တရုတ်ခြိမ်းခြောက်မှု ကြီးထွားလာစဉ် ထိုင်ဝမ်သမ္မတက ကာကွယ်ရေး ဘတ်ဂျက်ကို ဒေါ်လာ ၁၁ ဘီလျံသို့ တိုးမြှင့်ရန် ကြိုးပမ်းနေ

တရုတ်ခြိမ်းခြောက်မှု ကြီးထွားလာစဉ် ထိုင်ဝမ်သမ္မတက ကာကွယ်ရေး ဘတ်ဂျက်ကို ဒေါ်လာ ၁၁ ဘီလျံသို့ တိုးမြှင့်ရန် ကြိုးပမ်းနေ
Published 8 August 2018

၂၀၁၇ ခုနှစ် သြဂုတ် ၁၆ ရက်တွင် တိုင်ပေ၌ လေကြောင်း အာကာသနှင့် ကာကွယ်ရေး နည်းပညာပြပွဲ ပြုလုပ်နေစဉ် (Photo : AFP)

တရုတ်နှင့် ဆက်ဆံရေးမှာ ယိုယွင်းလာစဉ် ထိုင်ဝမ်သမ္မတ ဆန်အင်းဝမ်က လက်နက်ကိုင် ကာကွယ်ရေး အင်အားစု၏ အသုံးစရိတ်အား မြှင့်တင်ရန် ကြိုးပမ်းနေသည့်အကြောင်း သြဂုတ် ၆ ရက်က ပြောကြားခဲ့သည်။

နွေရာသီ လွှတ်တော်ရပ်နားထားချိန်အပြီး ပြန်လည်စတင်ချိန်၌ ၂၀၁၉ ခုနှစ်အတွက် ကာကွယ်ရေး ဘတ်ဂျက်ကို ထိုင်ဝမ် ဒေါ်လာ ၃၄၆ ဘီလျံ (အမေရိကန်ဒေါ်လာ ၁၁ ဒသမ ၃ ဘီလျံ) အထိ ၅ ဒသမ ၆ ရာခိုင်နှုန်း တိုးမြှင့်ပေးရန်အတွက် ဆန်အင်းဝမ်က အဆိုပြုချက် တင်သွင်းမည်ဟု သိရသည်။

“နိုင်ငံတကာနဲ့ ဒေသတွင်း အခြေအနေတွေမှာ အပြောင်းအလဲတွေ အများကြီး ဖြစ်ပေါ်နေပါတယ်။ ကျွန်မတို့ရဲ့ အမျိုးသား လုံခြုံရေးဟာ ဆိုရင်လည်း ပိုမိုသိသာလာပြီး ရှုပ်ထွေးတဲ့ ခြိမ်းခြောက်မှုတွေနဲ့ ရင်ဆိုင်နေရပါတယ်” ဟု ဆန်က ရေတပ်အခမ်းအနားတစ်ခုသို့ တက်ရောက်စဉ် ပြောကြားခဲ့ပြီး ကာကွယ်ရေး အသုံးစရိတ်ကိုလည်း ကြေညာခဲ့သည်။

၂၀၁၉ ခုနှစ်အတွက် ကာကွယ်ရေး အသုံးစရိတ်ကို ယမန်နှစ်ကထက် ထိုင်ဝမ်ဒေါ်လာ ၁၈ ဒသမ ၃ ဘီလျံ ထပ်မံတိုးမြှင့်လိုက်ပါက ထိုင်ဝမ်ဂျီဒီပီ၏ ၂ ဒသမ ၁၆ ရာခိုင်နှုန်းနှင့် ညီမျှသွားမည်ဖြစ်သည်။ ၂၀၁၈ ခုနှစ်၏ ကာကွယ်ရေး ဘတ်ဂျက်မှာမူ ရှေ့တစ်နှစ်ကထက် ၁ ဒသမ ၉ ရာခိုင်နှုန်းသာ တိုးမြှင့်ခဲ့ခြင်းဖြစ်ပြီး ထိုင်ဝမ် ဒေါ်လာ ၃၂၇ ဒသမ ၇ ဘီလျံရှိခဲ့သည်။

၂၀၁၉ ခုနှစ် ကာကွယ်ရေးဘတ်ဂျက်၏ ငါးပုံတစ်ပုံခန့်ကို မိမိကိုယ်ကိုယ် ခုခံကာကွယ်နိုင်စေရန် စီမံကိန်းများအတွက် အသုံးချသွားမည်ဟု ဆန်က ပြောကြားခဲ့သည်။ ဆန်အင်းဝမ်သည် ပြည်တွင်းမှာပင် ထုတ်လုပ်သည့် ကာကွယ်ရေးစနစ် အထူးသဖြင့် ရေငုပ်သင်္ဘောများကို အဆင့်မြှင့်တင် လိုနေသည်။

ထိုစဉ် အမေရိကန် အစိုးရသည် ထိုင်ဝမ်သို့ ရေငုပ်သင်္ဘော နည်းပညာများ ရောင်းချရန် လိုအပ်သည့် လိုင်စင်တစ်ခုကို ယခုနှစ်အတွင်းက ချပေးခဲ့သည်။

ယမန်နှစ်ကလည်း ထိုင်ဝမ်သည် ၂၀၂၆ ခုနှစ်တွင် ပြည်တွင်း၌ ဆောက်လုပ်သည့် လေ့ကျင့်ရေး ဂျက်လေယာဉ် မျိုးဆက်သစ်တစ်ခု ထွက်ပေါ်လာစေရန်အတွက် ၎င်း၏ ကြိုးပမ်းမှုအကြောင်းကို ထုတ်ပြန်ကြေညာထားသည်။

တရုတ်အစိုးရသည် ဒီမိုကရေစီနည်းလမ်းတကျဖြင့် သီးခြားအုပ်ချုပ်ရေးရှိသည့် ထိုင်ဝမ်ကျွန်းကို ၎င်းတို့နိုင်ငံ၏ နယ်မြေတစ်စိတ်တစ်ပိုင်းဟု ရှုမြင်လျက်ရှိပြီး ပြန်လည်ပေါင်းစည်းရန်လည်း လိုအပ်ပါက အင်အားသုံးရေး အတွက်လည်း ချိန်ရွယ်နေသည်။ ထိုင်ဝမ်မှာ တရုတ်၏ အစိတ်အပိုင်း ဖြစ်ကြောင်းကို အသိအမှတ် မပြုသည့် ဆန်အင်းဝမ်၏ အစိုးရအဖွဲ့ တက်လာပြီးနောက် တရုတ်သည် ထိုင်ဝမ်အပေါ် ဖိအားများ တိုးမြှင့်ပေးခဲ့သည်။ တရုတ်သည် ရေတပ်နှင့် လေတပ် စစ်ရေးလေ့ကျင့်မှု များစွာကို လုပ်ဆောင်ပြလျက်ရှိပြီး ဧပြီလကလည်း ထိုင်ဝမ်မှ လွတ်လပ်ရေး လိုလားသည့် အင်အားစုအတွက် ရည်ရွယ်သည်ဟု တရုတ်ကဆိုပြီး ထိုင်ဝမ်ရေလက်ကြားတွင် ကျည်အစစ်သုံးသော စစ်ရေးလေ့ကျင့်မှု တစ်ခုကို ပြုလုပ်ခဲ့သည်။

Ref : AFP

Most Read

Most Recent