စက်တင်ဘာ ၆ ရက်တွင် ဒါလပ်စ်အပြည်ပြည်ဆိုင်ရာလေဆိပ်၌ မျက်နှာကို သိမှတ်နိုင်သည့် နည်းပညာဖြင့် ခရီးသွားများအား စစ်ဆေးနေစဉ် (Photo: AFP)

မျက်နှာများကို သိမှတ်နိုင်သော နည်းပညာကြောင့် အလွန်အကျွံ စေ့စေ့စပ်စပ်စစ်ဆေးခြင်းများကို ဖြစ်ပေါ်စေနိုင်သော်လည်း ဝါရှင်တန်ရှိ ဒါလပ်စ်လေဆိပ်တွင် စတင်အသုံးပြုနေသော ယင်းစနစ်သစ်မှာမူ ခရီးသွားများ ပြည့်ကျပ်ခြင်းကို လျှော့ချရာတွင် ကူညီပေးနိုင်သည့် အကျိုးပြုသော နည်းလမ်းတစ်ခုဟု အမွှမ်းတင်ခံနေရသည်။

ဒါလပ်စ်လေဆိပ်အရာရှိများသည် မျက်နှာများကို သိမှတ်နိုင်သောစနစ်သစ် (Facial Recogition) နှစ်ခုကို စက်တင်ဘာ ၆ ရက် က စတင်ပွဲထုတ်ပြခဲ့သည်။ ယင်းတို့ထဲမှ တစ်ခုမှာ အဝင်အထွက်မှတ်တမ်းများအတွက် ဥပဒေဆိုင်ရာ လိုအပ်ချက်များကို ဖြည့်ဆည်းပေးမည့် စနစ်ဖြစ်သည်။ ဒုတိယတစ်ခုမှာမူ နိုင်ငံတကာ လေကြောင်းခရီးစဉ်များနှင့်အတူ ရောက်ရှိလာသော ခရီးသည်များ၏ လက်ရှိပုံစံနှင့် ဓာတ်ပုံများကို တူ၊မတူ တိုက်ပေးရခြင်းကို ပိုမိုမြန်ဆန်စေသည့်စနစ် ဖြစ်သည်။

မျက်နှာများကို သိမှတ်နိုင်သော နည်းပညာအား အသုံးပြုမှု မြင့်တက်လာခြင်းကြောင့် ကမ္ဘာတစ်ဝန်း၌ စောင့်ကြည့်ရေးနှင့် ကိုယ်ရေးကိုယ်တာ လုံခြုံမှုအကြောင်းအရာနှစ်ခုကြားတွင် အငြင်းပွားမှုများကို ဖြစ် ပေါ်စေခဲ့သည်။ သို့သော် သက်ဆိုင်ရာအရာရှိများကမူ ထိုစနစ်သည် စောင့်ရမည့်ကြာချိန်နှင့် တန်းစီရခြင်းတို့ကို လျှော့ချရာတွင် ကူညီပေးနိုင်သည့် နည်းလမ်းတစ်ခု ဖြစ်သည်ဟု မီဒီယာများကို ပြောကြားခဲ့ကြသည်။

“ဒီနည်းပညာက အလုပ်ဖြစ်ပါတယ်။ ဒါဟာ လျင်မြန်ပြီး အသုံး ပြုသူတွေအတွက် အကျိုးပြုပါတယ်။ ပြုပြင်ပြောင်းလဲရလွယ်ပြီး အသုံးစရိတ်အရလည်း ထိရောက်မှုရှိပါတယ်။ ဒါဟာ နိုင်ငံတကာခရီးသွားလာမှုရဲ့ စာမျက်နှာကို ပြောင်းလဲလိုက်နိုင်လိမ့်မယ်လို့ ကျွန်တော်တို့ ယုံကြည်ပါတယ်” ဟု အမေရိကန် အကောက်ခွန်နှင့် နယ်စပ်ကာကွယ်ရေး ကော်မရှင်နာဖြစ်သူ ကီဗင်မက် အလီနန်က လေဆိပ်တွင် သတင်း ထောက်များကို ပြောကြားခဲ့သည်။

