ဇွန် ၂၃ ရက်တွင် တရုတ်အရှေ့ပိုင်း အန်ဟွေးပြည်နယ်၌ မိုက်ခရိုမော်တာထုတ်လုပ်သည့် စက်ရုံတွင် အလုပ်သမားများကို တွေ့ရစဉ် (Photo: AFP)

အမေရိကန်သမ္မတ ဒေါ်နယ်ထရန့်သည် ဒေါ်လာဘီလျံ ၂၀၀ တန်ဖိုးရှိ တရုတ်တင်သွင်းကုန်များအား အခွန် ၂၅ ရာခိုင်နှုန်း စည်းကြပ်ရန် စဉ်းစားနေသည်ဟု ဇူလိုင် ၃၁ ရက် သတင်းများထဲတွင် ဖော်ပြခဲ့သည်။ ယင်း ပမာဏသည် ယခင်က ပြောကြားထားသော ၁၀ ရာခိုင်နှုန်းထက် ပိုများသွားခြင်းဖြစ်သည်။

အမေရိကန်သည် ယခုလအစောပိုင်းက တရုတ်ထုတ်ကုန် ၃၄ ဘီလျံဖိုးအပေါ် အခွန် ၂၅ ရာခိုင်နှုန်း စည်းကြပ်ခဲ့ပြီး နောက်ထပ် ၁၆ ဘီလျံတန်ဖိုးရှိသော တရုတ်ကုန်များအပေါ် အခွန်ထပ်မံစည်းကြပ်ရန်လည်း စီစဉ်နေသည်။

ထရန့်သည် ကနဦးက နောက်ထပ် ဒေါ်လာဘီလျံ ၂၀၀ တန်ဖိုးရှိသော တရုတ်ကုန်များအပေါ် အခွန် ၁၀ ရာခိုင်နှုန်းစည်းကြပ်မည်ဟု ခြိမ်းခြောက်ထားခဲ့သည်။

ဝါရှင်တန်ပို့စ်နှင့် ဘလွန်းဘက်တို့တွင် ဖော်ပြချက်အရ ယင်းအခွန်စည်းကြပ်မှု ပမာဏသည် ၂၅ ရာခိုင်နှုန်းအထိ တိုးမြင့်သွားနိုင်သည်ဟု သိရသည်။ ယင်းသည် တရုတ်နှင့် ကုန်သွယ်ရေးပိုင်း၌ ရှေ့မတိုး နောက်မဆုတ်သာ ဖြစ်နေသည့် အခြေအနေအပေါ် အမေရိကန်က ထပ်မံဖိအားပေးသည့် အဓိပ္ပာယ်အဖြစ် သက်ရောက်မည်ဖြစ်သည်။

သို့သော် တရုတ်နှင့် အမေရိကန်ကြား၌ စေ့စပ်ဆွေးနွေးမှုအသစ်များ ဖြစ်ပေါ်လာမည့်အပေါ် မျှော်လင့်ချက်အသစ်များ မြင့်တက်နေသည့်အတွက် ဇူလိုင် ၃၁ ရက် ဈေးကွက်အခြေအနေများမှာ တည်ငြိမ်နေသည်။ ၂၀၁၇ ခုနှစ်အတွင်းက အမေရိကန်သည် တရုတ်နှင့် ကုန်သွယ်ရာတွင် ဒေါ်လာ ၃၇၆ ဘီလျံဖိုး လိုငွေပြခဲ့သည်။

ထရန့်သည် မကြာသေးမီကလည်း တရုတ်မှ သွင်းကုန်အားလုံးအပေါ် ပြင်းထန်သည့် အခွန်များချမှတ်မည်ဟု ခြိမ်းခြောက်ခဲ့သေးသည်။ ပြီးခဲ့သည့်နှစ်က အမေရိကန်သို့ တင်ပို့သည့် စုစုပေါင်း တရုတ်ကုန်ပစ္စည်း တန်ဖိုးမှာ ဒေါ်လာဘီလျံ ၅၀၀ ဖိုးကျော်ရှိကြောင်း သိရသည်။

Ref: AFP