ဒါရိုက်တာစင်ရော်မောင်မောင်နှင့် တွေ့ဆုံခြင်း

မိခင်များ၏ သားသမီးများအပေါ်ထားရှိသည့် အနှိုင်းမဲ့မေတ္တာအား အနုပညာဖန်တီးမှုအဖုံဖုံဖြင့် ရေးဆွဲခြယ်မှုန်းကြရာတွင် အသည်းအထူးကုပါမောက္ခ ဒေါက်တာခင်မောင်ဝင်းရေးသားသည့် ‘အမေနဲ့ကျွန်တော်’ ကိုယ်တိုင်ရေးအတ္ထုပ္ပတ္တိစာအုပ်လည်း တစ်ခုအပါအ၀င်ဖြစ်သည်။ အဆိုပါ ကိုယ်တွေ့ခံစားမှုစာအုပ်အား အကယ်ဒမီဒါရိုက်တာစင်ရော်မောင်မောင်က နှလုံးသားဖြင့် ခံစားပုံဖော်ကာ ‘ထာဝရအမေ’ ရုပ်ရှင်ဇာတ်ကားအဖြစ် ပြန်လည်အသက်သွင်း ဖန်တီးထားခဲ့ပြီးဖြစ်သည်။ အဆိုပါဇာတ်ကားတွင် ထူးခြားမှုတစ်ခုအဖြစ် ဒါရိုက်တာစင်ရော်မောင်မောင်နှင့် ၁၂ နှစ်ကြာမျှ အနုပညာတွဲဖက်လုပ်ကိုင်ခြင်းမရှိသူ အကယ်ဒမီမေသန်းနုမှာ မေတ္တာတရားကြီးမားလွန်းသူ မိခင်ကြီးအဖြစ် ပီပြင်စွာပုံဖော်ထားသည့်အပြင် သားဖြစ်သူ မင်းသန့်မောင်မောင်မှာလည်း ဇာတ်ကား၏တွဲဖက်ဒါရိုက်တာအဖြစ် ပါဝင်ပုံဖော်ထားပါသည်။ မိခင်တို့၏မေတ္တာတရားကို သားသမီးတိုင်းတန်ဖိုးထား လေးစားတတ်စေရန် ရည်ရွယ်ဖန်တီးထားသည့်အပြင် မိသားစုသုံးဦး အနုပညာပူးပေါင်းဖန်တီးမှု အမှတ်တရတစ်ခု ဖြစ်လာသည့် ‘ထာဝရအမေ’ ရုပ်ရှင်ဇာတ်ကားနှင့်ပတ်သက်၍ အကယ်ဒမီဒါရိုက်တာစင်ရော်မောင်မောင်နှင့်တွေ့ဆုံ၍ မေးမြန်းဖြစ်ခဲ့ပါသည်။

■ မေး – ထာဝရအမေ ရုပ်ရှင်ဇာတ်ကားကို ရိုက်ကူးဖို့အတွက် ဘယ်လိုစပြီး စိတ်ကူးဖြစ်ခဲ့တာလဲ ဆိုတာ အရင်ဆုံးသိချင်ပါတယ်။
ဖြေ – အမေကိုသားသမီးတိုင်းက ချစ်ပါတယ်။ ကျွန်တော်လည်း အမေကို အရမ်းချစ်တယ်။ ဆရာကြီးရဲ့စာအုပ်ကိုဖတ်လိုက်တဲ့အခါ အမေကိုဘယ်လောက် မြတ်နိုးချစ်ခင်လဲ၊ သူ့ကို ဒီလိုဘ၀မျိုးရောက်အောင် ဘယ်လိုထမ်း တင်ခဲ့လဲဆိုတာ ကွက်ကွက်ကွင်းကွင်း သွားတွေ့တယ်။ ဒါကိုရုပ်ရှင်ရိုက်ဖို့ ဆရာကြီးကပြောတဲ့အခါ ချက်ချင်းမဖြေခဲ့ဘူး။ သုံးခါတောင် စဉ်းစားတယ်။ ရိုက်ရင် ဖောင်ဖျက်ပြီး ရိုက်ရမှာ။ မကောင်းကောင်းအောင် ကြိုးစားရိုက်မယ်ဆိုပြီး ရိုက်တယ်။ မိမိ သားသမီးမြေးတွေကိုချစ်ရင်းနဲ့ ကိုယ့်ကိုယ်ကိုယ်ချစ်ဖို့ မေ့နေတဲ့ အမေအကြောင်းကို ကမ္ဘာတည်သရွေ့ မသိသေးသူတွေရော၊ သိပြီး သားသူတွေရော သိသွားအောင်ရိုက်မယ်ဆိုတဲ့ စိတ်ကူးနဲ့ ရိုက်ဖြစ်တာပါ။

