ဇူလိုင် ၄ ရက်တွင် အာမက်ဒါဘတ်မှ ၈၅ ကီလိုမီတာခန့်အကွာ ခါဗာတွင် Ganpat တက္ကသိုလ်၌ ဂျပန်-အိန္ဒိယ ပူးတွဲထုတ်လုပ်မှု အင်စတီကျုမှ အိန္ဒိယကျောင်းသားများက လက်တွေ့လေ့လာနေစဉ် (Photo: AFP)

၂၀၁၇ ခုနှစ်အတွက် ကမ္ဘာ့ဘဏ်မှ နောက်ဆုံးထုတ်ပြန်လိုက်သော စာရင်းများအရ အိန္ဒိယသည် ကမ္ဘာပေါ်တွင် စီးပွားရေး ဆဋ္ဌမမြောက် အင်အားအကြီးဆုံးနိုင်ငံဖြစ်လာပြီဖြစ်ပြီး ပြင်သစ်မှာမူ နံပါတ်ခုနစ်သို့ ကျဆင်းသွားသည်။

အိန္ဒိယ၏ စုစုပေါင်း ပြည်တွင်းအသားတင် ကုန်ထုတ်လုပ်မှုတန်ဖိုး (GDP) သည် ပြီးခဲ့သည့်နှစ်ကုန်တွင် ဒေါ်လာ ၂ ဒသမ ၅၉၇ ထရီလျံရှိနေပြီး ပြင်သစ်မှာမူ ဒေါ်လာ ၂ ဒသမ ၅၈၂ ထရီလျံ ရှိနေခဲ့သည်။

ဝန်ကြီးချုပ်နရင်ဒရာမိုဒီ အစိုးရ၏ စီးပွားရေးဆိုင်ရာ မူဝါဒများကြောင့် အိန္ဒိယစီးပွားရေးမှာ လေးလပတ်များစွာ နှေးကွေးနေခဲ့ပြီးနောက် ၂၀၁၇ ခုနှစ် ဇူလိုင်တွင် အိန္ဒိယ စီးပွားရေးသည် အားကောင်းကောင်းဖြင့် ပြန်လည် ခုန်တက်လာခဲ့သည်။

လူဦးရေ ၁ ဒသမ ၃၄ ဘီလျံခန့် နေထိုင်သော အိန္ဒိယနိုင်ငံသည် ကမ္ဘာပေါ်တွင် လူဦးရေအများဆုံးနိုင်ငံဖြစ်လာရန် အသင့်ဖြစ်နေပြီဖြစ်သည်။ သို့သော် ပြင်သစ်နိုင်ငံ၏ လူဦးရေမှာမူ ၆၇ သန်းသာ ရှိနေသည်။ ထို့ ကြောင့် အိန္ဒိယ၏ လူတစ်ဦးချင်း GDP သည် ယင်းထက်အဆပေါင်း ၂၀ ကျော်သာနေသော ပြင်သစ်နှင့် ဆက်လက်ကွာဟနေဦးမည်ဟု ကမ္ဘာ့ဘဏ်၏ အချက်အလက်များတွင် ဖော်ပြခဲ့သည်။

၂၀၁၆ ခုနှစ်နှစ်ကုန်ပိုင်းက မိုဒီသည် နိုင်ငံထဲ၌ လည်ပတ်နေသော တန်ဖိုးများသော ငွေစက္ကူများကို ဖယ်ရှားရုပ်သိမ်းလိုက်ပြီး VAT စနစ်သစ် (ကုန်ပစ္စည်း၏ဝန်ဆောင်မှုအပေါ် စည်းကြပ်သည့်အခွန်) နှင့် လိုက်လျောညီထွေဖြစ်စေရန် ဝရုန်းသုန်းကား ပြဋ္ဌာန်းမှုများလည်း ဖြစ်ပွားခဲ့သောကြောင့် အိန္ဒိယနိုင်ငံ၏ စီးပွားရေးမှာ နှေးကွေးခဲ့ရသည်ဟု အပြစ်တင်ခံခဲ့ရသည်။ ယင်းဖြစ်စဉ်များပြီးနောက် ယမန်နှစ်အတွင်းက အိန္ဒိယစီးပွားရေးအား ပြန်လည်တိုးတက်စေသော အဓိကအကြောင်းရင်းများမှာ ကုန်ထုတ်လုပ်မှုနှင့် စားသုံးသူများ၏ သုံးစွဲမှုများဖြစ်သည်။

အိန္ဒိယ၏ GDP သည် ဆယ်စုနှစ်တစ်ခုအတွင်းမှာပင် နှစ်ဆမြင့်တက်လာခဲ့သည်။ တရုတ်၏ စီးပွားရေးတိုးတက်မှုနှုန်းမှာ နှေးကွေးနေစဉ် အိန္ဒိယသည် အာရှထဲမှ အဓိကစီးပွားရေး အင်ဂျင်တစ်ခုဖြစ်လာနိုင်သည်ဟုလည်း ခန့်မှန်းခံထားရသည်။

ပြည်တွင်းသုံးစွဲမှုနှင့် အခွန်စနစ် ပြုပြင်ပြောင်းလဲမှုတစ်ခုတို့၏ တွန်းအားကြောင့် အိန္ဒိယ၏ စီးပွားရေးသည် ယခုနှစ်အတွင်း ၇ ဒသမ ၄ ရာခိုင်နှုန်း တိုးတက်ပြီး ၂၀၁၉ ခု နှစ်တွင် ၇ ဒသမ ၈ ရာခိုင်နှုန်း တိုးတက်မှုရှိလိမ့်မည်ဟု အပြည်ပြည်ဆိုင်ရာ ငွေကြေးရန်ပုံငွေအဖွဲ့က ခန့်မှန်းထားသည်။ ကမ္ဘာကြီး၏ ပျမ်းမျှတိုးတက်မှုနှုန်းထားမှာ ၃ ဒသမ ၉ ရာခိုင်နှုန်း ဖြစ်သည်။

အိန္ဒိယသည် GDP ပမာဏဖြင့် ယခုနှစ်အတွင်း ပြင်သစ်ရော ဗြိတိန်ကိုပါ ကျော်တက်လိမ့်မည်ဖြစ်ပြီး ၂၀၃၂ ခုနှစ်တွင် ကမ္ဘာ့စီးပွားရေး တတိယအင်အားအကြီးဆုံးနိုင်ငံဖြစ်စေရန် အလားအလာကောင်းရှိနေသည်ဟု လန်ဒန်အခြေစိုက် စီးပွားရေးနှင့် ဘောဂဗေဒသုတေသနဌာနက ယမန်နှစ်တွင် ခန့်မှန်းခဲ့သည်။

၂၀၁၇ ခုနှစ် နှစ်ကုန်တွင် ဗြိတိန်သည် ကမ္ဘာပေါ်တွင် စီးပွားရေး ပဉ္စမမြောက် အင်အားအကြီးနိုင်ငံဖြစ်နေဆဲဖြစ်ပြီး GDP ပမာဏမှာ ဒေါ်လာ ၂ ဒသမ ၆၂၂ ထရီလျံဖြစ်သည်။

ကမ္ဘာ့စီးပွားရေး အင်အားအကြီးဆုံးနိုင်ငံမှာ အမေရိကန်ဖြစ်ပြီး ယင်း၏နောက်တွင် တရုတ်၊ ဂျပန်၊ ဂျာမနီတို့မှာ အစဉ်လိုက် ရပ်တည်နေကြသည်။

Ref: AFP