အမေရိကန်နှင့် တရုတ်တို့ စည်းကြပ်ခွန်များ အပြန်အလှန်ထပ်မံပြဋ္ဌာန်း

အမေရိကန်နှင့် တရုတ်တို့ စည်းကြပ်ခွန်များ အပြန်အလှန်ထပ်မံပြဋ္ဌာန်း
Published 24 August 2018

၂၀၁၇ ခုနှစ် ဇူလိုင် ၁၃ ရက်တွင် တရုတ်အရှေ့ပိုင်း ရှန်တုံပြည်နယ်၌ ဆိပ်ကမ်းတစ်ခုကို ရိုက်ကူးထားသော ဓာတ်ပုံ (Photo : AP)

ဒေါ်လာ ၁၆ ဘီလျံ တန်ဖိုးရှိသော တရုတ်ကုန်ပစ္စည်းများကို သြဂုတ် ၂၃ ရက်တွင် အမေရိကန်က စည်းကြပ်ခွန်များ ထပ်မံပြဋ္ဌာန်းခဲ့ပြီး တရုတ်ကလည်း လက်တုံ့ပြန်သည့် အနေဖြင့် စည်းကြပ်ခွန်များ ပြန်လည် ပြဋ္ဌာန်းခဲ့သည်။

အမေရိကန်နှင့် တရုတ်တို့သည် ကုန်သွယ်ရေး တင်းမာမှုများ လျော့ကျစေရန် စေ့စပ်ညှိနှိုင်း နေကြသော်လည်း အမေရိကန်သမ္မတ ဒေါ်နယ်ထရန့်က ဒေါ်လာ ၅၀ ဘီလျံ ဖိုးအထိ တရုတ်ကုန်ပစ္စည်းများကို စည်းကြပ်ခွန်များ ပြဋ္ဌာန်းမည်ဟု ကြေညာထားမှုကို အပြည့်အ၀ အကောင်အထည် ဖော်ခဲ့ခြင်းဖြစ်သည်။

စည်းကြပ်ခွန်များ ပြဋ္ဌာန်းမှုကို တရုတ်က ပြင်းပြင်းထန်ထန် ဆန့်ကျင်ကြောင်း၊ သို့သော်လည်း လိုအပ်သော တန်ပြန် ပြဋ္ဌာန်းမှု ဆောင်ရွက်ရန်မှတစ်ပါး ရွေးချယ်ရန်မရှိကြောင်း တရုတ်ကူးသန်း ရောင်းဝယ်ရေး ဝန်ကြီးဌာနက ကြေညာချက် ထုတ်ပြန်ခဲ့သည်။

ဟာလေဒေးဗစ်ဆင်ဆိုင်ကယ်၊ ကုန်တင်ကားများနှင့် ကျောက်ဂွမ်းတို့ အပါအဝင် ညီတူညီမျှ တန်ဖိုးရှိသော အမေရိကန်၏ အဓိက ထုတ်ကုန်များကို အခွန်ပြဋ္ဌာန်းမှု ဆောင်ရွက်မည်ဟု ကြေညာထားသည်။

အမေရိကန်၏ စည်းကြပ်ခွန် ပြဋ္ဌာန်းမှုများသည် ကမ္ဘာ့ကုန်သွယ်ရေးအဖွဲ့၏ စည်းမျဉ်းများကို ချိုးဖောက်ခြင်း ဖြစ်ကြောင်း၊ ထိုအတွက် တိုင်ကြားမှု ဆောင်ရွက်သွားမည်ဖြစ်ကြောင်း တရုတ်ကူးသန်းရောင်းဝယ်ရေး ဝန်ကြီးဌာနက ဆိုသည်။

ကမ္ဘာ့အကြီးဆုံး စီးပွားရေးအင်အားကြီး နှစ်နိုင်ငံကြား ဇွန်လနောက်ပိုင်း ပထမဆုံးအကြိမ် တရားဝင် ဆွေးနွေးမှုများ ဆောင်ရွက်နေစဉ် တင်းမာမှုများ ထပ်မံမြင့်တက် ခဲ့ခြင်းဖြစ်သည်။ ကြီးမားကျယ်ပြန့်သော အငြင်းပွားမှုသည် ဆန့်ကျင်ဘက် သက်ရောက်မှုများ ဖြစ်လာနိုင်ဖွယ်ရှိကြောင်း၊ စီးပွားရေးကို ယုံကြည်မှု၊ ရင်းနှီးမြှုပ်နှံမှုဆိုင်ရာ သုံးစွဲမှုနှင့် အလုပ်အကိုင်တို့ကို ထိခိုက်စေနိုင်ကြောင်း အမေရိကန်ဗဟိုဘဏ် တာဝန်ရှိသူများက မူဝါဒရေးရာ အစည်းအဝေးတွင် သတိပေးခဲ့သည်။

ဒေါ်လာ ၂၀၀ ဘီလျံ တန်ဖိုးရှိသော တရုတ်ကုန်ပစ္စည်းများကို စည်းကြပ်ခွန်သစ်များ ထပ်မံပြဋ္ဌာန်းရန် ထရန့်က ခြိမ်းခြောက်ထားပြီး အမေရိကန် ကားလုပ်ငန်းကို ကာကွယ်ရန်အတွက် ကားလုပ်ငန်းဆိုင်ရာ သွင်းကုန်အားလုံးကို ၂၅ ရာခိုင်နှုန်းအထိ အခွန်ကောက်ခံရန် ထရန့်က အကြံပြုထားသည်။

တရုတ်ကလည်း ဒေါ်လာ ၆၀ ဘီလျံဖိုးအထိ အမေရိကန် ကုန်ပစ္စည်းများကို စည်းကြပ်ခွန်များ ထပ်မံပြဋ္ဌာန်းရန် ခြိမ်းခြောက်ထားသည်။ တောင်ကိုရီးယား၊ ဂျပန်တို့နှင့် ယခင်က အငြင်းပွားမှုများတွင် တရုတ်က ဆောင်ရွက်ချက်များအတိုင်း အမေရိကန် ကော်ပိုရေးရှင်းများ၏ တရုတ်လုပ်ငန်းများအား ပစ်မှတ်ထား၍ စစ်ဆေးရန်နှင့် သပိတ်မှောက်ရန် တို့ကိုလည်း တရုတ်ဘက်မှ ဆောင်ရွက်လာနိုင်သည်။

Ref : AFP

Most Read

Most Recent