■ မေး – ကာရိုက်တာတွေရွေးတဲ့အခါ အဓိကဇာတ်ကောင်ဖြစ်တဲ့ ဆရာကြီးရဲ့ အမေနေရာကို အန်တီဆင့် (မေသန်းနု)ကိုရွေးချယ်ဖြစ်တဲ့အကြောင်းလည်း ပြောပြပေးပါဦး။
ဖြေ – ကျွန်တော်တို့နှစ်ယောက်က ၁၂ နှစ်ကြာ ဝေးကွာခဲ့တာပေါ့။ ဒီကိစ္စမှာ မင်းသန့်မောင်မောင်က အဓိကကျတယ်။ သူကကျွန်တော့်ကိုပြောတယ်။ အမေ့အတွက် ကားကောင်းတစ်ကား ရိုက်ပေးစေချင်တယ်တဲ့။ သူ့ဘ၀အတွက် အကြီးမားဆုံးဆန္ဒပါတဲ့။ အချိန်လည်းကျလာပြီ၊ သူကိုယ်တိုင်လည်း သူ့အမေကို request လုပ်တယ်။ ကျွန်တော်ကိုယ်တိုင်လည်း ဖုန်းနဲ့ request လုပ်တယ်။ ဆရာကြီးကလည်း request လုပ်တဲ့အခါ မဆင့်ကလက်ခံခဲ့ပြီး ကျွန်တော်တို့မိသားစုသုံးယောက် အကောင်းဆုံး ကြိုးစားခဲ့ပါတယ်။ ဒေါ်ခင်ခင်က စိတ်ဓာတ်မာပြီးပြတ်သားတယ်။ မဖြစ်ဖြစ်အောင်လုပ်တယ်။ အနစ်နာခံတတ်တယ်။ ပညာအတတ်ကြီး မဟုတ်ပေမယ့် ပညာတတ်တွေထက် ဦးနှောက်ကပိုသွားတယ်။ သားသမီးတွေပေါ် အနှိုင်းမရှိ ချစ်တတ်တယ်။ ဥပဓိရုပ်အားဖြင့် မွန်ရည်သန့်ပြန့်တယ်။ ဒီလိုအချက်တွေကို မေသန်းနုနဲ့ထပ်တူကျအောင် လုပ်နိုင်တဲ့အတွက် ရွေးခဲ့တာပါ။

■ မေး – ရေနွေးငွေ့ရထားလိုမျိုး၊ ရှေးခေတ်ဘူတာကြီးလိုမျိုး အပြင်အဆင်တွေကအစ သေချာ ပြင်ဆင်ထားတာ တွေ့ရတယ်နော်။
ဖြေ – ဇာတ်လမ်းကလေ ၁၉၅၅ ရှိတယ်။ ၁၉၇၀၊ ၂၀၀၀၊ ဒီနေ့ခေတ်ဇာတ်သိမ်း ၂၀၁၇ မှာရှိတယ်။ ခေတ်အလိုက် မော်တော်ကားတွေ ပြောင်းသလို အ၀တ်အစားတွေ ပြောင်းရတယ်။ ရန်ကုန်လေဆိပ်ဆို ဆင်တူပြန်လုပ်ရတယ်။ ရှေးခေတ်ရေနွေးငွေ့ရထားကို renovate လုပ်ရတယ်။ ရန်ကုန်ဘူတာကြီးရဲ့ အဲဒီခေတ် အပြင်အဆင်၊ အဲဒီတုန်းက သွား လာ နေထိုင်မှုတွေပြန်လုပ်ရတယ်။ အ၀တ်အစားတွေ၊ သံသေတ္တာတွေကအစပေါ့။ တိုက်ပွဲခန်းတွေဆိုလည်း အဲဒီခေတ်က ရောင်စုံသူပုန်တွေရဲ့ အ၀တ်အစား၊ လက်နက်က အစပြင်ဆင်ခဲ့ရပါတယ်။ အမေရဲ့ ပြောင်းလဲသွားတဲ့ အ၀တ်အစား၊ ၀တ်မှုန်ရွှေရည်ရဲ့ အရွယ်အလိုက်ပြောင်းသွားတဲ့ အ၀တ်အစားတွေ ဆင်ရပါတယ်။ ကျန်တဲ့သရုပ်ဆောင်တွေဆိုလည်း ဒီအတိုင်းပါပဲ။

