ဇွန်လက စင်ကာပူတွင် ပြုလုပ်သည့် အာရှလုံခြုံရေးထိပ်သီးအတွင်း မိန့်ခွန်းပြောနေသော ဝန်ကြီးချုပ်မိုဒီ (Photo - AFP)

အိန္ဒိယနိုင်ငံတွင် စက်တင်ဘာ ၂၃ ရက်က ကမ္ဘာ့အကြီးဆုံးကျန်းမာရေးအာမခံ အစီအစဉ်ကြီးတစ်ခုကို စတင်ခဲ့သည်။ ဝန်ကြီးချုပ် နရင်ဒရာမိုဒီ၏ ပြောကြားချက်အရ ယင်းအစီအစဉ်သည် ဆင်းရဲချို့တဲ့သူ သန်း ၅၀၀ ကို လွှမ်းခြုံနိုင်လိမ့်မည်ဟု သိရသည်။

‘Modicare’ ဟု အမည်ပေးထားသော ထိုအစီအစဉ်သည် ဆင်းရဲသော မိသားစုတိုင်းအတွက် ပြင်းထန်သည့် နာမကျန်းဖြစ်မှုများအားကုသရန် ရူပီး ၅၀၀၀၀၀ ( ဒေါ်လာ ၆၉၀၀) ပံ့ပိုးပေးနိုင်ရန် လုံလောက်သည်ဟု သိရသည်။

Modicare သည် ဗဟိုအစိုးရနှင့် ပြည် နယ်အစိုးရ ၂၉ ခုကို နှစ်စဉ်စုစုပေါင်း ဒေါ်လာ ၁ ဒသမ ၆ ဘီလျံကုန်ကျစေမည် ဖြစ်သည်။ ရန်ပုံငွေမှာမူ လိုအပ်ချက်ပေါ်လိုက်၍ တစ်ဖြည်းဖြည်းတိုးမြှင့်သွားမည်ဟု သိရသည်။ နိုင်ငံအရှေ့ပိုင်း ဂျဟတ်ဟန်ပြည်နယ်၏ မြို့တော်ရန်ချီတွင် Mpdocare အစီအစဉ်စတင်ခြင်း အခမ်းအနားအတွင်း မိုဒီက ကျန်းမာရေးကတ်များကို ဝေပေးခဲ့သည်။

ယခုအစီအစဉ်သည် အိန္ဒိယနိုင်ငံထဲမှ ချို့တဲ့သူများကို အရည်အသွေးကောင်းမွန်ပြီး ဆက်သွယ်ရလွယ်ကူသည့် ကျန်းမာရေး စောင့်ရှောက်မှုများ ပံ့ပိုးပေးနိုင်ရေးအတွက် ကြီးမားသည့် ခြေလှမ်းကြီးတစ်ခုဖြစ်သည်ဟု မိုဒီကခေါ်ဆိုခဲ့ပြီး မိသားစုပေါင်းသန်း ၁၀၀ ကျော်အတွက် အကျိုးဖြစ်ထွန်းစေလိမ့်မည်ဟုလည်း ပြောကြားခဲ့သည်။

ဝန်နှင့်အားမမျှဖြစ်နေသည့် အိန္ဒိယ၏ ကျန်းမာရေးစနစ်ထဲတွင် ဆေးရုံနှင့် ဆရာဝန်မလောက်ငှမှုများနှင့် ကြုံနေရသည်။ ထို့ကြောင့် လူအများစုသည်တတ်နိုင်ပါက ပုဂ္ဂလိက ဆေးရုံ၊ ဆေးခန်းများကိုသာ အားကိုးနေရသည်။ သို့သော် ပုဂ္ဂလိကဆရာဝန်များ နှင့် ကျန်းမာရေးဆွေးနွေးခသည် ရူပီး ၁၀၀၀ ( ၁၅ ဒေါ်လာ) ဝန်းကျင်ကျသင့်သည်။ ယင်း ငွေပမာဏသည် တစ်နေ့အသုံးစရိတ် နှစ်ဒေါ်လာပင်မပြည့်သော လူသန်းပေါင်းများစွာအတွက် များပြားလှသော ငွေပမာဏကြီး ဖြစ်နေသည်။

ကျွမ်းကျင်သူများက မိုဒီ၏ ယခုအစီအစဉ်နှင့်ပတ်သက်ပြီး ချီးမွမ်းခဲ့ကြသည်။ သို့သော် ယင်းအစီအစဉ်သည် ပြင်းထန်ပြီး နာတာရှည်ဖြစ်သော ရောဂါများအား ကုသပေးရေးထက် နေ့စဉ်အခြေခံကျန်းမာရေး စောင့်ရှောက်မှုများ ပါဝင်သင့်သည်ဟု ထောက်ပြကြသည်။ “Mpdocare အစီအစဉ်ထဲမှာ အခြေခံကျန်းမာရေး စောင့်ရှောက်မှု မပါဝင်ပါဘူး။ အခြေခံကျန်းမာရေးစောင့်ရှောက်မှုဟာ အိန္ဒိယပြည်သူ့ကျန်းမာရေး ပံ့ပိုးမှုမှာ အားအနည်းဆုံး အချိတ်အဆက် ဖြစ်ပါတယ်” ဟု စောင့်ကြည့်သူတစ်ဦးက ပြောကြားခဲ့သည်။

Ref ; AFP