ဂျပန်၏ စတော့ဈေးကွက်သည် တရုတ်ကို ကျော်တက်ပြီး ကမ္ဘာ့ဒုတိယအကြီးဆုံး ဖြစ်လာသည်ဟု ဘလွန်းဘာ့ဂ်က သြဂုတ်၂ ရက်၌ ဖော်ပြခဲ့သည်။ တရုတ်သည် စီးပွားရေး တိုးတက်မှုနှေးကွေးနေသည့်အပြင် အမေရိကန်ထံမှ ကုန်သွယ်ရေးစစ်ပွဲဖြစ်ပွားမည်ဟု ခြိမ်းခြောက်မှုများနှင့် ရင်ဆိုင်နေရစဉ် ဂျပန်က ယခုကဲ့သို့ ကျော်တက်သွားခြင်းဖြစ်သည်။
တရုတ်ပြည်မကြီးမှ ရှယ်ယာတန်ဖိုးများသည် အိမ်နီးချင်းနိုင်ငံဂျပန်၏ နောက်သို့ ရောက်သွားသည်မှာ ၂၀၁၄ ခုနှစ်တွင် နံပါတ်နှစ်နေရာသို့ တရုတ်ရောက်ရှိလာပြီး နောက်ပိုင်းပထမဆုံးအကြိမ်ဟုသိရသည်။
လက်ရှိတွင် တရုတ်၏စတော့ဈေးကွက်တန်ဖိုးသည် အမေရိကန်ဒေါ်လာ ၆ ဒသမ ၀၉ ထရီလျံရှိနေပြီး ဂျပန်၏ စတော့ဈေး ကွက်တန်ဖိုးသည် ဒေါ်လာ ၆ ဒသမ ၁၇ ထရီ လျံရှိနေသည်။ အမေရိကန်၏ စတော့ဈေးကွက်တန်ဖိုးမှာ ဒေါ်လာ ၃၁ ထရီလျံအထိ ရှိနေသည်။
“ ဂျပန်အောက်ကိုရောက်သွားတာဟာ ကုန်သွယ်ရေးစစ်ပွဲကြောင့် ဖြစ်ပေါ်လာတဲ့ ထိခိုက်မှုတစ်ခုပါ။ ဂျပန်ရဲ့ရှယ်ယာဈေးကွက်ဟာ အတော်အတန်တည်ငြိမ်နေပေမယ့် တရုတ်ရဲ့ဈေးကွက်ကတော့ အခုနှစ်အတွင်းမှာပဲ အနိမ့်ဆုံးကို ထိုးကျနေပါတယ်” ဟု ဟောင်ကောင်ရှိ CEB နိုင်ငံတကာရင်းနှီးမြှုပ်နှံမှုမှ သုတေသနခေါင်းဆောင် ဘန်နီလမ်က ဆိုသည်။
ကမ္ဘာ့စီးပွားရေးအင်အားအကြီးဆုံး နှစ်နိုင်ငံဖြစ်သည့် အမေရိကန်နှင့် တရုတ်ကြားမှ ကုန်သွယ်ရေးစစ်ပွဲဖြစ်ပွားမည့် အရေးအပေါ် စိုးရိမ်မှုများကြောင့် ကမ္ဘာတစ်ဝန်းမှ စတော့ဈေးကွက်များမှာလည်း ကျယ်ကျယ်ပြန့်ပြန့် ထိခိုက်မှုကို ခံစားနေရသည်။
Shanghai Composite အညွှန်းကိန်းတွင် ဖော်ပြချက်အရ ဇန်နဝါရီလမှစပြီး တရုတ်၏ ရှယ်ယာတန်ဖိုးများသည် ၁၆ ရာခိုင်နှုန်းကျော် ထိုးကျသွားကြောင်း သိရသည်။ ထိုအခြေအနေတွင် အိမ်ဖြူတော်က နောက်ထပ် တရုတ်သွင်းကုန် ဒေါ်လာ ဘီလျံ ၂၀၀ ဖိုးအပေါ် အခွန်နှစ်ဆတိုးမြှင့် စည်းကြပ်ရန်စဉ်းစားနေကြောင်း ထပ်မံထုတ်ပြန်ခဲ့သဖြင့် ဖိအားများ ပိုမိုမြင့်တက်လာခဲ့သည်။
လက်ရှိအချိန်အထိ အမေရိကန်အစိုးရသည် တရုတ်ကုန် ဒေါ်လာ ၃၄ ဘီလျံဖိုးအပေါ် အခွန်များစည်းကြပ်ထားပြီးဖြစ်သည်။ လာမည့်သီတင်းပတ်များအတွင်း နောက်ထပ် ဒေါ်လာ ၁၆ ဘီလျံဖိုးရှိသည့် ကုန်များကို အခွန်ထပ်မံစည်းကြပ်ရန်စဉ်းစား နေသည် ဟုလည်း သိရသည်။
ရင်းနှီးမြှုပ်နှံသူများကို စိုးရိမ်စေသည့် နောက်ထပ်ကိစ္စတစ်ခုမှာ မကြာသေးမီက ယွမ်ငွေတန်ဖိုး ကျဆင်းမှုဖြစ်သည်။ လက်ရှိ တရုတ်ငွေကြေးသည် အမေရိကန် ဒေါ်လာ နှင့် ယှဉ်လျှင်တစ်နှစ်ကျော်ကာလအတွင်း အနိမ့်ဆုံးအမှတ်သို့ ရောက်နေသည်။