■ မေး – အချိန်အား လူအားနဲ့ ကြိုးစားအားထုတ်ထားတဲ့ ဖန်တီးသူ တစ်ယောက်အနေနဲ့ အခု ဒီဇာတ်ကားအပေါ် ကျေနပ်အားရမှုကို သိချင်ပါတယ်။
ဖြေ – ပြန်ပြောရရင်တော့ အမေကိုမချစ်တဲ့သူ မရှိပါဘူး။ အမေကိုမရှိတဲ့အချိန်မှ တမ်းတနေလို့မရဘူး။ ဘယ်လောက်ကုန်ကုန် အမေကို ပေးဆပ်နိုင်ရမယ်။ အမေဆိုတာ အစားထိုးလို့မရဘူး။ အဆုံးအစမရှိတဲ့ မေတ္တာမျိုးပေးတဲ့အမေပေါ့။ ချစ်ခင်မှုပေးဆပ်မှုကို နားလည်ရမယ်။ကျွန်တော်တို့ လူ့လောကထဲက ထွက်ခွာသွားရင်လည်း ဒီဇာတ်ကားကတော့ ဆက်ရှိနေမယ်။ အဲဒါက ကျွန်တော်တို့ ရည်မှန်းချက်ပါ။

■ မေး – main character တစ်ယောက်ဖြစ်တဲ့ အန်တီဆင့် (မေသန်းနု)အပေါ် ကျေနပ်အား ရမှုကိုလည်း ဒါရိုက်တာတစ်ယောက်အနေနဲ့ ပြောပေးပါဦး။
ဖြေ – ဒါကတော့ ပျော်ရွှင်ဂုဏ်ယူစွာဖြင့် ပြောရမှာပေါ့။ မဆင့်အကြောင်းကို ကျွန်တော်အသိဆုံးပဲ။ ကျွန်တော့်ထက်တော့ ဘယ်သူမှ ပိုမသိဘူး ထင်တယ်လေ။ ဘယ်လို သရုပ်ဆောင်နိုင်တယ်၊ ဘယ် angle ဘယ်လိုလှတယ်၊ သူ့ရဲ့ အံ့မခန်းရှိတဲ့ အနုပညာ၊ ကျွန်တော့်ရဲ့ သိတဲ့အသိ၊ ကျွန်တော့်သားရဲ့ချစ်ခြင်း မေတ္တာနဲ့ပေါင်းစပ်တဲ့အခါ ပိတ်ကားပေါ်မှာရှုစားပါ။

■ မေး – ဒါဆို ဦးမောင်တို့မိသားစုနဲ့ ပရိသတ်ကြားက မှတ်တိုင်တစ်ခု ဖြစ်လာမှာပေါ့နော်။
ဖြေ – မိသားစု မှတ်တိုင်ဖြစ်သလို ရုပ်ရှင်အတွက်လည်း မှတ်တိုင်တစ်ခုဖြစ်မယ်လို့ မျှော်လင့်တယ်။ ပရိသတ်တွေကြားမှာလည်း အကြောင်းအရာလေးတစ်ခု ခံယူစရာလေး ရှိသွားမယ်လို့ ယုံကြည်တယ်။

■ မေး – ဒီဇာတ်ကားကို ဘယ်တော့လောက်ကြည့်ခွင့်ရမလဲ။ နိုင်ငံတကာမှာရော ဘယ်တော့လောက် ရုံတင်ဖြစ်မလဲ။
ဖြေ – ကျွန်တော်က ဒီနှစ်မကုန်ခင် ရအောင်ရုံတင်ပါမယ်။ နိုင်ငံတကာမှာလည်း ထိုင်း၊ စင်ကာပူ၊ အမေရိကန်၊ မလေးရှား၊ အိန္ဒိယနိုင်ငံ အများအပြားမှာ ပြသနိုင်ဖို့ စပြီးကြိုးပမ်းနေပြီ။ ပြီးတော့ ရုပ်ရှင်ပွဲတော်တွေမှာရောပေါ့။ ကျွန်တော်သိခဲ့တဲ့ အသိဥာဏ်၊ နှလုံးသားနဲ့ခံစားမှု အကုန်ပုံအောပြီး ရိုက်ခဲ့တဲ့ ဇာတ်ကားပါ။

■ မေး – စောင့်ကြည့်အားပေးမယ့် ပရိသတ်တွေအတွက် ပြောချင်တဲ့ စကားလက်ဆောင်များ ရှိမလား။
ဖြေ – ရုံထဲဝင်ပြီးပြန်ထွက်လာတဲ့အခါ ခံစားမှုတစ်ခုခုဖြစ်ရင် ကျွန်တော့်ကို သတိရလိုက်ပါလို့။