ဇူလိုင် ၁၀ ရက်တွင် KCNA က ထုတ်ပြန်ခဲ့သော ဓာတ်ပုံ၌ ဆမ်ဂျီယွန်ကောင်တီတွင် ဆောက်လုပ်ရေးလုပ်ငန်းခွင်တစ်ခုအား စစ်ဆေးနေသည့် ကင်ဂျုံအွန်ကို တွေ့ရစဉ် (Photo: AFP)

မြောက်ကိုရီးယားတွင် မကြာသေးခင်နှစ်များအတွင်း ပြည်သူများအား စားနပ်ရိက္ခာ ထောက်ပံ့မှုနှင့် ကျန်းမာရေးစောင့်ရှောက်မှုတို့ သိသိသာသာ တိုးတက်လာခဲ့ကြောင်း သို့သော်လည်း ခက်ခဲကြမ်းတမ်းသော ရှေ့ခရီးက စောင့်ကြိုနေဆဲဖြစ်ကြောင်း ကုလသမဂ္ဂ လူသားချင်း စာနာထောက်ထားမှုရေးရာ အကြီးအကဲ မာ့က်လိုကော့က ဇူလိုင် ၁၂ ရက် တွင် ပြောကြားခဲ့သည်။

လိုကော့၏ ခရီးစဉ်သည် ကုလသမဂ္ဂ လူသားချင်း စာနာထောက်ထားမှုရေးရာနှင့် အရေးပေါ်ကယ်ဆယ်ရေးဆိုင်ရာ ခေါင်းဆောင်တစ်ဦး၏ ၂၀၁၁ ခုနှစ် ခရီးစဉ်နောက်ပိုင်း ပထမဆုံး မြောက်ကိုရီးယားခရီးစဉ်ဖြစ်ခဲ့သည်။

“လွန်ခဲ့တဲ့ နှစ် ၂၀ ကို ပြန်ကြည့်လိုက်ရင် ဒါမှမဟုတ် အလွန်ကြီးမားတဲ့ လူသားချင်း စာနာထောက်ထားမှု ပြဿနာတွေကြောင့် လူ့အသက်တွေ အမြောက်အမြား ဆုံးရှုံးခဲ့ပါတယ်။ မကြာသေးခင် ကာလမှာတော့ တိုးတက်မှုတွေ ရှိလာနေပါတယ်” ဟု လိုကော့က ပြုံယမ်းတွင် သတင်းထောက်များကို ပြောကြားခဲ့သည်။

မြောက်ကိုရီးယားသည် အငတ်ဘေး မကြာခဏ ကြုံနေရပြီး ၁၉၉၀ ပြည့်လွန်နှစ်များက အငတ်ဘေးကြောင့် လူသန်းနှင့်ချီ၍ သေဆုံးခဲ့သည်ဟု ဆိုကြသည်။

မြောက်ကိုရီးယား ကလေးငယ် ၃၀ ရာခိုင်နှုန်းခန့်သည် ၂၀၁၁ ခုနှစ်တွင် အာဟာရချို့တဲ့မှုကို ခံစားနေရပြီး ယခုအခါ ထိုအရေအတွက်သည် ၂၀ ရာခိုင်နှုန်းအထိ ကျဆင်းသွားခဲ့သည်ဟု လိုကော့က ပြောကြားခဲ့သည်။ သို့သော်လည်း လက်ရှိစာရင်းအင်းများသည်ပင်လျှင် မြင့်မားနေသည့် ကိန်းဂဏန်းတစ်ခု ဖြစ်ကြောင်း လိုကော့က ဝန်ခံပြောကြားခဲ့သည်။

မြောက်ကိုရီးယား လူဦးရေ ၂၅ သန်းတွင် ၁၀ ဒသမ ၆ သန်းခန့်သည် လူသားချင်း စာနာထောက်ထားမှု အကူအညီများ လိုအပ်နေသည်ဟု ကုလသမဂ္ဂက ပြောကြားခဲ့သည်။ ထို့ပြင် မြို့ပြနှင့် ကျေးလက်ဒေသကြား အခြေခံကျန်းမာရေး ဝန်ဆောင်မှုရရှိခြင်း၌ ကွာဟချက် ကြီးကြီးမားမား ရှိနေကြောင်းလည်း ကုလသမဂ္ဂက ပြောကြားခဲ့သည်။ မြောက်ကိုရီးယားတွင် အာဟာရချို့တဲ့မှု တိုးတက်ရန် ကျန်းမာရေးနှင့် သန့်ရှင်းမှုဆိုင်ရာ အခြေအနေများ တိုးတက်ရေးတို့အတွက် ကူညီရန် ဒေါ်လာ ၁၁၁ သန်း အကူအညီ လိုအပ်သည်ဟု ကုလသမဂ္ဂက ယခုနှစ်အစောပိုင်းတွင် ပြောကြားခဲ့သည်။ သို့သော်လည်း ထိုတောင်းဆိုမှု၏ ၉၀ ရာခိုင်နှုန်းခန့်ကို ဖြည့်ဆည်းပေးနိုင်ခဲ့ခြင်း မရှိသေးပေ။

လိုအပ်နေသော စားနပ်ရိက္ခာ၊ ဆေးဝါးနှင့် အခြားကျန်းမာရေးအထောက်အပံ့များ ပံ့ပိုးပေးမှုသည် ထိပ်တန်း ဦးစားပေးဖြစ်နေဆဲဖြစ်ကြောင်း အကူအညီရှင်နိုင်ငံများမှ လက်ခံလျှင် လူ့အသက်များကို ကယ်ဆယ်နိုင်ပြီး ဆင်းရဲဒုက္ခများကို လျှော့ချနိုင်မည်ဟု လိုကော့က ပြောကြားခဲ့သည်။

မြောက်ကိုရီးယား စီးပွားရေးသည် ချွတ်ခြုံကျနေပြီး ၎င်း၏ ပြည်သူများကို ကျွေးမွေးရန် ရုန်းကန်နေရသည်မှာ ကြာပြီဖြစ်သည်။ ထို့ပြင် မြောက်ကိုရီးယားသည် ဒုံးနှင့် နျူကလီးယား စမ်းသပ်မှုများကြောင့် ကုလသမဂ္ဂ လုံခြုံရေးကောင်စီ၏ ပိတ်ဆို့အရေးယူမှုများကိုလည်း ရင်ဆိုင်နေရသည်။

Ref: AFP