သက်ငယ်မုဒိမ်းမှုများနှင့် ပတ်သက်၍ အခြေခံပညာ မူလတန်းမှစပြီး ပညာပေးလုပ်ငန်းများ ပြုလုပ်သင်ကြားပေးရန်အဆို မန္တလေးတိုင်းဒေသကြီး လွှတ်တော်တွင် တင်သွင်း

သက်ငယ်မုဒိမ်းမှုများနှင့် ပတ်သက်၍ အခြေခံပညာ မူလတန်းမှစ၍ ပညာပေးလုပ်ငန်းများ ပြုလုပ်သင်ကြားပေးရန် အဆိုကို မန္တလေးတိုင်းဒေသကြီး လွှတ်တော်တွင် တင်သွင်းခဲ့ကြောင်း သတင်းရရှိသည်။

အောင်မြေသာစံမြို့နယ် မဲဆန္ဒနယ်အမှတ် (၂) မှ ကိုယ်စားလှယ် ဒေါက်တာကျော်ဦးက သက်ငယ်မုဒိမ်းမှုနှင့် အဓမ္မပြုကျင့်မှုများ ကြိုတင်ကာကွယ်နိုင်ရေးအတွက် မူကြိုနှင့် မူလတန်းအရွယ်များမှစပြီး သက်ငယ်ကလေး ပညာပေးအစီအစဉ်များ စနစ်တကျ သင်ကြားပေးရန်အဆိုကို တင်သွင်းခဲ့ခြင်း ဖြစ်သည်။

ဒေါက်တာကျော်ဦးက “နေ့စဉ်ရက်ဆက် ပုံနှိပ်မီဒီယာနှင့် ဆိုရှယ်မီဒီယာများတွင် အမျိုးမျိုးသော သက်ငယ်အကြမ်းဖက်မှုများ ကြားသိနေရပြီး ကလေးငယ်ရှိသည့် မိဘတိုင်း သားသမီးငယ်များအပေါ် ကြိုမမြင်နိုင်သည့် အကြမ်းဖက်မှုများအတွက် စိုးရိမ်နေကြရသလို အများပြည်သူများ၏ ရုပ်ပိုင်းဆိုင်ရာ၊ စိတ်ပိုင်းဆိုင်ရာလုံခြုံမှုကို ထိခိုက်နေရကြောင်း၊ သုတေသနပြုချက်အရ မိန်းကလေးငယ် သုံးဦးတွင်တစ်ဦး၊ ယောက်ျားလေးငယ် ခုနစ်ဦးလျှင် တစ်ဦးသည် ကလေးဘ၀တွင် လိင်အကြမ်းဖက်မှုကိုခံခဲ့ရပြီး အကြမ်းဖက် ကျူးလွန်သူ၏ ခြိမ်းခြောက်သည့် အန္တရာယ်ကို ကြောက်ရွံ့၍လည်းကောင်း၊ ကြိုးကိုင်ခြယ်လှယ်ခြင်းခံနေရ၍ မည်သူ့ကိုမှ မပြောပြကြကြောင်း၊ မြန်မာ့လူ့အဖွဲ့အစည်းတွင် အလားတူပင် ကြမ်းတမ်းယုတ်မာသည့် လိင်အကြမ်းဖက်မှုများကိုသာမက ညင်သာသော မဖွယ်မရာ ထိတွေ့ခံရခြင်းများကိုပါ ရှက်စရာတစ်ခုအဖြစ် ယူဆလျက် ရှိခြင်းတို့ကြောင့် လိင်အကြမ်းဖက်ခံရသည့် ကလေးများမှာ ပြန်ပြောရကောင်းမှန်း မသိကြခြင်း၊ ထိုကလေးများ ဆီးသွားရ ၀မ်းသွားရ ခက်သည့်အခါ ဆေးရုံဆေးခန်း သွားရောက်ကုသမှသာ လိင်အကြမ်းဖက်ခံရသည်ကို မိဘများသိရကြောင်း၊ ဥပမာအနေဖြင့် အိမ်ထောင်မရှိသော သမီးရည်းစားမရှိသော မိဘနှစ်ပါးကျန်းမာသော ကလေးမလေးတစ်ဦးတွင် အိပ်ခ်ျအိုင်ဗွီပိုး ရှိနေသဖြင့် မေးမြန်းရာ တစ်ချိန်က လူသိမခံဝံ့ခဲ့သည့် လိင်အကြမ်းဖက်မှုကို ကြုံခဲ့ရခြင်းဖြစ်သည်ကို သိရကြောင်း၊ ထိုသို့လိင်အကြမ်းဖက်ခံရသည်ကို သိရှိရသော တချို့မိဘများသည်လည်း မိမိနှင့်မိမိသားသမီး အရှက်နှင့်သိက္ခာကို ငဲ့ကွက်ကာ တိုင်ကြားခြင်းမရှိဘဲ ဖြေရှင်းကြကြောင်း၊ ထိုအရှက်တရားကို လက်နက်အဖြစ် အသုံးချကာ သက်ငယ်အကြမ်းဖက်မှုများကို အကြိမ်ကြိမ် ကျူးလွန်ကာ အတင့်ရဲနေကြကြောင်း၊ ပတ်ဝန်းကျင်မှ လူများကလည်း ထိုအကြမ်းဖက်ခံရသော ကလေးများကို ၀ိုင်းဝန်းကူညီ အားပေးသင့်ပါလျက် ခွဲခြားဆက်ဆံခံရခြင်းတို့ကြောင့် လူကြားထဲ မ၀င်ဆံ့ရဲသည့် ကလေးအဖြစ်သို့ ရောက်ရှိသွားသည်ကို မြန်မာ့လူ့အဖွဲ့တွင် တွေ့မြင်နေရကြောင်း စသည်တို့ကို ဆွေးနွေးခဲ့သည်။

