အင်အားပြင်း တိုင်ဖွန်းဟာတိုနှင့်ပတ်သက်ပြီး မကာအိုမိုးလေဝသဌာန၏ ကိုင်တွယ်မှုအား မကာအိုခြစားမှုစုံစမ်းရေးအဖွဲ့က စတင်စုံစမ်း စစ်ဆေးနေပြီဟု သိရသည်။
အပျက်အစီးများစွာ ဖြစ်စေခဲ့ပြီး လူ ၁၀ ဦးကို သေဆုံးစေခဲ့သော တိုင်ဖွန်းဟာတိုကြောင့် မကာအိုမိုးလေဝသဌာန အကြီးအကဲ ရာထူးမှ နုတ်ထွက်သွားခဲ့ပြီး မြို့၏အကြီးအကဲက တောင်းပန်စာတစ်စောင် ထုတ်ခဲ့ရသည်။
မြို့ထဲ၌ ကယ်ဆယ်ရေးလုပ်ငန်းများကို ကူညီပေးရန်အတွက် ပြည်သူ့လွတ်မြောက် တပ်မတော်၏ မကာအို မြို့စောင့်တပ်မှ တပ်ဖြန့်မှုများ ပြုလုပ်ခဲ့ရသည်။
တိုင်ဖွန်းဟာတိုနှင့်ပတ်သက်၍ သတိပေးချက် ထုတ်ပြန်ရန် နှောင့်နှေးခဲ့ရသည့် အဓိကအကြောင်းရင်းထဲတွင် မကာအို လောင်းကစားလုပ်ငန်း ပါဝင်နေသည်ဟု ခြစားမှုဆန့်ကျင်ရေး ကော်မရှင်သို့ သြဂုတ် ၂၈ ရက်က တိုင်ကြားစာများ ရောက်ရှိခဲ့သည်။
ဟာတိုသည် ၅၃ နှစ် အတွင်း မကာအိုရင်ဆိုင်ခဲ့ရသည့် အပြင်းထန်ဆုံးမုန်တိုင်း ဖြစ်သည်။
“မုန်တိုင်းသတိပေးချက် ထုတ်ပြန်ဖို့ ဆုံးဖြတ်တဲ့နေရာမှာ ကာစီနိုလုပ်ငန်းတွေ ပါနေတယ်ဆိုတာ သံသယဖြစ်စရာ မရှိပါဘူး။ အဆင့်ရှစ် မုန်တိုင်း သတိပေးချက်ထုတ်လိုက်ရင် ကာစီနိုတွေဟာ ဝန်ထမ်းတွေကို အချိန်ပိုကြေး ပေးရမှာပါ” ဟု အမည်မဖော်သူ တစ်ဦးက ဆိုသည်။