၂၀၁၂ ခုနှစ် ဇူလိုင် ၂၆ ရက်တွင် ဟနွိုင်းရှိ လမ်းတစ်လမ်း၌ ခွေးသားများကို ရောင်းချနေစဉ် (Photo: AFP)

ခွေးရူးပြန်ရောဂါ ဖြစ်ပွားခြင်းများနှင့် နိုင်ငံ့ပုံရိပ် ထိခိုက်စေခြင်းတို့ကြောင့် ခွေးသားဟင်းလျာများ မစားသုံးကြရန် ပြည်သူများအား ဟနွိုင်းမှ တာဝန်ရှိသူများက စက်တင်ဘာ ၁၁ ရက်တွင် တိုက်တွန်းခဲ့သည်။

လမ်းဘေးအစားအစာများကြောင့် ကျော်ကြားသော ဗီယက်နမ်နိုင်ငံမြို့တော် ဟနွိုင်းတွင် ခွေးသားကင်၊ ခွေးသားပြုတ်၊ ခွေးသားပေါင်းများကို စားသောက်ဆိုင်များနှင့် ဈေးဆိုင်များတွင် တွေ့မြင်နိုင်ပြီး ယင်းအသားကို ရိုးရာအရ ထမင်း၊ ဝိုင် သို့မဟုတ် ဘီယာတို့ဖြင့် တွဲဖက်စားသုံးကြသည်။

သို့သော် ခွေးသားစားခြင်းသည် ခွေးရူးပြန်ရောဂါနှင့် တိရစ္ဆာန်မှကူးစက်သည့် အခြားသောရောဂါများ ဖြစ်ပွားနိုင်စေခြင်းကြောင့် ခွေးသားစားခြင်းကို ရှောင်ရှားကြရန် ဟနွိုင်းပြည်သူ့ကော်မတီက စက်တင်ဘာ ၁၁ ရက်တွင် တိုက်တွန်းခဲ့သည်။ ထို့ပြင် ဗီယက်နမ် စားသောက်ဆိုင်များ၏ မီနူးများပေါ်တွင် Little Tiger ဟု အမည်ပေးထားသော ကြောင်သားဟင်းလျာ စားသုံးခြင်းကိုလည်း ရှောင်ရှားကြစေလိုကြောင်း တိုက်တွန်းထားသည်။

တိရစ္ဆာန်များအား သတ်ဖြတ်ခြင်းသည် ရက်စက်ကြမ်းကြုတ်ပြီး တဖြည်းဖြည်း ပပျောက်သွားစေရန် မျှော်လင့်နေကြောင်း၊ ခွေးသားစားခြင်းသည် ဟနွိုင်းမြို့၏ ဂုဏ်သတင်းကို ကျဆင်းစေပြီး ယင်းသည် တိုင်းတစ်ပါးသားများကြားတွင် မလုပ်သင့်သော အရာအဖြစ် ယူဆထားကြကြောင်း ဟနွိုင်းပြည်သူ့ကော်မတီက ထုတ်ပြန်ခဲ့သည်။

ဟနွိုင်းတွင် ခွေးနှင့်ကြောင် အကောင်ရေ ၄၉၃၀၀၀ ခန့်ရှိပြီး အများစုကို အိမ်မွေးတိရစ္ဆာန်အဖြစ် မွေးမြူထားကြကာ အကောင်ရေ ၁၀၀၀ ခန့်မှာ စားသုံးရန်အတွက် သတ်ဖြတ်ခံနေရသည်။ ယခုနှစ်စပိုင်းမှစ၍ ဟနွိုင်းတွင် ခွေးရူးပြန်ရောဂါကြောင့် လူသုံးဦး သေဆုံးပြီးဖြစ်ကာ ယင်းထဲမှ လူနှစ်ဦးမှာ ခွေးရူးရောဂါပိုး ကူးစက်ခံထားရသည်ဟု အစိုးရက ထုတ်ပြန်ခဲ့သည်။

Ref: AFP