သြဂုတ် ၄ ရက်က မြို့တော်ဒါကာရှိ လမ်းတစ်လမ်းပေါ်၌ ကျောင်းသားများ ချီတက်ဆန္ဒပြနေကြသည်ကို တွေ့ရစဉ် (Photo: AFP)

အကြမ်းဖက်မှုများအဖြစ်သို့ ပြောင်းလဲလာသော ဘင်္ဂလားဒေ့ရှ်ကျောင်းသားဆန္ဒပြ မှုများကို နှိမ်နင်းရန် အာဏာပိုင်များက ကြိုးပမ်းနေစဉ် နိုင်ငံတစ်ဝန်းရှိ မိုဘိုင်းအင်တာနက်လိုင်းများကို ပိတ်ထားသည့်အကြောင်း အစိုးရအရာရှိများနှင့် ပြည်တွင်းမီဒီယာများ တွင် သြဂုတ် ၅ ရက်က ဖော်ပြခဲ့ကြသည်။

အရှိန်မြှင့်ထားသော ဘတ်စ်ကားတစ်စီးနှင့် တိုက်မိကာ ဆယ်ကျော်သက်နှစ်ဦး  သေဆုံးခဲ့ရပြီးနောက်ပိုင်း နိုင်ငံ၏နိမ့်ကျသော လမ်းဘေးကင်းလုံခြုံရေးအဆင့်အတန်း အတွက် ကျောင်းသားဆန္ဒပြမှုများ ဖြစ်ပေါ် လာသောကြောင့် မြို့တော်ဒါကာ၏ နေရာအစိတ်အပိုင်းအချို့တွင်  ပြီးခဲ့သည့် သီတင်းတစ်ပတ်လုံး ပိတ်ဆို့မှုများဖြစ်ပေါ်ခဲ့ရသည်။

သြဂုတ် ၄ ရက်တွင်မူ ဒါကာရှိ ဂျီကာ တာလာရပ်ကွက်တွင် ဆန္ဒပြမှုများသည် အကြမ်းဖက်မှုဖြစ်စဉ်များအဖြစ် ပြောင်းလဲသွားခဲ့ပြီး ဒဏ်ရာရရှိသူ ၁၀၀ ကျော်ရှိခဲ့သည်ဟု သိရသည်။ ရဲများသည် ဆန္ဒပြသူများကို ရာဘာကျည်များ၊ မျက်ရည်ယိုဗုံးများဖြင့် ပစ်ခတ်ခဲ့ပြီး အစိုးရလိုလားသည့် တက်ကြွ လှုပ်ရှားသူများကလည်း လူငယ်များကို တိုက်ခိုက်ခဲ့ကြသဖြင့် အချို့လူငယ်များအား အနီးအနားရှိ ဆေးရုံများသို့ အလျင်အမြန် ပို့ဆောင်ခဲ့ရသည်ဟု မျက်မြင်သက်သေများက ပြောကြားခဲ့ကြသည်။

ထိုသို့ အကြမ်းဖက်ဖြစ်စဉ်များ ဖြစ်ပွားပြီး မကြာမီ သြဂုတ် ၄ ရက်နှောင်းပိုင်းမှစပြီး 3G နှင့် 4G အင်တာနက်ဝန်ဆောင်မှုများကို ၂၄ နာရီကြာ ပိတ်ထားလိုက်သည့် အကြောင်းကို ဘင်္ဂလားဒေ့ရှ် ထိပ်တန်းသတင်းစာ Prothom Alo တွင် ဖော်ပြခဲ့သည်။

လူမှုမီဒီယာများပေါ်တွင်လည်း ဖုန်းဖြင့် အင်တာနက်သုံး၍ မရသည့်အကြောင်း ဘင်္ဂလားဒေ့ရှ် နိုင်ငံသားများက ရေးသားထားသည့် စာများဖြင့် ပြည့်နှက်လျက်ရှိသည်။ သို့သော် Wireless နှင့် Wired Network များကိုမူ ပိတ်ပင်ခဲ့ဖွယ်မရှိပေ။