ကိုယ်ရေးအချက်အလက်များကို သိမှတ်နိုင်သောစနစ်ကြောင့်  ခရီးသည်၏မျက်နှာကို မြင်နိုင်ရုံဖြင့် လေယာဉ်ပေါ်တက်ခွင့်လက်မှတ်ယူသည့်အဆင့်ကို လျှော့ချနိုင်သည် ဟု သက်ဆိုင်ရာ အရာရှိများက ပြော ကြားခဲ့သည်။ “သင့်မှာ သယ်စရာတွေ များနေမယ်။ ဒါမှမဟုတ် ကလေးပါနေမယ်ဆိုတဲ့အချိန်မျိုးမှာ လေယာဉ်ပေါ်တက်ခွင့်လက်မှတ်နဲ့ စမ်းတဝါးဝါး ဖြစ်နေစရာ မလိုတော့ပါဘူး။ QR ကုဒ်ရှာရတာ၊ ဖုန်းကို Refresh ပြန်ချရတာတွေလည်း လုပ်စရာ မလိုတော့ပါဘူး” ဟု မက်အလီနန်က ပြောကြားခဲ့သည်။

ယင်းစနစ်နှင့်ပတ်သက်ပြီးပြု လုပ်ခဲ့သည့် တစ်ခုသော စမ်းသပ်မှုအတွင်း Airbus A380 ပေါ်သို့ ခရီးသည် ၃၅၀ တက်နိုင်ရေးသည် မိနစ် ၂၀ အတွင်း ပြီးသွားခဲ့ကြောင်း ( ပုံမှန်အချိန်၏ ထက်ဝက်သာ ကြာခဲ့ကြောင်း) သိရသည်။

စက်တင်ဘာ ၆ ရက်တွင် ဒါလပ်စ်အပြည်ပြည်ဆိုင်ရာလေဆိပ်၌ မျက်နှာကို သိမှတ်နိုင်သည့် နည်းပညာဖြင့် ခရီးသွားများအား စစ်ဆေးနေစဉ် (Photo: AFP)

■ မြန်နှုန်းနှင့် လုံခြုံရေးအတွက် ရည်ရွယ်

ယခုစနစ်သည် ခရီးသည်များ အနေနှင့် နိုင်ငံကူး လက်မှတ်အစစ်အမှန်ကို အသုံးပြုနေခြင်းရှိ၊မရှိနှင့် အချက်အလက်အတုပြုလုပ်ခြင်းရှိ၊ မရှိ သေချာစေပြီး နိုင်ငံခြားသားများ ဝင်လာပါက နိုင်ငံကူးလက်မှတ်ထဲမှ ပုံနှင့် အပြင်ပုံတိုက် စစ်ပေးခြင်းဖြင့် လုံခြုံရေးကို တိုးမြှင့်စေရန် ရည်ရွယ်ထားခြင်းဖြစ်သည်။

ဒါလပ်စ်လေဆိပ်တွင် ထိုစနစ်ကို သြဂုတ်လလယ်ကတည်းက စတင်အသုံးပြုနေခြင်းဖြစ်သည်။ ထိုသို့ စတင်အသုံးပြုပြီး သုံးရက်အတွင်းမှာပင် အမေရိကန်သို့ နိုင်ငံကူးလက်မှတ်အတုဖြင့်ဝင်ရန် ကြိုးပမ်းသော အမျိုးသားတစ်ဦးကို ဖမ်းဆီးမိခဲ့သည်။

