မိုဆာလာရဲ့လီဗာပူးလ်နဲ့အဖွင့်ရာသီက အံ့အားသင့်စရာကိန်းဂဏန်းတွေ၊ စံချိန်မှတ်တမ်းတွေနဲ့လှပခဲ့ပါတယ်။ ဒါပေမဲ့ သူက အလုပ်များများလုပ်ပြီး စကားနည်းနည်းပဲ ပြောတဲ့သူဆိုတော့ သူ့အကြောင်းအသေးစိတ်ကို ပရိသတ်တွေက ထိတွေ့ခွင့်သိပ်မရကြဘူး။ ပွဲတစ်ပွဲပြီးလို့ သူ့ကိုအင်တာဗျူးဖို့ ဝိုင်းလာရင်တောင် နောက်တစ်ကြိမ်ပေါ့ဆိုတာလောက်ပဲ ပြောပြီး ရှောင်ပြေးလေ့ရှိတယ်။ ဒါကြောင့် သူ့ကို ဒိုမီနစ်ချ်ကင်းက exclusive interview လုပ်တဲ့အချိန်မှာ မိုဆာလာပရိသတ်တွေရော၊ လီဗာပူးလ်ပရိသတ်တွေရော၊ ဘောလုံးအားကစားကို ချစ်မြတ်နိုးသူတွေပါ ခံစားလို့ရအောင် ဖော်ပြပေးလိုက်ပါတယ်။

မေး - မို ရေ ... ဂိုး(၄၀)ပြည့်သွားတာကို ဘယ်လိုအဓိပ္ပါယ်ဖွင့်ဆိုချင်လဲ။

ဖြေ - ခင်ဗျားလည်းသိပါတယ်။ ဒါက အဓိပ္ပါယ်အများကြီးရှိတယ်။ ဒါပေမဲ့ ကျွန်တော်ပွဲတိုင်းဂိုးတွေသွင်းဖို့ကြိုးစားပါဦးမယ်၊ အသင်းကို ကူညီချင်တယ်ဆိုတာက နောက်ဆုံးပြောချင်တဲ့စကားပါပဲ။ အမှတ်တွေရဖို့အတွက်ရောပေါ့။ ဒါဟာ ကျွန်တော်တို့အတွက်အရေးအကြီးဆုံးအကြောင်းအရာပါ။ ကျွန်တော်တို့က အသင်းအတွက်ကစားနေတာပါ။ ဒါကြောင့် သွင်းဂိုးတစ်ဂိုးချင်းစီဟာ ကျွန်တော့်အတွက် ဒါမှမဟုတ် အားလုံးအတွက် အသင်းကို ကူညီဖို့ကြိုးစားနေတာပါပဲ။

မေး - ခင်ဗျားက လီဗာပူးလ်သမိုင်းမှာ သွင်းဂိုး (၄၀)ကို ကစားသမားတိုင်းထက် မြန်မြန်ပြည့်ခဲ့တယ်နော် . . .

ဖြေ - သိပ်ပျော်ဖို့ကောင်းတယ်ဗျ။ ဟုတ်တယ်။ ဒါဟာ တကယ်ထူးခြားတဲ့ခံစားမှုပါ။ ဒါပေမဲ့ နောက်ဆုံးရည်ရွယ်ချက်ကိုခင်ဗျားသိပါတယ်။ ကျွန်တော်ဂိုးသွင်းရတာကိုပျော်တယ်။ အသင်းကိုကူညီရတာကိုပျော်တယ်။ ဒါပါပဲ။

မေး - အီယန်ရပ်ရှ်က ၁၉၈၃-၈၄ ရာသီတုန်းက တစ်ရာသီတည်းမှာ (၄၇)ဂိုးသွင်းပြီး စံချိန်တင်ထားတယ်။ ဒီစံချိန်ကိုချိုးဖို့ ခင်ဗျားအတွက်ပွဲကျန်အရေအတွက်က လုံလောက်ရဲ့လား။

ဖြေ - အရမ်းနီးစပ်နေပြီဆိုတာ ခင်ဗျားသိပါတယ်။ (၇)ဂိုးတည်းပါ။ ဒါပေမဲ့ စောင့်ကြည့်ကြပေါ့။ အခုအချိန်အထိ ဘယ်နှစ်ပွဲကျန်သေးသလဲဆိုတာကို ကျွန်တော်မသိပါဘူး။ ဒါပေမဲ့ ပရီးမီးယားလိဂ်နဲ့ ချန်ပီယံလိဂ်ဆီမီးဖိုင်နယ်ပွဲတွေ ကျွန်တော့်လက်ထဲမှာရှိနေပါတယ်။ ကျွန်တော်က ကျွန်တော့်အတွက်ဂိုးတွေထပ်သွင်းနိုင်ဖို့ကြိုးစားသွားမှာဖြစ်ပြီး အသင်းကိုလည်း ကူညီသွားမှာပါ။

မေး - ခင်ဗျားရဲ့ခေါင်းထဲမှာ ပရီးမီးယားလိဂ်ရွှေဖိနပ်အကြောင်းကို ဘယ်လောက်တောင်တွေးဖြစ်နေလဲ။

ဖြေ - မှန်ပါတယ်။ ကျွန်တော်မညာပါဘူး။ ကျွန်တော့်ခေါင်းထဲမှာ ရှိနေပါတယ်။ ဒါပေမဲ့ ခင်ဗျားလည်းသိတဲ့အတိုင်းပဲ။ ကျွန်တော့်အသင်းက ကစားသမားတိုင်းက ကျွန်တော်ဂိုးတွေသွင်းနိုင်ဖို့အတွက် ဘောလုံးတွေပေးပြီး ကူညီနေကြသလို စပါးအသင်းသားတွေကလည်း ဟာရီကိန်းကို ကူညီကြမယ်။ မန်စီးတီးကစားသမားတွေက အဂွဲရိုးကိုကူညီကြမယ်ဆိုတာ ကျွန်တော်သေချာပေါက်ပြောရဲပါတယ်။ ဒါပေမဲ့ အဆုံးသတ်ကတော့ အသင်းကိုကူညီကြတာပါပဲ။

