လစ်ဗျားပဋိပက္ခကြောင့် လူမှောင်ခိုကူးမှု တိုက်ဖျက်ရေး ကြိုးပမ်းမှုများကို ထိခိုက်ဟု ဆူဒန်သမ္မတဘာရှား ပြောကြား

လစ်ဗျားပဋိပက္ခကြောင့် လူမှောင်ခိုကူးမှု တိုက်ဖျက်ရေး ကြိုးပမ်းမှုများကို ထိခိုက်ဟု ဆူဒန်သမ္မတဘာရှား ပြောကြား
Published 29 August 2017

သြဂုတ် ၂၇ ရက်က လစ်ဗျားကမ်းရိုးတန်းမြောက်ဘက် ရေမိုင် ၂၅ မိုင်ခန့်အကွာတွင် ကယ်ဆယ်ရေး လုပ်ဆောင်နေမှုကို တွေ့ရစဉ် (Photo: AP)

အိမ်နီးချင်းလစ်ဗျားတွင် ပြည်တွင်း ပဋိပက္ခဖြစ်ပွားနေမှုက ဆူဒန်ကို သက်ရောက်မှုရှိပြီး လူမှောင်ခိုကူးသူများသည် နယ်စပ်ဖြတ်ကျော် ရာဇဝတ်မှုများ ကျူးလွန်ရန်အတွက် အရှေ့အာဖရိကနိုင်ငံ လစ်ဗျား၏ နယ်မြေများကို အသုံးပြုနေကြကြောင်း ဆူဒန်သမ္မတ အိုမာအယ်လ်ဘာရှားက သြဂုတ် ၂၇ ရက်တွင် ပြောကြားခဲ့သည်။

ကုလသမဂ္ဂက ကျောထောက်နောက်ခံပေးထားသော လစ်ဗျားအစိုးရအဖွဲ့ဝန်ကြီးချုပ် ဖာရက်အယ်ဆာရက်နှင့် ပူးတွဲသတင်းစာရှင်းလင်းပွဲတွင် ဘာရှားက လစ်ဗျားရှိ လုံခြုံရေးပြဿနာများသည် ဆူဒန်အစိုးရ၏ လူကုန်ကူးမှု တိုက်ဖျက်ရေး ကြိုးပမ်းမှုများကို ပို၍ခက်ခဲစေကြောင်း ပြောကြားခဲ့သည်။

အာဖရိကဦးချိုဒေသမှ တရားမဝင် ရွှေ့ပြောင်းအခြေချ ထောင်ပေါင်းများစွာသည် ဆူဒန်ကိုဖြတ်ကျော်ကာ လစ်ဗျားသို့ ဝင်ရောက်ပြီး မြေထဲပင်လယ်ကိုဖြတ်၍ ဥရောပသို့ ဦးတည်လေ့ရှိသည်။ မကြာသေးခင်နှစ်များအတွင်း ဥရောပနှင့် အာဖရိကအာဏာပိုင်များသည် တရားမဝင်ရွှေ့ပြောင်း အခြေချမှုနှင့် လူမှောင်ခိုကူးမှုကို တိုက်ဖျက်ရန် ဆူဒန်အစိုးရကို ဖိအားပေးခဲ့ကြသည်။

ဆူဒန်အစိုးရသည် ထရီပိုလီအခြေစိုက် လစ်ဗျားအစိုးရအဖွဲ့ကို အသိအမှတ်ပြုထားသည်။ လစ်ဗျားစင်ပြိုင်အစိုးရအဖွဲ့ခေါင်းဆောင် ခါလီဖာဟာဖတာသည် ဆူဒန်၏ ဒါဖာဒေသမှ သူပုန်တို့ကို လစ်ဗျားတွင် ကြေးစားများအဖြစ် လက်ခံအသုံးပြုနေကြောင်း ဆူဒန်က စွပ်စွဲထားသည်။

လစ်ဗျားရှိ လုံခြုံရေးအခြေအနေကို ဘာရှားနှင့် ဆွေးနွေးခဲ့ကြပြီး နယ်စပ်လုံခြုံရေးအတွက် တိုင်ပင်ခဲ့ကြကြောင်း ဆူဒန်သို့ ရောက်ရှိနေသည့် အယ်ဆာရက်က ပြောကြားခဲ့သည်။

၂၀၁၁ ခုနှစ်တွင် နေတိုးက ကျောထောက်နောက်ခံပေးသော တော်လှန်မှု၌ အာဏာရှင် မွမ်မာကဒါဖီသေဆုံးခဲ့ပြီးနောက် လစ်ဗျားသည် ဖရိုဖရဲဖြစ်နေခဲ့သည်။ စင်ပြိုင် အစိုးရအဖွဲ့နှစ်ဖွဲ့နှင့် ပြည်သူ့စစ်အဖွဲ့ ဒါဇင်များစွာက အာဏာလုနေကြပြီး ဂျီဟတ်များ၊ လက်နက်မှောင်ခိုကူးသူများနှင့် လူမှောင်ခိုကူးသူများက လစ်ဗျားတွင် ခြေကုပ်ရနေကြသည်။

Ref: AFP

Most Recent