မလေးရှားဝန်ကြီးချုပ် မဟာသီယာ ဧရာမစီမံကိန်းကြီးများအား အာရုံစိုက်မည့် တရုတ်ခရီးစဉ် ထွက်ခွာ

မလေးရှားဝန်ကြီးချုပ် မဟာသီယာ ဧရာမစီမံကိန်းကြီးများအား အာရုံစိုက်မည့် တရုတ်ခရီးစဉ် ထွက်ခွာ
Published 18 August 2018

သြဂုတ် ၁၃ ရက်က ပူထရာဂျာယာရှိ ဝန်ကြီးချုပ်ရုံးတွင် သတင်းစာရှင်းလင်းပွဲ၌ ဝန်ကြီးချုပ် မဟာသီယာက စကားပြောနေစဉ် (Photo - AFP)

အကျင့်ပျက်ခြစားမှု အရှုပ်တော်ပုံ ဝိုင်း ရံနေသော ဝန်ကြီးချုပ်ဟောင်း နာဂျစ်ရာဇက်လက်ထက် လက်မှတ်ရေးထိုးခဲ့သည့် တရုတ်အထောက်အပံ့ယူ စီမံကိန်းကြီးများအား ပြန်လည်ညှိနှိုင်းရန် သို့မဟုတ် ဖျက်သိမ်းရန်အထိပင် ကြိုးပမ်းနိုင်သည့် ခရီးစဉ်အဖြစ် မလေးရှားဝန်ကြီးချုပ်သစ်မဟာသီယာမိုဟာမက်က သြဂုတ် ၁၆ ရက်တွင် တရုတ်သို့ စတင်ထွက်ခွာခဲ့သည်။

ပြီးခဲ့သော မေတွင် အံ့အားသင့်ဖွယ် ရွေးကောက်ပွဲ အနိုင်ရခဲ့ပြီး ဝန်ကြီးချုပ်အဖြစ် တစ်ကျော့ပြန်ဖြစ်လာခဲ့သည့် အသက် ၉၃ နှစ်ရှိပြီဖြစ်သော မဟာသီယာသည် ဖြုတ်ချခံ နာဂျစ်အစိုးရက တရုတ်အစိုးရပိုင်ကုမ္ပဏီများနှင့် လက်မှတ်ထိုးခဲ့သော သဘောတူညီချက်များစွာအား ဆန့်ကျင်ပယ်ဖျက်ရန် ကြိုးပမ်းနေသည်။ အဓိက ရထားလမ်းတစ်ခုအပါအဝင် ဒေါ်လာ ၂၂ ဘီလျံကျော် တန်ဖိုးရှိသော တရုတ်အထောက် အပံ့ခံစီမံကိန်းများအား မလေးရှားအစိုးရသစ်က ဆိုင်းငံ့ထားသည်။ ထိုသဘောတူညီချက်များအနက် အချို့သည် တရားမျှတမှု မရှိဘဲ ရယူထားသည်ဟု မဟာသီယာက ရှုမြင်နေသည်။ ၎င်း၏ ငါးရက်ကြာခရီးစဉ်အတွင်း ထိုကိစ္စကို ဆွေးနွေးသွားမည်ဟု မဟာသီယာက ကတိပြုထားသည်။

သူ၏ ကိုးနှစ်ကြာ အုပ်ချုပ်မှုအတွင်း နာဂျစ်သည် ၎င်းထူထောင်ခဲ့သော အစိုးရ ရင်းနှီးမြှုပ်နှံမှုလုပ်ငန်း 1 MDB နှင့် ဆက်နွှယ်သည့် အကြွေးများအား ဆပ်နိုင်ရန်အတွက် အကူအညီရစေရန် အပြန်အလှန်အားဖြင့် ပေကျင်းနှင့် သဘောတူညီချက်အများ အပြားကို အလျင်အမြန် ချုပ်ဆိုခဲ့သည်ဟု စွပ်စွဲခံထားရသည်။ ယခင်အစိုးရက ချုပ်ဆိုခဲ့သော သဘောတူညီချက်များအား ပြန်လည်စိစစ်ပြီး လျှော့သင့်သည့်နေရာလျှော့၊ ပြန်ပြင်၍ရလျှင် ပြန်ပြင်သွားမည်ဖြစ်ပြီး အရေးကြီးဆုံးသည် ကုန်ကျစရိတ်သက်သာစေရန်ဖြစ်ကြောင်း မဟာသီယာက ယခုသီ တင်းပတ်တွင် ပြောကြားထားသည်။

ခရီးစဉ်အတွင်း ဟန်ကျိုးနှင့် ပေကျင်းတို့သို့ သွားရောက်မည်ဖြစ်ပြီး တရုတ်သမ္မတ ရှီကျင်ပင်းနှင့် တွေ့ဆုံဆွေးနွေးမည့် မဟာသီယာသည် ဒေါ်လာဘီလျံ ၂၅၀ အထိ မြင့်တက်လာသည့် မလေးရှားကြွေးမြီကို လျှော့ချနိုင်ရန် ကြိုးပမ်းနေသည်။ ထိုင်းနယ်စပ်မှ  မလေးရှားမြို့တော် ကွာလာလမ်ပူသို့ ချိတ်ဆက်ထားသည့် ရထားလမ်းတစ်ခုအပါအဝင် စီမံကိန်းအတွက် ငွေကြေးအားလုံး သုံးစွဲထားသော်လည်း တစ်စိတ်တစ်ပိုင်းသာ ပြီးသေးသည့် တရုတ်အထောက်အပံ့ယူ ဓာတ်ငွေ့ပိုက်လိုင်း စီမံကိန်းကိုလည်း မလေးရှားက ဆိုင်းငံ့ထားသည်။ တရုတ်စီမံကိန်းများအား ဖျက်သိမ်းရန် မဟာသီယာ၏ ခြိမ်းခြောက်မှုများအတွက် မေးမြန်းမှုကို တရုတ် နိုင်ငံခြားရေးဝန်ကြီးဌာနက နှစ်နိုင်ငံအကြား စီးပွားရေးနှင့် ကုန်သွယ်ရေးပူးပေါင်းဆောင်ရွက်မှုသည် အပြုသဘောဆောင်သော တိုးတက်မှုအရှိန်ကို ထိန်းသိမ်းထားကြောင်း၊ ထိုပူးပေါင်းဆောင်ရွက်မှုမှ ဖြစ်ပေါ်လာသော ပြဿနာများကို ရင်းနှီးစွာ ညှိနှိုင်းဆွေးနွေးပြီး စနစ်တကျ ကိုင်တွယ်သင့်ကြောင်း ထုတ်ပြန်ခဲ့သည်။

ကမ္ဘာ့စီးပွားရေး ဒုတိယအင်အားအကြီးဆုံးနှင့် စီးပွားရေးဆိုင်ရာ ဆက်ဆံရေး ခိုင်မာစေရန် ကြိုးပမ်းနေသော မဟာသီယာသည် တရုတ်အွန်လိုင်းကူးသန်းရောင်းဝယ်ရေး ကုမ္ပဏီကြီး Alibaba ရုံးချုပ်ရှိသော ဟန်ကျိုးသို့ သွားရောက်မည် ဖြစ်သည်။

Ref ; AFP

Most Read

Most Recent