MATA အဖွဲ့၏ ဗဟိုဦးဆောင်ကော်မတီဝင် ဦးအောင်ကျော်မိုးနှင့် ဆက်သွယ်မေးမြန်းခြင်း

MATA အဖွဲ့၏ ဗဟိုဦးဆောင်ကော်မတီဝင် ဦးအောင်ကျော်မိုးနှင့် ဆက်သွယ်မေးမြန်းခြင်း
Published 10 September 2018

"တိုင်းပြည်ရဲ့လိုအပ်ချက်ဆိုတာ မှန်ပေမယ့် ပြည်သူတွေရဲ့ ဒုက္ခတွေနဲ့ နှိုင်းယှဉ်ကြည့်ရင် အကျိုးအမြတ်ဆိုတာ ရှိရဲ့လား ဆိုတာတွေကို သုံးသပ်ပြီး လုပ်ဆောင်ဖို့ကို အစိုးရကို တိုက်တွန်းမှုတွေ ကျွန်တော်တို့ လုပ်ဆောင်ခဲ့ပါတယ်။ ဒါပေမဲ့ အစိုးရအနေနဲ့ . . ."

ရှမ်းပြည်နယ်တောင်ပိုင်း၊ တောင်ကြီးခရိုင် တီကျစ်ဒေသအတွင်းရှိ ကျောက်မီးသွေးစွမ်းအင်သုံး လျှပ်စစ်ဓာတ်အားပေး စက်ရုံကြောင့် ဒေသအတွင်း လေထုနှင့် ရေထုညစ်ညမ်းမှု ဆိုးရွားစွာ မြင့်မားလျက်ရှိပြီး နောက်ဆက်တွဲ အကျိုးဆက်ကို ဒေသခံများ ခံစားနေရခြင်းကြောင့် စက်ရုံရပ်ဆိုင်းပေးရန် တီကျစ်ဒေသခံများ၊ မြန်မာနိုင်ငံ ပွင့်လင်းမြင်သာမှုနှင့် တာဝန်ယူမှု၊ တာဝန်ခံမှုဆိုင်ရာ အရပ်ဘက် မဟာမိတ်အဖွဲ့ (MATA) နှင့် မိတ်ဖက် ကျွမ်းကျင်ပညာရှင်တို့က အစိုးရနှင့် အများပြည်သူ သိရှိစေရန် သတင်းစာရှင်းလင်းမှုကို တောင်ကြီးနှင့် ရန်ကုန်မြို့တို့တွင် လုပ်ဆောင်ခဲ့သည်။

ထိုသို့ တီကျစ်ကျောက်မီးသွေး စွမ်းအင်သုံး လျှပ်စစ်ဓာတ်အားပေး စက်ရုံနဲ့ ပတ်သက်၍ ဒေသအတွင်း လေထုနဲ့ရေထု စမ်းသပ်စစ်ဆေးမှုများ လုပ်ဆောင်ခဲ့သည့် (MATA) အဖွဲ့၏ ဗဟိုဦးဆောင်ကော်မတီဝင် ဦးအောင်ကျော်မိုးနဲ့ မေးမြန်းထားမှုကို ဖော်ပြအပ်ပါသည်။

မေး ။ တီကျစ် ကျောက်မီးသွေးစွမ်းအင်သုံး  လျှပ်စစ်ဓာတ်အားပေးစက်ရုံနဲ့ ပတ်သက်ပြီး MATA အနေနဲ့ ဝင်ရောက် ဆောင်ရွက်ဖြစ်ခဲ့ပုံကို အရင်ဆုံးပြောပြပေးပါ။

