Photo : AFP

အခါအားလျော်စွာ ဘီယာနှင့် ဝိုင်တစ်ခွက် သောက်လေ့ရှိခြင်းသည်ပင် ကျန်းမာရေး ပြဿနာများနှင့် သေဆုံးနိုင်ခြေကို မြင့်တက်စေနိုင်သည်ဟု အရက်သောက်သုံးခြင်းနှင့် ပတ်သက်သည့် လေ့လာမှုကြီး တစ်ရပ်တွင် ဖော်ပြခဲ့သည်။

“အရက်သောက်သုံးမှုမှာ ဘေးကင်းတယ်ဆိုတဲ့ ပမာဏ မရှိပါဘူး” ဟု ဆီယက်တဲရှိ Health Metrics and Evaluation အင်စတီကျုမှ သုတေသီ တစ်ဦးဖြစ်သော မက်စ်ဂရစ်စ်ဝိုးက ပြောကြားခဲ့သည်။ ၎င်းသည် ကျွမ်းကျင်သူ ၅၀၀ ကျော် ပါဝင်သော အကျိုးတူ အဖွဲ့စည်းတစ်ခုမှ ခေါင်းဆောင်လည်းဖြစ်သည်။

မကြာသေးမီက ထွက်ရှိလာခဲ့သည့် အခြားသုတေသန ပြုချက်များတွင်မူ အရက်ကို အနည်းငယ်မှ အသင့်အတင့်အထိ သောက်သုံးခြင်းသည် နှလုံးရောဂါဖြစ်ပွားမှုကို လျော့ကျစေနိုင်သည်ဟု ဖော်ပြခဲ့ကြသည်။ သို့သော် ယခုလေ့လာမှု အသစ်ထဲ၌ ယင်းကဲ့သို့ အယ်ကိုဟော သောက်သုံးမှုကို မလုပ်ဆောင်လျှင် ပိုမိုကောင်းမွန်သည်ဟု ဖော်ပြခဲ့သည်။

“အရက်ရဲ့ ကောင်းကျိုးတွေကို ဆိုးကျိုးက ခုနှိမ်နိုင်ပါတယ်။ ခြုံကြည့်ရင် နေ့စဉ်သောက်သုံးတဲ့ အရက်ပမာဏကိုလိုက်ပြီး ကျန်းမာရေးအန္တရာယ် အနည်းအများဟာ ဆက်နွှယ်နေပါတယ်” ဟု မက်စ်ဂရစ်စ်ဝိုးက ပြောကြားခဲ့သည်။

အရက်သောက်ခြင်းကို လုံးဝရှောင်ကြဉ်သူနှင့် ပုံမှန်သောက်သုံးသူတို့ကို နှိုင်းယှဉ်မည်ဆိုပါက ထိုပုံမှန် သောက်သုံးသူတွင် ကျန်းမာရေး ပြဿနာ တစ်ဒါဇင် သို့မဟုတ် နှစ်ဒါဇင်ထက်မနည်း ဖြစ်နိုင်ခြေသည် ၀ ဒသမ ၅ ရာခိုင်နှုန်းခန့် မြင့်တက်နေသည်ဟု သုတေသီများက ယခုလေ့လာချက်ထဲတွင် ဖော်ပြထားသည်။ ပုံမှန်သောက်သုံးသူ ဆိုသည်မှာ တစ်နေ့လျှင် ဘီယာခွက်ငယ်တစ်ခွက်၊ ဝိုင်တစ်ခွက်၊ အရက် ၁၀ ဂရမ် သောက်သုံးသည့် ပမာဏကို ဆိုလိုခြင်းဖြစ်သည်။