မေး - ခင်ဗျားကို ဘောလုံးများများပေးတာနဲ့ပတ်သက်ပြီး အသင်းဖော်တွေကိုမေးခဲ့ဖူးသေးလား။

ဖြေ - အင်း .. သူတို့ အများကြီးပေးကြပါတယ်။ ဒီအတွက်လည်း ကျွန်တော်အရမ်းပျော်ပါတယ်။ အသင်းဖော်တွေက ကိုယ့်ကို ပံ့ပိုးချင်နေကြတယ်ဆိုတဲ့ ခံစားမှုကို ခင်ဗျားသိလား။ ဒါဟာ အရမ်းထူးခြားတဲ့ ခံစားမှုပါ။

မေး - စတုတ်နဲ့ပွဲက ဂိုးကို ဟာရီကိန်းကို ပေးလိုက်တာနဲ့ပတ်သက်ပြီး ခင်ဗျား တွစ်တာမှာ ရေးခဲ့သေးတယ်နော်။ ဒီဆုံးဖြတ်ချက်ကို ခင်ဗျားဘယ်လိုယူဆသလဲ။

ဖြေ - (ရယ်လျက်) ဒီအကြောင်းနဲ့ပတ်သက်ပြီး ကျွန်တော်ဘာမှမပြောချင်တော့ပါဘူး။ သူတို့က ဟာရီကိန်းရဲ့ဂိုးလို့ပြောတယ်ဆိုရင် ကျွန်တော့်အတွက် ပြီးပါပြီ။ အခုတော့ ကျွန်တော်တို့အသင်းက (၄)ပွဲကျန်ပြီး သူတို့က (၅)ပွဲလား (၆)ပွဲလားမသိဘူးကျန်ပါတယ်။ ကျွန်တော်ကစားမယ့်ပွဲတွေအကြောင်းပဲ ကျွန်တော်စဉ်းစားနေပါတယ်။ စောင့်ကြည့်ကြတာပေါ့။

မေး - ခင်ဗျားက ဘယ်သူမှ မျှော်လင့်မထားတဲ့အဆင့်တစ်ခုမှာ ရပ်တည်နိုင်ခဲ့တယ်။ ဒီအတွက် လီဗာပူးလ်က ဘယ်လိုအခန်းကဏ္ဍမှာရှိနေသလဲ။ ဘယ်အရာက ခင်ဗျားကိုပျော်ရွှင်စေပြီး ဘာကြောင့်ခင်ဗျားက ပွဲတစ်ပွဲမှာ ဒီလောက်အထိ သက်သောင့်သက်သာရှိနေရတာလဲ။

ဖြေ - ဘော်ဘီ (ဖေမီနို)လည်း ဒီရာသီမှာ ဂိုးတွေအများကြီး သွင်းနိုင်ခဲ့တာကိုခင်ဗျားတွေ့မှာပါ။ သူ့အတွက်လည်း ဒီရာသီက ထူးခြားတဲ့ရာသီတစ်ခုပါပဲ။ ကျွန်တော်ထင်တာတော့ ကျွန်တော်တို့အသင်းရဲ့ ကစားဟန်ကကျွန်တော်တို့ကို အခွင့်အရေးတွေပိုရစေတယ်လို့ထင်ပါတယ်။ ပြိုင်ဘက်အသင်းရဲ့ ဂိုးပေါက်ရှေ့မှာ အမြဲတမ်းရှိနေတဲ့အသင်းရဲ့ ကစားဟန်ကကျွန်တော်တို့ကို အများကြီးကူညီပါတယ်။ ဒါကြောင့် အသင်းရဲ့ ကစားဟန်ကြောင့်လို့ပဲ ပြောချင်ပါတယ်။

မေး - နောက်ဆုံးမေးခွန်းပါ။ ဒီရာသီမှာ ခင်ဗျားရဲ့တစ်ဦးချင်း ဆုတံဆိပ်များစွာနဲ့ ချန်ပီယံလိဂ်ဖလားရဖို့ နှစ်ခုတည်းက ဘယ်တစ်ခုကို ခင်ဗျားရွေးချင်လဲ။

ဖြေ - ချန်ပီယံလိဂ်မှာ ဗိုလ်စွဲဖို့ပေါ့။ ခင်ဗျားဆိုလည်း ချန်ပီယံလိဂ်ဖလားရဖို့ကို တစ်ဦးချင်းဆုတံဆိပ်တွေထက်ပိုလိုချင်မှာပဲ။ ချန်ပီယံလိဂ်မှာ ဗိုလ်စွဲတယ်ဆိုတာ ဝိုး ... (ပါးစပ်ထဲမှ လေကိုမှုတ်ထုတ်) ကျွန်တော်မပြောတတ်ဘူး။ ဝိုး .... လို့ပဲ ပြောမယ်။ ချန်ပီယံလိဂ်ရတာက ပိုပျော်စရာကောင်းတယ်ဆိုတာ သံသယမရှိပါဘူး။ ချန်ပီယံလိဂ်ဖလားကို ဆွတ်ခူးနိုင်ဖို့ဆိုတာ အားလုံးအတွက် အရမ်းခမ်းနားတဲ့အရာပါ။ ကျန်တာတွေကို ကျွန်တော်ဂရုမစိုက်ပါဘူး။