ဖြေ ။ အဓိက,ကတော့ ဒီပြဿနာ ဖြစ်ပေါ်နေတဲ့ကိစ္စကိုစပြီး ဝင်ရောက်ဖြစ်တာက ၂၀၁၄ ခုနှစ်မှာ စတင်ခဲ့ပါတယ်။ ကျွန်တော်တို့ အနေနဲ့ စတင်သိခဲ့တာက ဒီစက်ရုံအကြောင်းကို Eleven Media ကပဲ ဖော်ပြခဲ့တာတွေရှိတယ်။ ၂၀၁၅ ခုနှစ်မှာ ရပ်ဆိုင်းလိုက်တယ် ဆိုတဲ့အကြောင်းကို ဖော်ပြခဲ့တယ်။ ၂၀၁၆ ခုနှစ်မှာတော့ စက်ရုံကို တင်ဒါပေးလိုက်တယ်ဆိုတဲ့ သတင်းအချက်အလက်တွေကို ကြားရတယ်။ ဒါကို ကျွန်တော်တို့အနေနဲ့ ဒေသခံတွေအတွက် စိုးရိမ်တယ်။ အဲဒါကြောင့် ၂၀၁၅ ခုနှစ် အတွင်းမှာပဲ လူထုလှုပ်ရှားမှုတွေ အနေနဲ့ လုပ်ဖို့ပြင်ဆင်ခဲ့တာတွေ ရှိပါတယ်။ ဒါပေမဲ့ အဲဒီအချိန်မှာ တိုင်းပြည်အတွက် အရေးကြီးနေတဲ့ ၂၀၁၅ ခုနှစ် အထွေထွေရွေးကောက်ပွဲ ရှိနေတဲ့အတွက် လူထုလှုပ်ရှားပွဲလုပ်မယ့် ကိစ္စက ပြည်သူ့ကို အနှောင့်အယှက်ဖြစ်မှာ စိုးတဲ့အတွက် နောက်ကိုဆုတ်လိုက်ပါတယ်။ နောက်ဆုတ်ပြီး ဒီကိစ္စကို စောင့်ဆိုင်းပါတယ်။ အရပ်သားအစိုးရ တက်လာပြီးနောက်ပိုင်းမှာ ၂၀၁၆ ခုနှစ် ဧပြီလမှာပဲ ဒီစက်ရုံကို EIA (ပတ်ဝန်းကျင်ထိခိုက်မှု ဆန်းစစ်ရေး) လုပ်ဖို့ ဆိုပြီးတော့ စတင်လာတာကို တွေ့ရပါတယ်။ ပြီးတော့ လူထုတွေ့ဆုံပွဲဆိုပြီး ပြုလုပ်လာတဲ့အခါမှာ ကျွန်တော်တို့ သွားတက်ပါတယ်။ အဲဒီလို တက်ရောက်တဲ့ အခါမှာလည်း ကျွန်တော်တို့ လူမှုအရပ်ဘက် အဖွဲ့အစည်းတွေကို ဆွေးနွေးခွင့် မပေးပါဘူး။ ကော်မတီက ရှင်းပြတယ်။ ဝန်ကြီးတွေက စကားပြောတယ်။ ကိုယ်စားလှယ်တွေက စကားပြောတယ်။ လူမှုအရပ်ဘက် အဖွဲ့အစည်းတွေက ကျွန်တော်တို့ကို ဆွေးနွေးခွင့်ပေးပါလို့ တောင်းတော့မှ ည ၉ နာရီမှသာ ဆွေးနွေးခွင့် ပေးမယ်လို့ သိရတယ်။ ဆွေးနွေးပွဲမှာလည်း သူတို့ဇာတ်တိုက်ထားတဲ့သူ တစ်ယောက်တည်းကပဲ မေးခွန်းတွေကို ဒိုင်ခံမေးနေတယ်။ ပြောခွင့် ကျွန်တော်တို့ကို မပေးတဲ့အတွက် လူထုကန့်ကွက်မှုတွေ စတင်လုပ်ဆောင်ခဲ့ပါတယ်။ အစိုးရသစ် ပြောင်းလဲလာတဲ့ အချိန်မှာလည်း စက်ရုံနဲ့ ပတ်သက်တဲ့ သတင်းတွေကို မျက်ခြည်မပြတ် နားထောင်ပါတယ်။ စက်ရုံနဲ့ပတ်သက်လို့ မီဒီယာတွေကနေတစ်ဆင့် ကန့်ကွက်ကြောင်း အစိုးရကို ပြောကြားမှုတွေ လုပ်ဆောင်ခဲ့ပါတယ်။ ဒေသခံတွေရဲ့ ဒုက္ခကို ကြည့်ပြီး အရပ်သား အစိုးရအနေနဲ့ ကူညီဆောင်ရွက်ပေးဖို့ စက်ရုံကို ပြန်လည်ဆန်းစစ်ဖို့၊ စာချုပ်စာတမ်းတွေကို ပြန်လည်စစ်ဆေးဖို့ကိုပါ။ တိုင်းပြည်ရဲ့ လိုအပ်ချက်ဆိုတာ မှန်ပေမယ့် ပြည်သူတွေရဲ့ ဒုက္ခတွေနဲ့   နှိုင်းယှဉ်ကြည့်ရင် အကျိုးအမြတ်ဆိုတာ ရှိရဲ့လား ဆိုတာတွေကို သုံးသပ်ပြီး လုပ်ဆောင်ဖို့ကို အစိုးရကို တိုက်တွန်းမှုတွေ ကျွန်တော်တို့ လုပ်ဆောင်ခဲ့ပါတယ်။ ဒါပေမဲ့ အစိုးရအနေနဲ့ ဘာတွေလုပ်လိုက်လဲဆိုရင် စက်ရုံကို EIA လုပ်ဖို့ဆိုပြီးတော့ စမ်းသပ်လည်ပတ်ခွင့် ပေးလိုက်ပါတယ်။ အဲဒီလို စမ်းသပ်ခွင့် ပေးလိုက်တာနဲ့ ပတ်သက်ပြီးတော့ ကျွန်တော်တို့ အံ့သြပါတယ်။ EIA ဆိုတာက လုပ်ငန်းမစမီကတည်းက အရင်လုပ်ဆောင်ရတဲ့ ကိစ္စပါ။ ဒါပေမဲ့ စက်ရုံလည်ပတ်ပြီးတော့မှ EIA လုပ်တယ် ဆိုတာက တော်တော်ကို ကျွန်တော်တို့ တိုင်းပြည်ရဲ့ လွဲမှားမှုကြီး တစ်ရပ်ဖြစ်ပြီး နိုင်ငံတကာ ကျင့်ဝတ်တွေနဲ့ လွဲချော်စွာ လုပ်ဆောင်မှု ဖြစ်ပါတယ်။ နိုင်ငံတကာမှာ စက်ရုံတစ်ခု လည်ပတ်တော့မယ်ဆိုရင် EIA လုပ်တော့မှပဲ ဆောင်ရွက်ရတာပါ။ အဲဒီတော့ ကျွန်တော်တို့ တိုင်းပြည်ကပဲ ထူးထူးဆန်းဆန်းနဲ့ ဒီလိုမျိုးလုပ်တဲ့အခါ ဥပဒေကို အလွဲသုံးစား လုပ်ပြီးတော့ အကျိုးစီးပွားကိုပဲ မျက်နှာမူတယ်။ ပြည်သူ့အကျိုးကို မျက်ကွယ်ပြုနေတယ်လို့ ကျွန်တော်တို့ ယူဆပါတယ်။ အဲဒီအတွက် MATA အနေနဲ့စတင်ပြီးတော့ ဒီစက်ရုံကိစ္စကို စနစ်တကျ ပြောဆိုနိုင်ဖို့အတွက် ပြင်ဆင်ခဲ့ကြပါတယ်။

