ဇူလိုင် ၃၀ ရက်တွင် ပေကျင်းရှိ ဘက်စုံယဉ်ကျေးမှု ပညာရေးဆိုင်ရာ Yiswind အင်စတီကျုတွင် Keeko စက်ရုပ်အား ကလေးများက ကြည့်ရှုနေစဉ် (Photo : AFP)

တရုတ်မူကြိုကလေးများသည် ၎င်းတို့၏ သင်ထောက်ကူအသစ်ကပေးသော ပဟေဠိများကို ဖြေရှင်းရန် ကြိုးပမ်းရင်း တခစ်ခစ် ရယ်မောလျက် ရှိကြသည်။ ထိုသင်ထောက်ကူအသစ် ဆိုသည်မှာ ဖန်သားပြင်မျက်နှာ တစ်ခုနှင့် ပုပုလုံးလုံး ပုံသဏ္ဌာန်ရှိသည့် ဆရာတစ်ဦးပင် ဖြစ်သည်။

စင်တီမီတာ ၆၀ (နှစ်ပေ) ခန့် အမြင့်သာရှိပြီး ကိုယ်တိုင်ရွေ့လျား ပြုမူနိုင်သော ထိုစက်ရုပ်ဆရာ၏ အမည်မှာ ကီကို ဖြစ်သည်။ ပုံပြင်ပြောနိုင်ခြင်း၊ ဆင်ခြေတွေးခေါ်မှုပိုင်းဆိုင်ရာ ပဟေဠိများနှင့် ကလေးများ၏ စွမ်းရည်စမ်းသပ်ခြင်းတို့ လုပ်ဆောင်နိုင်သော ကီကိုသည် မူကြိုကျောင်းအချို့တွင် လူကြိုက်များ ထင်ရှားနေသည်။

ပုလုံးလုံးပုံစံနှင့် ဘီးငယ်များ တပ်ဆင်ထားသော အဆိုပါ အဖြူရောင်စက်ရုပ်ထဲတွင် နဂိုပါဝင်ပြီးသား ကင်မရာများအပြင် ဗီဒီယို မှတ်တမ်းများကို ဖမ်းထားနိုင်ရန် မျက်နှာပြင်နေရာ၌ ကင်မရာတစ်ခု၊ သွားလာမောင်းနှင်ရန် ဆင်ဆာများ ပါဝင်သည်။

တရုတ်နိုင်ငံတွင် ကုန်စုံဆိုင်မှ ပစ္စည်းများကို သယ်ယူပို့ဆောင်ပေးရန်၊ အသက်အရွယ်ကြီးသူများအတွက် အဖော်ပြုပေးရန်၊ ဥပဒေဆိုင်ရာ အကြံဉာဏ်များ ပေးရန်အတွက် စက်ရုပ်များကို တီထွင်ထုတ်လုပ် နေကြသည်။ ယခု စက်ရုပ်ကီကိုအား တီထွင်သူများမှာမူ ၎င်းတို့၏ စက်ရုပ်အား ဆရာအဆင့်ဝင်နိုင်စေရန် မျှော်မှန်းထားကြခြင်း ဖြစ်သည်။ ပေကျင်းမြို့၏ ဆင်ခြေဖုံးဒေသတွင် တည်ရှိသော ဘက်စုံယဉ်ကျေးမှု ပညာရေးဆိုင်ရာ Yiswind အင်စတီကျုတွင် ကီကိုစက်ရုပ်သည် ကလေးများကို ကန္တာရထဲ၌ မင်းသားလေး တစ်ပါးအတွက် လမ်းကြောင်းကို ရှာခိုင်းစေခြင်းဖြင့် ပုံပြင်လည်းပြော ပဟေဠိလည်း ဝှက်လျက်ရှိသည်။ ကလေးများက အဖြေမှန်ပေးတိုင်း စက်ရုပ်သည် ၎င်း၏အသည်းပုံသဏ္ဌာန် မျက်လုံးများကို မှိတ်တုတ်မှိတ်တုတ် လုပ်ပြခြင်းဖြင့် ကျေနပ်ဟန်ပြသည်။

“ယနေ့ခေတ် ပညာရေးဟာ ဆရာတွေက စာသင်ပြီး ကျောင်းသားတွေက သင်ယူတယ်ဆိုတဲ့ တစ်လမ်းသွားပဲ မဟုတ်တော့ဘူး။ လုံးဝိုင်းဝိုင်းပုံစံနဲ့ နှစ်သက်စရာကောင်းတဲ့ ကီကိုကို မြင်လိုက်တဲ့အချိန်မှာ ကလေးတွေကလည်း ချစ်ကြပါတယ်” ဟု ဆရာတစ်ဦးဖြစ်သော ကန်တီရှောင်က ဆိုသည်။ ကန်တီသည် လက်ရှိတွင် ကီကိုစက်ရုပ် ရှာမန်နည်းပညာဌာနတွင် သင်တန်းပေးသူအဖြစ် လုပ်ကိုင်နေသည်။

တရုတ်နိုင်ငံတစ်ဝန်းရှိ မူကြိုကျောင်း ၆၀၀ ကျော်တွင် အသုံးပြုနေပြီဖြစ်သော ကီကိုစက်ရုပ်ကို တရုတ်နိုင်ငံ၏ အခြားနေရာများနှင့် အရှေ့တောင်အာရှဒေသသို့ပါ ချဲ့ထွင်နိုင်ရန် တီထွင်သူများက မျှော်လင့်နေကြသည်။

