ရှမ်းပြည်နယ်တွင် ဒေသအလိုက် အမျိုးသားအဆင့် နိုင်ငံရေး ဆွေးနွေးပွဲ ကျင်းပရန် အကြိုဆွေးနွေးပွဲအား ကြိုတင်ဖိတ်ကြားခြင်း မရှိဘဲ ပြုလုပ်သည့်အပေါ် နိုင်ငံရေးပါတီနှင့် လွှတ်တော်ကိုယ်စားလှယ်အချို့ ဝေဖန်

ရှမ်းပြည်နယ်အတွင်းရှိ ခရိုင်အလိုက်၊ မြို့နယ်အလိုက် အမျိုးသားအဆင့် နိုင်ငံရေး ဆွေးနွေးပွဲ ကျင်းပရန် ကြိုတင်ဖိတ်ကြားခြင်း မရှိဘဲ ရုတ်တရက် ပြုလုပ်သဖြင့် ပြည့်စုံသော ဆွေးနွေးချက်များ ရရှိမည် မဟုတ်ကြောင်း နိုင်ငံရေးပါတီနှင့် လွှတ်တော်ကိုယ်စားလှယ်အချို့က ဝေဖန်မှုများရှိနေသည်။

“ဖိတ်ချိန်က ညနေ ၄ နာရီ၊ အစည်းအဝေး လုပ်ချိန်က ညနေ ၅ နာရီဆိုတော့ ဆွေးနွေးရမယ့် အကြောင်းအရာတွေက တကယ့်ကို Heavy တွေချည်းပဲ။ နိုင်ငံရေး၊ ဖက်ဒရယ်အရေး၊ တိုင်းရင်းသား တန်းတူညီမျှရေး၊ စီးပွားရေး၊ လူမှုရေး၊ တရားဥပဒေ စိုးမိုးရေး စသဖြင့် အများကြီး ဆွေးနွေးမှာကို ဒီလောက် အချိန်ပိုင်းလေးနဲ့ ဆွေးနွေးလို့ မရဘူးလေ။ ဘယ်လိုကြောင့်လဲတော့ စဉ်းစားလို့ မတတ်တော့ဘူး။ မနေ့က ဆွေးနွေးချက်ကို ဒီနေ့ ၁၀ နာရီကို အထက်ကို တင်ရမယ်ဆိုတော့ အားလုံး ပျာယာခတ်ပြီးတော့ ၀န်ထုပ်ဝန်ပိုးတွေ ဖြစ်ကုန်တာပေါ့။ ဆွေးနွေးရမယ့် လူတွေက အချိန်မရတော့ ပြည့်ပြည့်စုံစုံ မဆွေးနွေးနိုင်တော့ဘူး။ အကြိုလို့လည်း ရေးမထားဘူးလေ။ ဒေသအလိုက် ကျင်းပသော နိုင်ငံရေး အဆင့် ဆွေးနွေးပွဲလို့ ရေးထားတယ်။ ဒါနဲ့ မပြီးပါဘူးလို့ ပြောတာပဲ။ နမ့်စန်မှာ တက်ရောက်တဲ့ အဖွဲ့တွေက နိုင်ငံရေးပါတီတွေ၊ လွှတ်တော်ကိုယ်စားလှယ်တွေ၊ လူမှုရေး အသင်းအဖွဲ့တွေ၊ ဌာနဆိုင်ရာတွေကို ဖိတ်တယ်။ စစ်တပ်နဲ့ဌာနေပြည်သူ့စစ်ကိုလည်း ဖိတ်ရမယ်။ ဒါပေမဲ့ ညနေ ၄ နာရီခွဲမှ ဖိတ်တော့ အချိန်က မရတော့ လူစုံတက်စုံ မတက်နိုင်ဘူး။ မနေ့ကဆိုရင် နိုင်ငံရေး ပါတီ သုံးခုရယ်၊ လွှတ်တော်ကိုယ်စားလှယ် နှစ်ယောက်ရယ်၊ ဌာနဆိုင်ရာ အနည်းငယ်ရယ်၊ ရဲတစ်ယောက်ရယ်။ ဒါပဲ တက်တယ်။ ဖိတ်ချိန်လည်း မရဘူး။ အစီအစဉ်ကတော့ မကျဘူး ဖြစ်နေတယ်။ ဖိတ်တာတောင် Viber နဲ့ ဖိတ်တယ်” ဟု နမ့်စန်မြို့နယ် NLD ဥက္ကဋ္ဌ ဦးနေဇော်နိုင်က ဧပြီ ၂၀ ရက်တွင် ပြောကြားသည်။

“မနေ့က သူတို့လုပ်တာ ပုံစံမဟုတ်ဘူး။ ၅ နာရီ အစည်းအဝေးရှိတာကို ၄ နာရီခွဲမှာ အကြောင်းကြားတယ်။ ကျွန်တော်က ရွာရောက်နေတယ်။ လုပ်နည်းလုပ်ဟန်တွေက သဘာဝ မကျဘူး။ အနည်းဆုံးတော့ တစ်ရက်လောက်တော့ ကြိုပြောသင့်တယ်လို့တော့ ထင်တာပေါ့” ဟု ကျောက်မဲလွှတ်တော် ကိုယ်စားလှယ်ဖြစ်သူ ဦးစိုင်းထွန်းဥာဏ်က ပြောကြားသည်။