မေး ။ ဆိုတော့ လက်ရှိ တီကျစ်ဒေသမှာ ဘာတွေဖြစ်နေလဲ။

ဖြေ ။ လက်ရှိ တီကျစ်မှာ ဘာတွေဖြစ်နေလဲဆိုတော့ ပညာရှင်တွေရဲ့ သုံးသပ်ချက်တွေအရဆိုရင် ဒေသအတွင်းမှာ လေထုညစ်ညမ်းမှုတွေ၊ ရေတွေ အဆိပ်သင့်နေတဲ့ ကိစ္စတွေ ဖြစ်နေပါတယ်။ ကုမ္ပဏီရဲ့ တာဝန်ယူမှု တာဝန်ခံမှုတွေကလည်း သူတို့အကျိုးစီးပွား အတွက်ပဲ ဖြစ်နေတယ်။ အစိုးရဘက်ကလည်း မျက်ကွယ်ပြုနေတယ်။ ဒီကိစ္စကို စနစ်တကျနဲ့ ပြန်လည်စီစစ်ရမယ့်အစား မျက်ကွယ်ပြုပြီးတော့ တိုင်းပြည်ရဲ့ လိုအပ်ချက်အရပဲဆိုတဲ့ ခေါင်းစဉ်တပ်ပြီးတော့ ပြောနေတယ်။ ဒေသအတွင်းမှာ လူတွေ ဒါကို ရဲရဲတင်းတင်း ပြောချင်တယ်။ ဒါပေမဲ့ ပအိုဝ်းကိုယ်ပိုင် အုပ်ချုပ်ခွင့်ရ ဒေသလည်း ဖြစ်နေတဲ့အတွက် တစ်ဖက်မှာ ပြည်သူ့စစ်တွေရဲ့ လက်နက်ကိုင်အုပ်စုတွေ လွှမ်းမိုးချုပ်ကိုင်မှုတွေရှိတယ်။ ဒေသခံတွေဘက်က ရိုးသားမှုတွေနဲ့ အကြောက်တရားတွေ ရှိနေတယ်။ ဒီအပေါ်မှာ မပြောရဲ မဆိုရဲဘူး။ အဲဒီအတွက် ကျွန်တော်တို့တွေက ဒေသခံ တိုင်းရင်းသားတွေအတွက် ဒါကို အစိုးရကို သုတေသန လုပ်ငန်းစဉ်တွေနဲ့ အထောက်အထားတွေနဲ့ လုပ်ဆောင်နေတာကို ပါဝင်စေချင်လို့ ဆောင်ရွက်နေခြင်း ဖြစ်ပါတယ်။

မေး ။ ကျောက်မီးသွေးစွမ်းအင်သုံး လျှပ်စစ်ဓာတ်အားပေး စက်ရုံကြောင့် ဒေသခံတွေ ဘယ်လိုဆိုးကျိုးတွေ ရရှိနေလဲ။

ဖြေ ။ ကျောက်မီးသွေး ဆိုးကျိုးအနေနဲ့က မိုင်းခွဲမှုတွေရှိတယ်။ မိုင်းခွဲမှုတွေက အနီးမှာရှိတဲ့ မြေကြီးတွေ အက်ကွဲကုန်တယ်။ အနီးမှာရှိတဲ့ လူနေအိမ်တွေကလည်း တုန်ခါမှုဒဏ်တွေကို ခံနေရတယ်။ သာယာကုန်း ရွာမှာဆိုရင် ကျွန်တော်တို့ တွေ့ရှိခဲ့တာက စွန့်ပစ်မြေစာပုံကြီးက အကြီးကြီးဖြစ်ပြီး အိမ်တွေအပေါ်မှာ ရောက်နေသလို ဖြစ်နေတယ်။ အဲဒါကြီး ပြိုကျလာမှာကိုလည်း ဒေသခံတွေက စိုးရိမ်ကြောက်နေကြတယ်။ နောက်ပြီးတော့ မိုင်းဧရိယာကနေပြီးတော့ စွန့်ပစ်လိုက်တဲ့မြေကြီး ဆက်လက်ပုံဖို့အတွက် နေရာကြောင့် လယ်သမားတွေ သူတို့မြေတွေ အသိမ်းခံလာရမှာကို ကြောက်နေတယ်။ တောင်ကြီးမှာ တွေ့ခဲ့တဲ့ အဲဒီက ဒေသခံ တစ်ယောက်မှာဆိုရင် သူ့မှာဦးပိုင်အမှတ်တွေ ရှိတယ်။ ပုံစံ ၇ အထိရှိတယ်။ ဒါကို မိုင်းတွင်းဧရိယာ ဆိုပြီး စိုက်ပျိုးမြေကိုလာပြီး သိမ်းမယ်ဆိုပြီး ကြားတဲ့အချိန်မှာ ဒေသခံလူထုရဲ့ စိတ်မလုံခြုံမှုတွေ၊ ဘဝမလုံခြုံမှုတွေကို ခြိမ်းခြောက်တဲ့ပုံစံတွေ ယနေ့ချိန်မှာ ဖြစ်နေတယ် ဆိုတာကို တွေ့ရတယ်။ လေထုနဲ့ ရေညစ်ညမ်းမှုကြောင့်  အသက်ရှူလမ်းကြောင်းနဲ့ ဆက်စပ်တဲ့ရောဂါတွေ၊ ဒြပ်ထုလွန်ကဲမှုကြောင့် ဖြစ်တဲ့ရောဂါတွေ ဖြစ်စေနိုင်တဲ့ ဆိုးကျိုးတွေ ခံစားနေရနိုင်တယ်။