ဆက်လက်၍ အဆိုတင်သွင်းသူ ဒေါက်တာ ကျော်ဦးသည်သူ၏ ဆရာဝန်သက်တမ်းတွင် ကလေးသူငယ် လိင်အကြမ်းဖက်မှု သုံးကြိမ်ကြုံတွေ့ခဲ့ရကြောင်း၊ ထိုသို့ကလေးငယ်များ လိင်အကြမ်းဖက်မှု ကြုံတွေ့ရသည့် မိဘများသည် အချိန်ကြာလာသည့်အခါ တခြားအရပ်ဒေသများသို့ ပြောင်းရွှေ့သွားကြကြောင်း၊ ဖခင်အရင်းဖြစ်သူ ကိုယ်တိုင် ၁၂ နှစ်သမီးကို အဓမ္မပြုကျင့်သောကြောင့် ကိုယ်ဝန်ခြောက်လရမှသာ သိရသည့် စသည့်ဖြစ်စဉ်များ ဖြစ်ပွားနေရကြောင်း တင်ပြခဲ့သည်။

ထို့ကြောင့် သက်ငယ်အကြမ်းဖက်မှုများ လျော့ကျရေးအတွက်သော် လည်းကောင်း၊ ကြိုတင်ကာကွယ်များ ပြုလုပ်ရန်လည်းကောင်း၊ ပြည်သူအများက ၀ိုင်းဝန်းပါဝင်လာစေရေး တို့အတွက် ပညာပေးသင်ကြားမှု အစီအစဉ်ကို ကလေးအရွယ်သုံးနှစ်မှ ၁၂ နှစ်အရွယ်မှစပြီး စတင်ဆောင်ရွက်ရန် အဆိုတင်သွင်းခဲ့ကြောင်း သိရသည်။

ဒေါက်တာကျော်ဦး အဆိုတင်သွင်းမှုကို လွှတ်တော်ကိုယ်စားလှယ်တစ်ဦးက ထောက်ခံဆွေးနွေးခဲ့ပြီး အဆိုနှင့်ပတ်သက်၍ ဆွေးနွေးလိုသည့် ကိုယ်စားလှယ်များက စာရင်းပေးသွင်းနိုင်ကြောင်း လွှတ်တော်ကကြေညာခဲ့ကာ နောက်ရက်တွင် ဆွေးနွေးမည်ဖြစ်သည်။

Writer: 
ယဉ်မျိုးသွယ်