ်ကွက်များကို သက်တမ်းတိုးမြှင့်မပေးဘဲ လစ်လပ်လုပ်ကွက်များအဖြစ် ကြေညာထားပြီး အဆိုပါလုပ်ကွက်များအတွက် Environmental Management Plan ရေးဆွဲနေကြောင်းနှင့် ရေးဆွဲပြီးပါက ပြည်ထောင်စုအစိုးရအဖွဲ့၊ ပြည်နယ်နှင့် တိုင်းဒေသကြီး အစိုးရအဖွဲ့အနေဖြင့် လုပ်ပိုင်ခွင့်ရှယ်ယာများ ခွဲဝေသွားမည်ဖြစ်ကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေး ၀န်ကြီးဌာနမှ အကြံပေးဦးဝင်းထိန်က ယခုနှစ်ဇန်န၀ါရီလအတွင်းက ပြောကြားခဲ့သည်။

“လိုင်စင်သက်တမ်း ကုန်ဆုံးသွားလို့ ဆက်လက်တူးဖော်ခွင့်မရတဲ့ လုပ်ငန်းတွေရဲ့ ယာဉ်၊ ယန္တရားတွေက လိုင်စင်ရှိနေတဲ့ လုပ်ငန်းတွေမှာ ၀င်ရောက် တူးဖော်နေတာကို သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနကို တင်ပြထားတယ်” ဟု Juman Kubba ကပြောကြားသည်။

Writer: 
ဖြိုးဝေ