လုံးဝမသောက်ခြင်းသည် အကောင်းဆုံး

ပျမ်းမျှ နေ့စဉ် နှစ်ခွက် သောက်သုံးသူများသည် လုံးဝမသောက်သူများထက် ရောဂါနှင့် ထိခိုက်ဒဏ်ရာ ရနိုင်ခြေမှာ ၇ ရာခိုင်နှုန်း မြင့်တက်နေသည်။ နေ့စဉ် ငါးခွက်သောက်သုံးသူများ အတွက်မူ ပြင်းထန်သော အကျိုးဆက်များနှင့် ကြုံတွေ့နိုင်ခြေသည် ၃၇ ရာခိုင်နှုန်း ခုန်တက်လာမည်ဖြစ်သည်။

‘အရက်သောက်သုံးမှု နည်းလေ၊ ကောင်းလေ၊ မသောက်ခြင်းသည် အကောင်းဆုံး’ ဆိုသည်မှာ ကမ္ဘာ့ကျန်းမာရေးအဖွဲ့ (WHO) ၏ ကာလရှည်ကြာ ရပ်တည်ချက်ဖြစ်သည်။ သို့သော် ယင်းရပ်တည်ချက်သည် နိုင်ငံအများအပြား၏ စံနှုန်းများ၊ အထူးသဖြင့် ဖွံ့ဖြိုးပြီး နိုင်ငံများ၏ စံနှုန်းများနှင့် ကွာဟလျက်ရှိသည်။

ဥပမာအားဖြင့် ဗြိတိန်၏ ကျန်းမာရေးအာဏာပိုင်များက အရက်ကြောင့်ဖြစ်လာမည့် ကျန်းမာရေး အန္တရာယ်များကို လျှော့ချရန်အတွက် သီတင်းတစ်ပတ်လျှင် ၁၄ ခွက်ထက် ပိုမသောက်ရန် အကြံပေးထားသည်။

“တွေ့ရှိချက်အသစ်တွေနဲ့ စံနှုန်းအသစ် ပြင်ဆင်မှု၊ ထပ်ဖြည့်မှုတွေကြားမှာ ကွာဟချက်ဆိုတာ အမြဲလိုလို ရှိမှာပါပဲ။ အဲဒီတွေ့ရှိချက်တွေကို ကျွန်မအပါအဝင် ကမ္ဘာတစ်ဝန်းက အရက်သောက်တဲ့သူ ၂ ဒသ မ ၄ ဘီလျံဟာ အရေးတယူလုပ်ဖို့ပဲ လိုပါတယ်” ဟု ဝါရှင်တန်တက္ကသိုလ်မှ ပါမောက္ခတစ်ဦးဖြစ်ပြီး ယခုလေ့လာမှုထဲတွင် ပါဝင်သော ပါမောက္ခအီမန်နျူလာဂါကီဒိုက ဆိုသည်။ ၎င်းကိုယ်တိုင်လည်း အသင့်အတင့် သောက်တတ်သူ တစ်ဦးဖြစ်ကြောင်း ဝန်ခံထားသည်။

၂၀၁၆ ခုနှစ်အတွင်းက အချိန်မတိုင်မီ သေဆုံးမှု၊ ရောဂါရမှုများ၏ အကြောင်းရင်းများထဲတွင် အရက်သောက်သုံးမှုက နံပါတ်ခုနစ်နေရာတွင် ပါဝင်သည်။ ထိပ်တန်းအကြောင်းရင်း ခြောက်ချက်မှာမူ သွေးတိုးခြင်း၊ ဆေးလိပ်သောက်သုံးခြင်း၊ ပေါင်ချိန်မပြည့်ဘဲ မွေးဖွားခြင်း၊ အချိန်မတိုင်မီ ကလေးမွေးဖွားခြင်း၊ ဆီးချို၊ အဝလွန်ခြင်းနှင့် လေထုညစ်ညမ်းခြင်းတို့ ဖြစ်ကြသည်။

သို့သော် အသက် ၁၅ နှစ်မှ အ သက် ၄၉ နှစ်အရွယ် အပိုင်းအခြားအတွက် ကြည့်ပါက အရက်သောက် သုံးခြင်းသည် သေဆုံးနိုင်ခြေ အများဆုံး အကြောင်းတစ်ရပ်ဖြစ်နေပြီး အမျိုးသားများ သေဆုံးမှု၏ ၁၂ ရာ ခိုင်နှုန်းကျော်နှင့် သက်ဆိုင်နေသည်ဟု ယခုလေ့လာမှုထဲတွင် ဖော်ပြခဲ့သည်။

အသက် ၁၅ မှ ၄၉ နှစ်အပိုင်း အခြားအတွင်း အရက်နှင့် ဆက်နွှယ်၍ သေဆုံးရသူများ၏ အဓိက အကြောင်းရင်းများသည် တီဘီ၊ လမ်းမတော်တဆမှု၊ မိမိကိုယ်ကိုယ် အန္တရာယ်ဖြစ်စေမှု (အဓိကအားဖြင့် မိမိကိုယ်ကိုယ် အဆုံးစီရင်မှု) များဖြစ်ကြသည်။

ယခုလေ့လာမှုထဲတွင် မပါဝင်သည့် King’s College London မှ ပါမောက္ခတစ်ဦးဖြစ်သော ရောဘင်ဘာတွန်ကမူ အဆိုပါ လေ့လာမှုအား ကမ္ဘာလုံးဆိုင်ရာ အရက်သောက်သုံးမှုနှင့် ပတ်သက်သည့် ဝန်ထုပ်ဝန်ပိုးကြီးအား အပြည့်စုံဆုံး ဖော်ပြထားသည်ဟု ဆိုသည်။

၂၀၁၆ ခုနှစ်အတွင်းက အမျိုးသားများထဲတွင် အရက်သောက်သုံးမှု အလေ့အကျင့် အပျံ့နှံ့ဆုံးနိုင်ငံမှာ ဒိန်းမတ်နိုင်ငံ (၉၇ ရာခိုင် နှုန်း)၊ နော်ဝေ၊ အာဂျင်တီးနား၊ ဂျာ မနီ၊ ပိုလန် (၉၄ ရာခိုင်နှုန်း) တို့ဖြစ်ကြသည်။

အာရှတွင် တောင်ကိုရီးယား အမျိုးသားများက ဦးဆောင်နေကာ ၉၁ ရာခိုင်နှုန်းရှိကြောင်း သိရသည်။

အမျိုးသမီးများထဲတွင်လည်း ဒိန်းမတ်နိုင်ငံကပင် ဦးဆောင်ကာ ၉၇ ရာခိုင်နှုန်းရှိသည်။ ယင်းနောက်တွင် နော်ေ၀ (၉၁ ရာခိုင်နှုန်း)၊ ဂျာမနီနှင့် အာဂျင်တီးနား (ရာခိုင်နှုန်း ၉၀)၊ နယူးဇီလန် (၈၉ ရာခိုင်နှုန်း ဖြစ်ကြသည်။

သို့သော် အရက်အသောက် အနိုင်ဆုံးသူများ အမျိုးသားများမှာမူ ရိုမေးနီးယား၊ ပေါ်တူဂီ၊ လူဇင်ဘတ်၊ လစ်သူရေးနီးယား၊ ယူကရိန်းနိုင်ငံတို့မှ ဖြစ်ကြသည်။ အမျိုးသမီးများတွင်မူ ယူကရိန်း၊ အင်ဒိုရာ၊ လူဇင်ဘတ်၊ ဘီလာရုစ်၊ ဆွီဒင်၊ ဒိန်းမတ်၊ အိုင်ယာလန်နှင့် ဗြိတိန်တို့ ဖြစ်ကြသည်။ အရက်သောက်သုံးမှု အနည်းဆုံး နိုင်ငံများမှာမူ မွတ်စလင်အများစု နေထိုင်သည့် နိုင်ငံများမှ ဖြစ်ကြကြောင်း သိရသည်။

Ref : AFP