သြဂုတ် ၂၁ ရက်တွင် KCNA က ထုတ်ပြန်ခဲ့သည့်ဓာတ်ပုံ၌ Myohyansan ဆေးဘက်အသုံးအဆောင် ထုတ်လုပ်သည့်စက်ရုံအား စစ်ဆေးနေသည့် ကင်ဂျုံအွန်အား တွေ့ရစဉ် (Photo - AFP)

မြောက်ကိုရီးယားခေါင်းဆောင် ကင်ဂျုံအွန်က နိုင်ငံ၏ ကျန်းမာရေးဝန်ဆောင်မှုများအား ရှုတ်ချခဲ့ပြီး တာဝန်ရှိသူများသည်  တက်ကြွမှုကင်းမဲ့ပြီး တာဝန်လည်းမခံကြကြောင်း ဝေဖန်ခဲ့သည်ဟု အစိုးရမီဒီယာက သြဂုတ် ၂၁ ရက်တွင် ဖော်ပြခဲ့သည်။

နျူကလီးယားလက်နက်များအား ရရှိရန် ကြိုးပမ်းမှုများကြောင့် ကုလသမဂ္ဂလုံခြုံရေးကောင်စီ၏ ပိတ်ဆို့အရေးယူမှုများစွာ ချမှတ်ခံထားရသည့် ဆင်းရဲနိမ့်ကျပြီး အထီးကျန်သော မြောက်ကိုရီးယားတွင် စားနပ်ရိက္ခာအလွန်အမင်း ရှားပါးမှုနှင့် ကျန်းမာရေးစောင့်ရှောက်မှုစနစ် ဆိုးရွားမှု၏ဒဏ်ကို ခံစားနေရကြောင်း အပြည်ပြည်ဆိုင်ရာ အကူအညီပေးရေးအေဂျင်စီများက ပြောကြားခဲ့သည်။ ဆေးရုံများတွင် ဆေးဝါး၊ ကိရိယာ နှင့် လေ့ကျင့်ပေးထားသောဝန်ထမ်းများလည်း ကင်းမဲ့နေဟု ၎င်းတို့က ဆိုသည်။

ပြည်သူများအား ပိုမိုကောင်းမွန်သော ဘဝရရှိစေရန်အတွက် ထောက်ပံ့ပေးရန် ဆန္ဒရှိကြောင်း မြောက်ကိုရီးယားအစိုးရက ပုံမှန်ထုတ်ပြန်လေ့ရှိချိန်တွင် ကင်က ဆေးဘက်ဆိုင်ရာ အသုံးအဆောင်များ ထုတ်လုပ်သည့် စက်ရုံတစ်ရုံသို့ သွားရောက်စဉ် ကျန်းမာရေး စောင့်ရှောက်မှုစနစ်ကို ပြင်းပြင်းထန်ထန် အပြစ်တင်ခဲ့ခြင်း ဖြစ်သည်။

မကြာသေးမီနှစ်များအတွင်း ကဏ္ဍအချို့၌ တစ်ဟုန်ထိုး တိုးတက်မှုများရှိခဲ့သော်လည်း ပြည်သူ့ကျန်းမာရေးစောင့်ရှောက်မှု ကဏ္ဍတွင်မူ တိုးတက်မှုလုံးဝမရှိခဲ့ဘဲ ပို၍ပို၍ တုံ့ဆိုင်းနေခဲ့ကြောင်း Myohyansan ဆေးဘက်အသုံးအဆောင်များ ထုတ်လုပ်သည့် စက်ရုံသို့ သွားရောက်စဉ် ကင်ဂျုံအွန်က အပြစ်တင်ခဲ့သည်ဟု အစိုးရသတင်းအေဂျင်စီ KCNA က ဖော်ပြခဲ့သည်။

မြောက်ကိုရီးယားတွင် ခေါင်းဆောင်များ၏ ယင်းကဲ့သို့ လမ်းညွှန်မှာကြားခရီးစဉ်များအား အစိုးရမီဒီယာများတွင် ပုံမှန်ဖော်ပြလေ့ရှိပြီး အာဏာပိုင်များက ပြည်သူများအား သတင်းစကားပေးသည့် အဓိကအစိတ်အပိုင်း ဖြစ်သည်။ ကျန်းမာရေးစောင့်ရှောက် မှုစနစ်တိုးတက်စေရန် လိုအပ်ကြောင်း အာဏာရအလုပ်သမားပါတီက အလေးပေး ပြောကြားခဲ့သော်လည်း တာဝန်ရှိသူများသည် ပျင်းရိလေးတွဲ့ပြီး တာဝန်ယူမှုမရှိကြကြောင်း ကင်က ပြောကြားခဲ့သည်။

ကိုရီးယားဘာသာဖြင့် ထုတ်ပြန်မှုတွင် ကင်က ထိုတာဝန်ရှိသူများသည် အချိန်အကြာကြီး နှေးကွေးလေးကန်နေမှုအတွက် ဒေါသတကြီး ဝေဖန်ခဲ့ကြောင်း ဖော်ပြခဲ့သည်။ တိရစ္ဆာန်များသည် တစ်နှစ်လျှင် တစ်ကြိမ်သာ ဆောင်းခိုကြသော်လည်း ကျန်းမာရေးကဏ္ဍတွင်မူ နှစ်ပေါင်းများစွာ မလှုပ်မယှက်နေခဲ့ကြပြီး အနှစ်မဲ့သော ကြွေးကြော်သံများ ဟစ်ကြွေးခဲ့ကြကြောင်း ကင်က အပြစ်တင်ခဲ့သည်။

ပြီးခဲ့သောဇွန်တွင် စင်ကာပူ၌ အမေရိကန်သမ္မတ ဒေါ်နယ်ထရန့်နှင့် သမိုင်းဝင်ထိပ်သီး ကျင်းပခဲ့ပြီးနောက်ပိုင်း ကင်က စီးပွားရေးတိုးတက်ရေးကို အာရုံစိုက်ခဲ့ပြီး နိုင်ငံတစ်ဝန်းရှိ စက်မှုဇုန်များနှင့် စက်ရုံများသို့ သွားရောက်ကြည့်ရှုခဲ့သည်။ မြောက်ကိုရီးယားက ၎င်းအား ချမှတ်ထားသော ပိတ်ဆို့အရေးယူမှုများကို ဖယ်ရှားပေးရန် တောင်းဆိုခဲ့သော်လည်း အမေရိကန်က နျူကလီးယားဖျက်သိမ်းမှု မပြီးစီးသရွေ့ ပိတ်ဆို့အရေးယူမှုများ ဆက်လက်ထားရှိရန် နိုင်ငံတကာကို တိုက်တွန်းထားသည်။

Ref ; AFP