မေး ။ ကျောက်မီးသွေးစွမ်းအင်သုံး လျှပ်စစ်ဓာတ်အားပေးစက်ရုံ တိုးချဲ့လုပ်ဆောင်မှုတွေက ဆက်လက်ပြီးတော့ ရှိနေလား။

ဖြေ ။ ကျောက်မီးသွေး စွမ်းအင်သုံး လျှပ်စစ်ဓာတ်အားပေး စက်ရုံသက် တမ်းလိုင်စင်က ၂၂ နှစ်အထိ ဖြစ်တယ်လို့ သိရတယ်။ အဲဒါက ဦးသိန်းစိန် အစိုးရ လက်ထက်က စတင်ချုပ်ဆိုထားတာ ဖြစ်တယ်။ ဆိုတော့ ၂၀၂၈ ခုနှစ်အထိကို သက်တမ်းတိုးခဲ့တာ ဖြစ်တယ်။ အဲဒီတော့ ဒီ၂၂ နှစ်အထိ လုပ်ဆောင်ဖို့ဆိုတာ ဧက ၅၀၀ နဲ့တင် မလုံလောက်နိုင်ဘူး။ ထပ်ပြီးတော့ တိုးချဲ့အနေအထား ရှိလာမယ်။ အဲဒီတော့ မိုင်းတွင်းက ဒီထက်ပိုပြီးတော့ ကြီးလာဖို့ပဲရှိမယ်။ တစ်ရက်ကို တန်ချိန် နှစ်ထောင်တူးမယ့် ကိစ္စက ဒီထက်ကိုပြီး မိုင်းတွင်းက ထက်ချဲ့ဖို့ပဲ ရှိလာနိုင်တယ်။

မေး ။ တီကျစ်ကျောက်မီးသွေး လျှပ်စစ်ဓာတ်အားပေး စက်ရုံကို ဘယ်သူတွေ လုပ်ဆောင်နေလဲ။ ပွင့်လင်းမြင်သာမှု အပိုင်းကရော ဘယ်လိုရှိလဲ။