တရုတ်အစိုးရသည် ၎င်း၏ “Made in China 2025” အစီအစဉ်၏ တစ်စိတ်တစ်ပိုင်းအဖြစ် Artificial intelligence (လူတို့၏ ဉာဏ်ရည်ကို ကွန်ပျူတာဖြင့် စီစဉ်တုပမှု) ပိုင်းတွင် ဖွံ့ဖြိုးရေးအတွက် ငွေအင်အား၊ လူအင်အားစိုက်ထုတ်ကာ ရင်းနှီးမြှုပ်နှံလျက်ရှိသည်။

ယမန်နှစ်ကပင် တရုတ်ကုမ္ပဏီတစ်ခုသည် တရုတ်နိုင်ငံ၏ ပထမဆုံးသော လူနှင့် တူသည့် စက်ရုပ်ကို ထုတ်ပြနိုင်ခဲ့သည်။ ယင်းစက်ရုပ်သည် ရိုးရိုးရှင်းရှင်း အပြန်အလှန် စကားပြောနိုင်စွမ်းရှိပြီး မျက်နှာအ မူအရာများပါ လုပ်နိုင်သည်။  အ ပြည်ပြည်ဆိုင်ရာစက်ရုပ်ဖက်ဒရေး ရှင်းမှ ထုတ်ပြန်ချက်အရ တရုတ်နိုင်ငံသည် စက်မှုလုပ်ငန်းသုံး စက်ရုပ်အများဆုံးရှိသည့် ကမ္ဘာ့ထိပ်တန်း နိုင်ငံတစ်ခု ဖြစ်သည်ဟု သိရသည်။ နိုင်ငံတစ်ဝန်းရှိ စက်ရုံများတွင် စက် ရုပ်ပေါင်း ၃၄၀၀၀၀ သည် ကုန်ထုတ် လုပ်ရေးနှင့် ကားတပ်ဆင်ရေးပိုင်းတွင် လုပ်ကိုင်လျက်ရှိကြသည်။

ပြီးခဲ့သည့် သီတင်းပတ်က ပေကျင်းတွင် ကျင်းပခဲ့သည့် ကမ္ဘာလုံးဆိုင်ရာ စက်ရုပ်ညီလာခံတွင် ရောဂါရှာဖွေနိုင်သော စက်ရုပ်၊ ကြက်တောင်ရိုက်နိုင်သော စက်ရုပ် အစရှိသည်တို့အပြင် ပရိသတ်ကို ဂီတအစွမ်းဖြင့် အံ့အားသင့်စေခဲ့သော စက်ရုပ်များလည်း ပါဝင်ခဲ့သည်။

ယခင်နှစ်ကမူ မြို့တော်ပေကျင်းရှိ ဗုဒ္ဓဘာသာဘုန်းကြီးများ အ ဖွဲ့တစ်ဖွဲ့သည် မန္တန်များကို ရွတ်ဆိုနိုင်ပြီး နိဗ္ဗာန်ရောက်နိုင်ရေး အကြံဉာဏ်များကို ပေးနိုင်သော နှစ်ပေ အမြင့်ရှိ ဘုန်းကြီးစက်ရုပ်ကို တီထွင်နိုင်ခဲ့ကြသည်။ စာသင်ခန်းများတွင် လူသားများ၏ နေရာကို စက်ရုပ်များက အလုံးစုံ အစားထိုးနိုင်ရေးမှာ ရှည်ကြာဦးမည့်ကိစ္စဟု မူကြိုကျောင်းအုပ် ရှီယီက ယုံကြည်နေသည်။ ရှီယီ၏ ကျောင်းတွင်လည်း ကီကို စက်ရုပ်ကို စမ်းသပ်အသုံးပြုလျက်ရှိသည်။

“စာသင်ကြားဖို့အတွက် သင့်မှာလူသားရဲ့ အထိအတွေ့၊ မျက်လုံးချင်းဆုံမှုနဲ့ မျက်နှာအမူအရာတွေ ရှိရပါမယ်။ ဒါတွေဟာ ပညာရေးကို ပြုလုပ်ဖန်တီးပေးတဲ့ အရာတွေပါ။ ဘာသာစကား ဒါမှမဟုတ် အကြောင်းအရာ သက်သက်ချည်းပဲ မဟုတ်ပါဘူး။ စာသင်တာဟာ အရာအားလုံး ပါဝင်ပါတယ်” ဟု ရှီယီက ပြောကြားခဲ့သည်။

ယွမ် ၁၀၀၀၀ (ဒေါ်လာ ၁၅၀၀) ကျသင့်သော ကီကိုစက်ရုပ်သည် မူကြိုဆရာမတစ်ဦး၏ လစဉ်လုပ်အားခနှင့် ညီမျှသော်လည်း အသွေးအသားနှင့် တည်ဆောက်ထားသော ဆရာတစ်ဦးထက် အားသာသည့် အချက်များလည်း ရှိနေနိုင်သည်။

“စက်ရုပ်တွေရဲ့ အားအသာဆုံးအပိုင်း ဟုတ်လား။ သူတို့ဟာ (လူသားတွေထက်) ပိုပြီး တစ်သမတ်တည်း ရှိတာပဲ ဖြစ်ပါတယ်” ဟု ကန်တီက ရယ်မောရင်း ပြောကြားခဲ့သည်။

Ref : AFP