ဥရောပကို ဥရောပနိုင်ငံသားများသာ ပိုင်ဆိုင်ကြောင်း ဒလိုင်းလားမား ပြောကြား

ဥရောပကို ဥရောပနိုင်ငံသားများသာ ပိုင်ဆိုင်ကြောင်း ဒလိုင်းလားမား ပြောကြား
Published 14 September 2018

စက်တင်ဘာ ၁၂ ရက်တွင် မယ်မို၌ ပျော်ရွှင်မှုနှင့် ငြိမ်းချမ်းမှုအနုပညာဆွေးနွေးပွဲတွင် ဒလိုင်းလားမားက စကားပြောနေစဉ် (Photo: AFP)

ဥရောပကို ဥရောပနိုင်ငံသားများသာ ပိုင်ဆိုင်ပြီး ဒုက္ခသည်များသည် ၎င်းတို့၏ နေရပ်နိုင်ငံများအား ပြန်လည်တည်ဆောက်ရန်အတွက် နေရပ်များသို့ ပြန်သွားသင့်ကြောင်း တိဘက်ဘာသာရေးခေါင်းဆောင် ဒလိုင်းလားမားက စက်တင်ဘာ ၁၂ ရက်တွင် ပြောကြားခဲ့သည်။

ဆွီဒင်တွင် တတိယအကြီးဆုံးမြို့ဖြစ်ပြီး ရွှေ့ပြောင်းအခြေချ လူဦးရေအများအပြား နေထိုင်နေကြသော မယ်မိုတွင် ညီလာခံတစ်ခု၌ ဒလိုင်းလားမားက ဥရောပသည် ၎င်းတို့၏ဘဝအတွက် အမှန်တကယ် အန္တရာယ် ကြုံတွေ့နေရသည့် ဒုက္ခသည်ကို ကူညီရန်အတွက် ကိုယ်ကျင့်သိက္ခာပိုင်းအရ တာဝန်ရှိကြောင်း ပြောကြားခဲ့သည်။

“သူတို့ကို လက်ခံရမယ်။ ကူညီပေးရမယ်။ ပညာသင်ပေးရမယ်။ ဒါပေမဲ့ အဆုံးမှာတော့ သူတို့တွေက သူတို့နေရပ်နိုင်ငံ ဖွံ့ဖြိုးတိုးတက်အောင် လုပ်ဆောင်ပေးရမယ်” ဟု ၁၉၈၉ ခုနှစ်တွင် ငြိမ်းချမ်းရေးနိုဘယ်ဆု ရရှိခဲ့သော ဒလိုင်းလားမားက ပြောကြားခဲ့သည်။

တိဘက်ဒေသတွင် အုံကြွမှုများအား နှိမ်နင်းရန် တရုတ်က တပ်များကို စေလွှတ်ခဲ့ပြီးနောက် ဒလိုင်းလားမားသည် ၎င်း၏အသက်အန္တရာယ်အတွက် စိုးရိမ်မှုကြောင့် မြို့တော် လာဆာမှ ထွက်ပြေးခဲ့ရပြီး အိန္ဒိယတွင် ခိုလှုံခဲ့ရသည်။ “ဥရောပကို ဥရောပသားတွေကပဲ ပိုင်ဆိုင်တယ်လို့ ထင်တယ်” ဟု အသက် ၈၃ နှစ်ရှိပြီဖြစ်သော ဒလိုင်းလားမားက ပြောကြားခဲ့သည်။

စက်တင်ဘာ ၉ ရက်တွင် ကျင်းပခဲ့သော ဆွီဒင်နိုင်ငံလုံးဆိုင်ရာ ရွေးကောက်ပွဲများ၌ လူအများကြိုက်ဝါဒီ လက်ယာအစွန်းရောက် ဆွီဒင်ဒီမိုကရက်ပါတီက အခြေအနေကောင်းခဲ့ပြီးနောက် သုံးရက်အကြာတွင် ပြုလုပ်ခဲ့သည့် ထိုညီလာခံ၌ ဒလိုင်းလားမားက ယင်းကဲ့သို့ ပြောကြားခဲ့သည်။

၂၀၁၅ ခုနှစ်တွင် ဥရောပသို့ ရွှေ့ပြောင်း အခြေချဝင်ရောက်မှု အဆိုးရွားဆုံး အကျပ်အတည်း ရင်ဆိုင်ခဲ့ရစဉ် နိုင်ငံအလိုက် ရွှေ့ပြောင်းအခြေချဝေစုကို အများဆုံးလက်ခံခဲ့သည့် နော်ဒစ်နိုင်ငံ ဆွီဒင်တွင် ရွှေ့ပြောင်း အခြေချဆန့်ကျင်ရေး ဆွီဒင်ဒီမိုကရက်ပါတီက လက်ရှိဝန်ကြီးချုပ် စတက်ဖန်လော့ဗန်၏ ဆိုရှယ်ဒီမိုကရက်ပါတီနှင့် အတိုက်အခံ ကွန်ဆာဗေးတစ်ဝါဒီ Moderates ပါတီပြီးလျှင် မဲတတိယအများဆုံး ရရှိခဲ့သည်။

Ref: AFP

Most Read

Most Recent