ဇူလိုင်မှစ၍ တစ်နေ့ ရေနံစည်တစ်သန်းခန့် တိုးမြင့်ထုတ်လုပ်ရန် အိုပက်စွမ်းအင်ဝန်ကြီးများ သဘောတူ

ဇူလိုင်မှစ၍ တစ်နေ့ ရေနံစည်တစ်သန်းခန့် တိုးမြင့်ထုတ်လုပ်ရန် အိုပက်စွမ်းအင်ဝန်ကြီးများ သဘောတူ
Published 24 June 2018

အိုပက်အဖွဲ့ဝင်ဖြစ်သော ဗင်နီဇွဲလားနိုင်ငံ အီတီဂရီရှိ ရေနံချက်စက်ရုံတစ်ရုံအား တွေ့ရစဉ် (Photo: AFP)

ဝယ်လိုအားလိုအပ်ချက်များအား ပြည့်မီရန်အတွက် လာမည့်ဇူလိုင်မှစ၍ တစ်နေ့လျှင် ရေနံစည်တစ်သန်းခန့် တိုးမြှင့်ထုတ်လုပ်ရန် အိုပက်စွမ်းအင်ဝန်ကြီးများက ဇွန် ၂၂ ရက်တွင် ဗီယင်နာ၌ ကျင်းပခဲ့သည့် တင်း မာမှုရှိသော ဆွေးနွေးပွဲအပြီးတွင် သဘောတူခဲ့ကြသည်။ ထိုတိုးမြှင့်ထုတ်လုပ်မှုသည် လာမည့်ဒုတိယနှစ်ဝက်တွင် ဝယ်လိုအားကို ပြည့်မီရန်အတွက် အလွန်အမင်းအထောက် အကူဖြစ်စေမည်ဟုမျှော်လင့်ကြောင်း ဆော်ဒီအာရေဗျစွမ်းအင်ဝန်ကြီး ခါလစ်အယ်ဖာလီက ပြောကြားခဲ့သည်။

ထိုဆွေးနွေးပွဲသည် အိုပက်အဖွဲ့ဝင်နိုင်ငံများနှင့် မိတ်ဖက်နိုင်ငံများအကြား ရရှိထားသော ၁၈ လကြာမြင့်လာပြီဖြစ်သည့် ရေနံ ထုတ်လုပ်မှုလျှော့ချထားရန် သဘောတူညီချက်ကို ထပ်မံပြင်ဆင်ဖြည့်စွက်မှု ပြု၊ မပြု အတွက် အဓိကထားခဲ့ခြင်းဖြစ်သည်။ အမေရိကန်၊ အိန္ဒိယနှင့် တရုတ်တို့ကဲ့သို့ရေနံအဓိက သုံးစွဲသည့်နိုင်ငံများတွင် ရေနံဈေးတက်မှုကို အပြစ်တင်မှု မြင့်တက်နေချိန်၌ အိုပက် အဖွဲ့ဝင်မဟုတ်သည့် ရုရှား၏ထောက်ခံမှုရရှိ ထားသော ဆော်ဒီက ရေနံတိုးထုတ်ရန် ထက်ထက်သန်သန် သဘောတူခဲ့သည်။

သို့သော် အီရန်နျူကလီးယားသဘော တူညီချက်မှ နုတ်ထွက်ရန် အမေရိကန်သမ္မတ ဒေါ်နယ်ထရန့်က ဆုံးဖြတ်ခဲ့မှုကြောင့် ရေနံလုပ်ငန်းသည် ပိတ်ဆို့အရေးယူမှု ပြန်လည် ရင်ဆိုင်ရနိုင်ချိန်တွင် ဆော်ဒီ၏ဒေသတွင်း ပြိုင်ဘက် အီရန်က ယခင်ရရှိထားသည့် ထုတ်လုပ်မှု လျှော့ချရေး သဘောတူညီချက်အား မည်သည့်အပြောင်းအလဲ ပြုလုပ်မှုကိုမဆို ဆန့်ကျင်ခဲ့သည်။

၂၀၁၆ ခုနှစ်တွင် ရရှိထားသောသဘော တူညီချက်၌ ပါဝင်သည့်နိုင်ငံများက တစ်နေ့လျှင် ရေနံထုတ်လုပ်မှုစည် ၁ ဒသမ ၈ သန်း လျှော့ချရန် တောင်းဆိုထားခြင်းဖြစ်သည်။ သို့သော် ထုတ်လုပ်မှု ကန့်သတ်ခံရခြင်းနှင့် ပထဝီနိုင်ငံရေးဆိုင်ရာအကြောင်းအရာများကြောင့် နိုင်ငံအများအပြားတွင် ကန့်သတ်ထားသည့်ပမာဏကို ကျော်လွန်ခဲ့ပြီး ဈေးကွက်တွင် ရေနံစည် ၂ ဒသမ ၈ သန်းခန့် လိုအပ်ချက်ရှိခဲ့ကြောင်း အိုပက်က ထုတ်ပြန်ခဲ့သည်။

ယခုဆွေးနွေးပွဲတွင် သဘောကွဲလွဲမှု ဖြစ်ခဲ့သော်လည်း နောက်ဆုံးတွင် တစ်နေ့လျှင် ရေနံစည်တစ်သန်းကို အဖွဲ့ဝင်အားလုံးက စုပေါင်း၍ တိုးထုတ်ရန် သဘောတူညီချက်ရရှိခဲ့ပြီး ၂၀၁၆ ခုနှစ်နှောင်းပိုင်းတွင် ရရှိခဲ့သည့် သဘောတူညီချက်ကို အပြည့်အ၀ လိုက်နာရန်သာ ကတိပြုခဲ့ကြသည်။ သို့သော် ဆွေးနွေးပွဲနောက်ဆုံးပူးတွဲကြေညာချက်တွင်မူ ရေနံစည်တစ်သန်း တိုးထုတ်မည့် အကြောင်းကို မဖော်ပြခဲ့ပေ။

သို့သော် ယခုတိုးထုတ်မည့် သဘောတူညီချက်အား ဗီယင်နာတွင် ကျင်းပမည့် ဆွေးနွေးပွဲ၌ သြဇာကြီးရုရှား  အပါအဝင် အိုပက် အဖွဲ့ဝင်မဟုတ်သော ၁၀ နိုင်ငံမှ အတည်ပြုချက်ကို လိုအပ်နေဆဲဖြစ်သည်။ စီးပွားရေး အကျပ်အတည်းကြုံနေရသော ဗင်နီဇွဲလားကလည်း ရေနံတိုးထုတ်မည့်အစီအစဉ်ကို ဆန့်ကျင်ခဲ့သည်။

 

Most Read

Most Recent