ဖြစ်စဉ်မှာ ဘရာဇီး၊ ဆော်ပေါ်လိုမှလာသော အသက် ၂၆ နှစ်အရွယ် အမျိုးသားတစ်ဦးသည် ပြင်သစ်နိုင်ငံကူးလက်မှတ်တစ်ခုဖြင့် ဝင်ရန် ကြိုးပမ်းခဲ့သည်။ သို့သော် မျက်နှာချင်းတိုက်စစ်ပေးသည့်စနစ် ကြောင့် ၎င်းသည် နိုင်ငံကူးလက်မှတ်ထဲမှ ဓာတ်ပုံနှင့် မတူညီမှုကို သိရှိခဲ့ရသည်။ ထို့နောက် ရှာဖွေခဲ့ရာတွင် ၎င်း၏ဖိနပ်ထဲမှ ကွန်ဂိုသမ္မတနိုင်ငံ မှတ်ပုံတင်အစစ်အမှန်ကို တွေ့ရှိခဲ့သည်။

ယခုစနစ်သစ်များသည် လေယာဉ်ပေါ်တက်ရေးနှင့် ဆိုက်ရောက် လုပ်ငန်းစဉ်များအတွက်သာ အသုံး ပြုရန်အတွက်ဖြစ်ပြီး  တရားဥပဒေစိုးမိုးရေးအဖွဲ့အစည်းများအတွက်  အခြားအချက်အလက်များနှင့်ဆက် နွှယ်မှုမရှိကြောင်း ပြောကြားခဲ့သည်။

“ကျွန်တော်တို့ဘက်က ဘယ်လိုအချက်အလက်သစ်ကိုမှ ကောက်ယူ၊ စုဆောင်းတာမျိုး လုပ်မှာမဟုတ်ပါဘူး။ ခရီးသည်ဟာ အစစ်အမှန်ဖြစ်တဲ့အကြောင်းကိုပဲ ကျွန်တော်တို့ က အတည်ပြုလိုတာပါ”ဟု မက်အလီနန်က ပြောကြားခဲ့သည်။

ဒါလပ်စ်လေဆိပ်သည် ဆိုက်ရောက်လုပ်ငန်းစဉ်များတွင် မျက်နှာများကို သိမှတ်နိုင်သော နည်းပညာ များအသုံးပြုရန် ရွေးချယ်ခံထားရသည့် လေဆိပ် ၁၄ ခုထဲမှ တစ်ခုဖြစ်သည်။

မက်အလီနန်၏ပြောကြားချက်အရ ထိုစနစ်သည် နိုင်ငံကူး လက်မှတ်ထဲမှ ဓာတ်ပုံများနှင့် စက်ထဲတွင် ရှိနှင့်ပြီးသား ဓာတ်ပုံများကိုသာ အသုံးပြုခြင်းဖြစ်ပြီး တိကျမှုမှာ ၉၉ ရာခိုင်နှုန်းရှိသည်ဟု သိရသည်။

တက်ကြွ လှုပ်ရှားသူများက ထို စနစ်များ၏ ဒေတာအချက်အလက်များတွင် ကာကွယ်မှု အနည်းငယ် သာရှိသည်ဟု ပြောကြားပြီး တရုတ်နိုင်ငံကို ညွှန်ပြကြသည်။ တရုတ် နိုင်ငံတွင်မူ တရားဥပဒေစိုးမိုးရေး အဖွဲ့များသည် မျက်နှာ သိမှတ်နိုင်သောစနစ်များကို တွင်တွင်ကျယ်ကျယ် အသုံးပြုနေကြသည်။

မျက်နှာများကို သိမှတ်နိုင်သော နည်းပညာများကို စစ်ဆေးမှုများ လုပ်ဆောင်ရန် အသုံးပြုရာမှတစ် ဆင့် စစ်ဘက်ဆိုင်ရာ လုပ်ငန်းများသို့ပါ ဦးတည်သွားနိုင်သည်ဟု လေ့လာသူ ဂျေစတန်လေးက ပြောကြားခဲ့သည်။

“ဒါမျိုးနည်းပညာတွေ လေဆိပ်မှာ စတင်အသုံးပြုရာကနေစပြီး အထက်တန်းကျောင်းတွေ အပါအ ဝင် နေရာအားလုံးကို ပျံ့နှံ့သွားတာတွေကို ကျွန်တော်တို့ မြင်နေရပါတယ်”ဟု စတန်လေက ပြောကြားခဲ့သည်။