ဖြေ ။ တီကျစ်ကျောက်မီးသွေး လျှပ်စစ်ဓာတ်အားပေးစက်ရုံနဲ့ ပတ်သက်လို့ရှိရင် နှစ်ပိုင်းရှိပါတယ်။ တီကျစ် ကျောက်မီးသွေးတွင်းနဲ့ လျှပ်စစ်ဓာတ်အားပေး စက်ရုံကို စက်မှုကုန်ကြမ်းအနေနဲ့ ကျောက်မီးသွေး သွင်းတာက ဧဒင်စွမ်းအင်ကုမ္ပဏီပါ။ ဒီစက်ရုံအပိုင်းကို တင်ဒါခေါ်တဲ့ အခါကျတော့ ဘယ်လိုခေါ်ခဲ့သလဲတော့ မသိဘူး။ တရုတ်နိုင်ငံ အခြေစိုက် ဝူရှီဟွာဂေါင်ကုမ္ပဏီက တင်ဒါရခဲ့တယ်လို့ သိရတယ်။ ဘယ်လိုသဘောတူညီ ချက်တွေနဲ့ စာချုပ်တွေချုပ်ဆို ထားတယ်ဆိုတာ အများပြည်သူ မသိဘူး။ သူတို့ စာရင်းဇယားအရ ထုတ်ပြန်မှုအရတော့ အမေရိကန် ဒေါ်လာ ၄၇ သန်းနဲ့ ရင်းနှီးမြှုပ်နှံတယ်ဆိုပြီး ကျွန်တော်တို့ သိရတယ်။

မေး ။ ဒီစက်ရုံစီမံကိန်းကြောင့် ဒေသခံပြည်သူတွေအပေါ် ဘယ်လိုလျော်ကြေးတွေရလဲ။ ဘယ်လို အကျိုးကျေးဇူးတွေ ရှိနိုင်လဲ ဆိုတာကိုရော MATA အနေနဲ့ သိထားလဲ။

ဖြေ ။ အရင်တုန်းကတော့ မြေယာသိမ်းဆည်းတွေကြောင့် ရွာတွေ ရွှေ့ပြောင်းခဲ့ရတာတွေရှိတယ်။ စစ်အစိုးရ လက်ထက်ကပေါ့။ လက်ရှိအခြေအနေကတော့ ကျန်းမာရေး စောင့်ရှောက်မှုနဲ့ ဆက်စပ်တဲ့ လုပ်ဆောင်မှုတွေ မရှိဘူး။ CSR ဆိုတဲ့ ကိစ္စပဲရှိတယ်။ CSR လုပ်ဆောင်ဖို့အတွက် ကျပ်သိန်းပေါင်း ၂၅၀၀ ပေးမယ် ဆိုပြီးတော့မှ ရန်ပုံငွေ သုံးစွဲပါမယ် ဆိုတာကိုပဲ သိထားတယ်။ အဲဒါကို ဘယ်လိုသုံးစွဲမလဲ။ လူထုအတွက် ဘယ်လိုလုပ်ဆောင်ပါမယ် ဆိုတာကိုတော့ ပွင့်လင်းမြင်သာမှု မရှိသေးပါဘူး။

မေး ။ တီကျစ်ကျောက်မီးသွေး လျှပ်စစ်ဓာတ်အားပေးစက်ရုံနဲ့ ပတ်သက်လို့ MATA ရဲ့ စမ်းသပ်တွေ့ရှိ ချက်တွေအပါ် အစိုးရနဲ့ သက်ဆိုင်ရာ အုပ်ချုပ်ရေးအပိုင်းက ဘယ်လိုရှိလဲ။ ပူးပေါင်းမှု အပိုင်းမှာရော ဘယ်လိုအနေအထားရှိလဲ။

