ယီမင်သူပုန်များ ထိန်းချုပ်ထားသော ဆိပ်ကမ်းတစ်ဝိုက်အား ဆော်ဒီညွန့်ပေါင်းက လေကြောင်းမှတိုက်ခိုက်

ယီမင်သူပုန်များ ထိန်းချုပ်ထားသော ဆိပ်ကမ်းတစ်ဝိုက်အား ဆော်ဒီညွန့်ပေါင်းက လေကြောင်းမှတိုက်ခိုက်
Published 15 June 2018

ဇွန် ၁၃ ရက်က ဟိုဒေးဒါ အပြည်ပြည်ဆိုင်ရာလေဆိပ်တောင်ဘက် ကိုးကီလိုမီတာအကွာသို့ ယီမင်အစိုးရလိုလားသည့် တိုက်ခိုက်ရေးသမားများ ရောက်ရှိလာစဉ် (Photo: AFP)

ယီမင်သို့ အကူအညီပေးရာတွင် အလွန်အမင်း အရေးပါသော ဝင်ပေါက်ဖြစ်သည့် ဆိပ်ကမ်းတစ်ခုအား ဆော်ဒီအာရေဗျ ဦးဆောင်သည့်ညွန့်ပေါင်း ကျောထောက်နောက်ခံပြု ယီမင်အစိုးရတပ်ဖွဲ့ဝင်များ၏ ထိုးစစ်ကို ဇွန် ၁၄ ရက်တွင် ဒုတိယမြောက်နေ့အဖြစ် ဆင်နွှဲခဲ့စဉ် ရှီအိုက်ဟူသီသူပုန်များ ထိန်းချုပ်ထားသော ဟိုဒေးဒါဆိပ်ကမ်းတစ်ဝိုက်ဒေသများအား ဆော်ဒီညွန့်ပေါင်းက လေကြောင်းမှ ပစ်မှတ်ထား တိုက်ခိုက်ခဲ့သည်။ သို့သော် ယင်းကဲ့သို့ ထိုးစစ်ဆင်နွှဲနေသော်လည်း ဟိုဒေးဒါဆိပ်ကမ်းအား ဖွင့်လှစ်ထားဆဲဖြစ်ပြီး သင်္ဘောများ ဝင်ထွက်နေဆဲဖြစ်ကြောင်း ဆိပ်ကမ်းတာဝန်ရှိသူများက ပြောကြားခဲ့ကြသည်။

လူ ၆၀၀၀၀၀ ခန့်နေထိုင်သော ပင်လယ်နီဆိပ်ကမ်းမြို့အား ထိန်းချုပ်ထားသည့် အီရန်ကျောထောက်နောက်ခံပြု သူပုန်များက ရန်သူများသည် ဟိုဒေးဒါဒေသကို လေကြောင်းမှ နှစ်ကြိမ်တိုက်ခိုက်ခဲ့ကြောင်း Al-Masirah သတင်းဌာနမှတစ်ဆင့် ထုတ်ပြန်ခဲ့သည်။ ဇွန် ၁၃ ရက်က ပထမနေ့ ထိုးစစ်ဆင်မှုတွင် ဆော်ဒီညွန့်ပေါင်းက ဟူသီသူပုန်များ၏နေရာများကို လေကြောင်းမှတိုက်ခိုက်မှု ၁၈ ကြိမ် ပြုလုပ်ခဲ့ကြောင်း ထိုညွန့်ပေါင်း၏ သတင်းရင်းမြစ်များက ပြောကြားခဲ့သည်။