အစိုးရထံမှ အမိန့်တစ်ခုရရှိခဲ့သည်ဟု ဘင်္ဂလားဒေ့ရှ်ဆက်သွယ်ရေးဆိုင်ရာ စည်းကမ်းထိန်းသိမ်းရေးကော်မရှင် (BTRC) မှ ဥက္ကဋ္ဌဖြစ်သူ ဂျဟီရူဟာ့က ပြောကြားခဲ့သည်။ သို့သော် ထိုအမိန့်သည် မည်သို့ဖြစ်ကြောင်းကိုမူ မထုတ်ဖော်ခဲ့ပေ။ အမည်မဖော်လိုသော အကြီးတန်းဆက်သွယ်ရေးအ ရာရှိတစ်ဦးကမူ အစိုးရ၏ အမိန့်ကြောင့် BTRC သည် အင်တာနက်ကို နှေးကွေးအောင် လုပ်ခဲ့သည်ဟု ဆိုခဲ့သည်။ ဆန္ဒပြပွဲများအား အာဏာပိုင်များ၏ ကိုင်တွယ်ပုံနှင့်ပတ်သက်ပြီး အွန်လိုင်းပေါ်တွင် ဒေါသထွက်မှုများ ပြန့်နှံကြီးထွားလာမည့်အရေးကို ထိန်းချုပ်ရန် ကြိုးပမ်းသည့်အနေနှင့် အစိုးရက ထိုကဲ့သို့လုပ်ဆောင်ခဲ့ခြင်း ဖြစ်ဖွယ်ရသည်။

သို့သော်လည်း လူမှုမီဒီယာများပေါ်တွင် အာဏာရပါတီမှ တက်ကြွ လှုပ်ရှားသူများက ကျောင်းသားများအား တိုက်ခိုက်နေသည်ဟု ယူဆရသော ဓာတ်ပုံများမှာ ပြည့်လျှံနေ ပြီး ပြည်သူများ၏ ဒေါသများမှ တစ်ဖန်ပြန် လည် မြင့်တက်လာခဲ့သည်။

ရဲတပ်ဖွဲ့ကမူ ၎င်းတို့သည် ဆန္ဒပြလူငယ်များအား ရာဘာကျည်များ၊ မျက်ရည်ယို ဓာတ်ငွေ့များဖြင့် မပစ်ခတ်ခဲ့ကြောင်း ငြင်းဆိုလျက်ရှိကြသည်။ သို့သော် ဆေးရုံဝန်ထမ်း များ၏ ပြောကြားချက်အရ ဒဏ်ရာရရှိသူ ဒါဇင်ပေါင်းများစွာရှိနေပြီး အချို့မှ ပြင်းပြင်း ထန်ထန်ဒဏ်ရာရသွားခဲ့ကြကာ ဒဏ်ရာများသည် ရာဘာကျည်ကြောင့် ရသည်နှင့် တူညီနေကြကြောင်း သိရသည်။ အာဏာရ အဝါမီလိခ်ပါတီကလည်း ၎င်းတို့၏လုံခြုံရေးတပ်ဖွဲ့များသည် ကျောင်းသားများကို ရိုက်နှက်ခြင်း မလုပ်ခဲ့ကြောင်း ငြင်းဆန်နေကြသည်။

ဘင်္ဂလားဒေ့ရှ်နိုင်ငံ၏ ပို့ဆောင်ဆက်သွယ်ရေးကဏ္ဍသည် အကျင့်ပျက်ခြစားပြီး စည်းကမ်းပျက်ပြားကာ အန္တရာယ်များသည်ဟု ကျယ်ကျယ်ပြန့်ပြန့် ရှုမြင်ခံရလျက်ရှိသည်။ ထိုစဉ် ဆယ်ကျော်သက်နှစ်ဦးကား တိုက်ခံရပြီး သေဆုံးမှုသည် လူမှုမီဒီယာပေါ် ၌ ပြည်သူများ၏ အစိုးရအပေါ် ဒေါသကို ဓာတ်ဆီလောင်းပေးသကဲ့သို့ ဖြစ်သွားခဲ့ခြင်း ဖြစ်သည်။