ရှမ်းပြည်နယ်တွင် ဒေသအလိုက် နိုင်ငံရေး ဆွေးနွေးပွဲများ ပြုလုပ်ရန် ရှမ်းပြည်နယ်အတွင်းရှိ ခရိုင်နှင့် မြို့နယ်များအားလုံး ဧပြီ ၂၀ ရက်တွင် စတင်ပြင်ဆင်နေပြီဖြစ်ကြောင်း ရှမ်းပြည်နယ် အထွေထွေ အုပ်ချုပ်ရေးဦးစီးဌာန အတွင်းရေးမှူး ဦးစိုးစိုးဇော်က ပြောကြားသည်။

တောင်ကြီးမြို့ မြို့တော်ခန်းမတွင် ဧပြီ ၂၃၊ ၂၄၊ ၂၅ သုံးရက်တာ ကျင်းပမည်ဖြစ်ပြီး ဒေသအလိုက် အမျိုးသားအဆင့် နိုင်ငံရေး ဆွေးနွေးပွဲ၌ နိုင်ငံရေး စာတမ်း၊ စီးပွားရေး စာတမ်း၊ မြေယာနှင့် သဘာဝပတ်ဝန်းကျင်ဆိုင်ရာ စာတမ်းများကို ရှမ်းပြည်နယ် တောင်ပိုင်း၊ မြောက်ပိုင်းနှင့် အရှေ့ပိုင်းတို့ရှိ တိုင်းရင်းသား ကိုယ်စားလှယ်များ၊ အဖွဲ့အစည်းများ၊ တပ်မတော်သား ကိုယ်စားလှယ်များ၊ ဌာနဆိုင်ရာများ၊ အခြား ဖိတ်ကြားထားသော ဧည့်သည်တော်များ၊ EAO၊ NGO နှင့် CSO စသည့် အဖွဲ့အစည်းများက စာတမ်းများ ဖတ်ကြားကြမည်ဖြစ်ကြောင်း သိရသည်။

ဖတ်ကြားထားသော စာတမ်းများအားလုံးကို စုစည်းကာ ပြည်နယ်အချုပ်ဖြစ်သော နိုင်ငံရေးရာစာတမ်း၊ စီးပွားရေးစာတမ်း၊ မြေယာနှင့် သဘာဝပတ်ဝန်းကျင်ဆိုင်ရာ စာတမ်းများအား စုစည်းထားသော စာတမ်းများကို ဧပြီ ၂၅ ရက်တွင် ဖတ်ကြားမည်ဖြစ်ပြီး ရှမ်းပြည်နယ်မှ စာတမ်းသုံးစောင် ထွက်ရှိအောင် ဆောင်ရွက်မည်ဖြစ်ကာ ပြည်ထောင်စုအဆင့်သို့ တင်ပြပေးပို့သွားမည် ဖြစ်ကြောင်း သိရသည်။

“နိုင်ငံရေးဆိုင်ရာ စာတမ်းမှာ ဒီမိုကရေစီကနေ ဖက်ဒရယ်စနစ်ကို သွားတာပေါ့။ ကျွန်တော်တို့ နိုင်ငံက ဘယ်လိုဖက်ဒရယ်စနစ်မျိုးနဲ့ အသုံးပြုမလဲ။ အခြားနိုင်ငံကနေ ဘယ်လိုလုပ်လဲ။ အဖွဲ့အစည်းတွေ၊ ပါတီတွေကနေ တင်တဲ့စာတမ်းတွေကနေ ဒါတွေကို ဖော်ထုတ်မှာ ဖြစ်တယ်။ စီးပွားရေးနဲ့ ပတ်သက်ရင်လည်း အလားတူပဲ။ ဘယ်လို စီးပွားရေးဆိုင်ရာ မူဝါဒတွေ ချမှတ်မလဲ၊။ တင်ပြချက် စာတမ်းတွေကနေ ရယူမှာဖြစ်တယ်။ အလားတူပါပဲ မြေယာနဲ့ပတ်သက်ရင် ဖက်ဒရယ် စနစ်နဲ့သွားရာမှာ မြေယာဆိုင်ရာ မူဝါဒတွေကို ဘယ်လို ချမှတ်သင့်သလဲဆိုတာ တင်ပြချက် စာတမ်းတွေကနေ ဖော်ထုတ်ရယူ ပြုစုသွားမှာ ဖြစ်ပါတယ်” ဟု ရှမ်းပြည်နယ် အထွေထွေ အုပ်ချုပ်ရေးဦးစီးဌာန အတွင်းရေးမှူး ဦးစိုးစိုးဇော်က ပြောကြားသည်။

ဧပြီ ၁၉ ရက်တွင် မြို့နယ်အလိုက် ဆွေးနွေးပွဲများ လတ်တလောပြုလုပ်ခဲ့ပြီး ၂၀ ရက်တွင် မြို့နယ်အလိုက် ဆွေးနွေးထားသော စာတမ်းများကို ခရိုင်အလိုက် တင်ပြသွားမည် ဖြစ်ကာ ရှမ်းပြည်နယ် အထွေထွေအုပ်ချုပ်ရေး ဦးစီးဌာနရုံးသို့ စာတမ်းများရောက်ရှိလာခြင်း မရှိသေးကြောင်း ၎င်းက ဆက်လက်ပြောကြားသည်။

Writer: 
စည်သာ (တောင်ကြီး)