ဟိုဒေးဒါမြို့အား သူပုန်များလက်ထဲမှ ပြန်လည်သိမ်းယူရန် ယီမင်အစိုးရတပ်များသည် ဆော်ဒီနှင့် ယူအေအီးတို့ပါဝင်သော ညွှန့်ပေါင်း၏ အကူအညီများဖြင့် ဇွန် ၁၃ ရက်တွင် Golden Victory စစ်ဆင်ရေးကို စတင်ခဲ့ပြီး မြို့တောင်ပိုင်းရှိ လေဆိပ်သို့ ချီတက်ခဲ့ကြသည်။ ပထမနေ့တိုက်ပွဲများတွင် ၎င်းတို့၏တပ်ဖွဲ့ဝင်လေးဦး သေဆုံးခဲ့ကြောင်း ယူအေအီးက ထုတ်ပြန်ခဲ့သည်။ သူပုန်များကလည်း ဇွန် ၁၃ ရက်တွင် ဟိုဒေးဒါကမ်းရိုးတန်းအလွန်ရှိ ဆော်ဒီညွန့်ပေါင်း၏ သင်္ဘောတစ်စင်းကို ဒုံးနှစ်စင်း ပစ်လွှတ်တိုက်ခိုက်ခဲ့ကြောင်း ထုတ်ပြန်ခဲ့သည်။ ကမ်းခြေတွင်မူ ထိုးစစ်ဆင်မှုသည် သူပုန်များ၏ ထိန်းချုပ်မှုအောက်ရှိ လေဆိပ်အပြင်ဘက်သို့ ရောက်ရှိခဲ့ကြောင်း သိရသည်။

ထိုးဖောက်တိုက်ခိုက်ခဲ့ပြီးနောက် ဟိုဒေးဒါလေဆိပ်နှင့်ကပ်လျက်ရှိ နေရာများနှင့် အယ်ဒူရိုင်ဟီမီခရိုင်ရှိ မဟာဗျူဟာကျသောနေရာများကို ညွန့်ပေါင်းတပ်ဖွဲ့များက သိမ်းယူနိုင်ခဲ့ကြောင်း ဆော်ဒီအစိုးရသတင်း အေဂျင်စီ SPA က ဇွန် ၁၄ ရက်တွင် ဖော်ပြခဲ့သည်။ ယီမင်သည် အငတ်ဘေး ကြုံရနိုင်ခြေရှိနေစဉ် နိုင်ငံထဲသို့ သွင်းကုန်အားလုံး၏ ရာခိုင်နှုန်း ၇၀ သည် ဟိုဒေးဒါဆိပ်ကမ်းမှတစ်ဆင့် ဝင်ရောက်နေခြင်းဖြစ်သည်။ ဟိုဒေးဒါဆိပ်ကမ်းအလွန် ရေပြင်တွင် ဆော်ဒီနှင့် ယူအေအီး အကူအညီပေးရေး သင်္ဘောသုံးစင်းတို့က စောင့်ဆိုင်းနေကြောင်း ညွန့်ပေါင်းပြောခွင့်ရပုဂ္ဂိုလ် တာကီအယ်မာလီကီက ပြောကြားခဲ့သည်။ ယခုစစ်ဆင်ရေး၏ ရည်မှန်းချက်မှာ ဟိုဒေးဒါဆိပ်ကမ်းနှင့် လေဆိပ်ကို သိမ်းယူရန်သာဖြစ်ပြီး မြို့ထဲသို့ဝင်ရောက်မည် မဟုတ်ကြောင်း ၎င်းက ပြောကြားခဲ့သည်။

အဖွဲ့မျိုးစုံမှ ယူအေအီး၊ ဆူဒန်နှင့် ယီမင်တပ်ဖွဲ့ဝင်များ ပါဝင်သည့် မြေပြင်တပ်ဖွဲ့ဝင် ၂၁၀၀၀ ပါဝင်သော ညွန့်ပေါင်းသည် ဟိုဒေးဒါတောင်ပိုင်း ကမ်းရိုးတန်းအစွန်း၌ မိုင်းရှင်းလင်းရေးကို ဆောင်ရွက်ခဲ့ပြီး ကျေးလက်ဒေသများတွင် ဟူသီသူပုန်များအား ပိုက်စိပ်တိုက် ရှာဖွေခဲ့ကြသည်။

ဆွန်နီအင်အားကြီး ဆော်ဒီနှင့် ရှီအိုက် အင်အားကြီးအီရန်တို့သည် ဆီးရီးယားနှင့် အီရတ်တို့အပါအဝင် နိုင်ငံအများအပြား၌ ကိုယ်စားလှယ်စစ်ပွဲများ ဆင်နွှဲနေကြသည်။ ရှီအိုက်ဟူသီသူပုန်များက ၎င်းတို့သည် အီရန်၏နယ်ရုပ်မဟုတ်ကြောင်း ငြင်းဆန်ခဲ့ကြပြီး လူထုတော်လှန်ရေးဖြင့် အာဏာရရှိခဲ့ခြင်းဖြစ်ကြောင်း ပြောကြားခဲ့သည်။

Ref: AFP

Most Recent