ဖလော့ရင့်ဟာရီကိန်း အမေရိကန် အရှေ့တောင်ပိုင်းသို့ ဝင်ရောက်တိုက်ခတ်နိုင်

ဖလော့ရင့်ဟာရီကိန်း အမေရိကန် အရှေ့တောင်ပိုင်းသို့ ဝင်ရောက်တိုက်ခတ်နိုင်
Published 11 September 2018

Photo: AFP

အလွန်လျင်မြန်စွာ အင်အားကောင်းလာနေသော ဖလော့ရင့်ဟာရီကိန်းသည် ယခုသီတင်းပတ်နှောင်းပိုင်းတွင် ကာရိုလိုင်းနားမှသည် အတ္တလန္တိတ်အလယ်ပိုင်းဒေသရှိ မည်သည့်ဒေသကိုမဆို တိုက်ရိုက်ဝင်ရောက် တိုက်ခတ်နိုင်ကြောင်း အမျိုးသား ဟာရီကိန်းစင်တာက ခန့်မှန်းထားသည်။

ဖလော့ရင့်သည် တစ်နာရီလျှင် လေတိုက်နှုန်း ၇၄ မိုင်ဖြင့် အပူပိုင်းမုန်တိုင်းအဖြစ်မှ စက်တင်ဘာ ၉ ရက် နံနက်တွင် ဟာရီကိန်းအဖြစ်သို့ ပြောင်းလဲခဲ့ပြီး စက်တင်ဘာ ၉ ရက် ညနေတွင် တစ်နာရီလျှင် မိုင် ၈၅ မိုင်နှုန်းအထိ အရှိန်ကောင်းလာခဲ့ကြောင်း အမျိုးသားဟာရီကိန်းစင်တာက ထုတ်ပြန်ခဲ့သည်။ ဖလော့ရင့်သည် စက်တင်ဘာ ၁၀ ရက်တွင် အလွန်အန္တရာယ်ကြီးသော အဓိက ဟာရီကိန်းတစ်ခုဖြစ်လာနိုင်ပြီး ရက်ပေါင်းများစွာ ဆက်လက် တည်ရှိနေနိုင်ကြောင်း မိုးလေဝသ ခန့်မှန်းသူများက သတိပေးခဲ့သည်။

အရှေ့ပိုင်းစံတော်ချိန် နံနက် ၁၁ နာရီ၌ ဖလော့ရင့်သည် ဘာမြူဒါအရှေ့တောင်ဘက် ၆၈၅ မိုင် (ကီလိုမီတာ ၁၁၀၀) ခန့်အကွာ၌ ဗဟိုပြုနေပြီး အနောက်ဘက်သို့ တစ်နာရီလျှင် ခုနစ်မိုင်နှုန်းဖြင့် ရွေ့လျားနေကာ လေတိုက်နှုန်းသည် အမြင့်ဆုံးအဖြစ် တစ်နာရီလျှင် မိုင် ၉၀ အထိ ရှိခဲ့သည်။

ပူနွေးသော ရေပြင်မှစွမ်းအင်များကို စုပ်ယူပြီးနောက် ဖလော့ရင့်သည် စက်တင်ဘာ ၁၁ ရက် မတိုင်မီ တစ်နာရီလျှင် လေတိုက်နှုန်း မိုင် ၁၃၀ သို့မဟုတ် ယင်းထက်ပို၍ ပြင်းထန်သော အဆင့် (၄) ဟာရီကိန်းအဖြစ် ပြောင်းသွားနိုင်ကြောင်း မိုင်ယာမီအခြေစိုက် ဟာရီကိန်းစင်တာက ထုတ်ပြန်ခဲ့သည်။ ထိုမုန်တိုင်း ဖြတ်သန်းမည့်လမ်းကြောင်းကို အတိအကျသိရန် စောလွန်းနေသော်လည်း စက်တင်ဘာ ၁၃ ရက်မတိုင်မီ ကာရိုလိုင်းနားသို့ ဝင်ရောက်နိုင်ကြောင်း ခန့်မှန်းသူများက သတိပေးခဲ့သည်။

Ref: AFP