ဖြေ ။ တကယ်တမ်းပြောရရင် ဒီဥစ္စာက တိုင်းပြည်အတွက် အရေးကြီးပါတယ်။ အစိုးရအနေနဲ့ လူထုဘဝ  လုံခြုံမှု အပိုင်းကို ဦးစားပေးရမယ့်အပိုင်း ဖြစ်ပါတယ်။ ကျွန်တော်တို့ အရပ်ဘက် လူမှုအဖွဲ့အစည်းအနေနဲ့ လူထုဘက်ကနေ ရပ်တည်ပြီးတော့ လုပ်ဆောင်နေတဲ့ အလားအလာတွေကို ပွင့်ပွင့်လင်းလင်း ပြောရရင်တော့  အစိုးရအနေနဲ့ လူထုစကားကို လေးလေးစားစား နားထောင်မှုတွေ လုပ်ရပါမယ်။ ပြီးတော့ အစိုးရဆိုတဲ့ အပိုင်းက နိုင်ငံရေးသမားတွေနဲ့ ဖွဲ့တည်ထားတာပါ။ ကျွန်တော်တို့ နားလည်ထားတာက နိုင်ငံရေးသမားဆိုတာ ဆုံးဖြတ်ပိုင်ခွင့် ရှိသူတွေပါ။ အဲဒီတော့ ဆုံးဖြတ်ပိုင်ခွင့် ရှိသူတွေက စဉ်းစားတွေးခေါ်ပြီးတော့ ဆုံးဖြတ်ချက်ကို ရဲရဲတင်းတင်း ချရမှာပါ။ ဟိုလူကိုလွှဲချ၊ ဒီလူကို လွှဲချပြီးတော့ လုပ်နေတဲ့ကိစ္စက နိုင်ငံရေးသမားနဲ့ မပီသပါဘူး။ အစိုးရတစ်ရပ် အနေနဲ့ လုပ်ရမယ့်ကိစ္စ မဟုတ်ပါဘူး။ လူထုက အာဏာအပ်နှင်း ထားတဲ့အတွက်  လူထုအကျိုးစီးပွားကို ကာကွယ်ပေးရမယ်။ လူထုအသံကို နားထောင်ရမှာ ဖြစ်ပါတယ်။ အခုလို မပူးပေါင်း၊ မဆောင်ရွက်တဲ့ အနေအထား ဖြစ်နေတဲ့ အပေါ်မှာ တော်တော်ကို စိတ်မကောင်း ဖြစ်မိပါတယ်။

မေး ။ အဲဒီတော့ တီကျစ်ဒေသအရေးနဲ့ ပတ်သက်ပြီးတော့ အစိုးရအနေနဲ့ ပူးပေါင်းဆောင်ရွက်မှု ရှိလာအောင် ဘယ်လိုဆက်လက် ဆောင်ရွက်မလဲ။

ဖြေ ။ ကျွန်တော်တို့ အနေနဲ့ကတော့ သက်ဆိုင်တဲ့ လွှတ်တော်ကိုယ်စားလှယ်တွေနဲ့ ဆက်လက်တွေ့ဆုံပြီး အစိုးရပါဝင်မှု ရှိလာအောင် ဆက်လက်တိုက်တွန်းမှုတွေ လုပ်ဆောင်သွားဖို့ ရှိပါတယ်။ အပြုသဘောဆောင်တဲ့ ချဉ်းကပ် ချိတ်ဆက်မှုတွေနဲ့ ပြောဆိုသွားဖို့ ရှိပါတယ်။

မေး ။ တီကျစ်ကျောက်မီးသွေး လျှပ်စစ်ဓာတ်အားပေးစက်ရုံနဲ့ ပတ်သက်ပြီး ဒေသခံတွေအတွက် လိုက်လံဆောင်ရွက် ပေးနေတဲ့ MATA အနေနဲ့ အစိုးရအပေါ် ဘယ်လိုတောင်းဆိုချင်လဲ။

ဖြေ ။ အဓိကအနေနဲ့ အစိုးရကို တောင်းဆိုချင်တာက ဒီကျောက်မီးသွေး ဓာတ်အားပေးစက်ရုံကို ချက်ချင်းရပ်ပေးဖို့ ဖြစ်ပါတယ်။ ပြီးရင် ဒေသခံတွေအတွက် တီကျစ်ဒေသမှာရှိတဲ့ လေထု၊ ရေထုကို အစိုးရ အနေနဲ့ ကိုယ်တိုင်ဦးစီးပြီး စစ်ဆေးပေးစေချင်ပါတယ်။ ဒေသခံလူထုကို ကျန်းမာရေးစစ်ဆေးမှုကို လုပ်ဆောင် ပေးစေချင်ပါတယ်။

မေး ။ တခြား ဖြည့်စွက်ပြောကြား ချင်တာများ ရှိရင်ပြောပေးပါ။

ဖြေ ။ မရှိတော့ပါဘူး။ ကျေးဇူးတင်ပါတယ်။

 

Most Read