နျူကလီးယားဖျက်သိမ်းမှုအား အလျင်အမြန် လုပ်ဆောင်ရမည်ဟု ကင်ဂျုံအွန်က နားလည်ကြောင်း ပွန်ပီယို ပြောကြား

နျူကလီးယားဖျက်သိမ်းမှုအား အလျင်အမြန် လုပ်ဆောင်ရမည်ဟု ကင်ဂျုံအွန်က နားလည်ကြောင်း ပွန်ပီယို ပြောကြား
Published 15 June 2018

ဇွန် ၁၄ ရက်က ဆိုးလ်ရှိ နိုင်ငံခြားရေးဝန်ကြီးဌာနတွင် အမေရိကန်နိုင်ငံခြားရေးဝန်ကြီး ပွန်ပီယို (ယာ) က စကားပြောနေစဉ် (Photo: AFP)

မြောက်ကိုရီးယားခေါင်းဆောင် ကင်ဂျုံအွန်သည် နျူကလီးယား ဖျက်သိမ်းရေးအား အလျင်အမြန် လုပ်ဆောင်ရမည်ကို နားလည်ထားကြောင်း အမေရိကန်နိုင်ငံခြားရေးဝန်ကြီး မိုက်ပွန်ပီယိုက ဇွန် ၁၄ ရက်တွင် ပြောကြားခဲ့ပြီး နျူကလီးယား ဖျက်သိမ်းရေး လုပ်ငန်းစဉ် ပြီးဆုံးသည့် အချိန်အထိ ပြုံယမ်းအား ချမှတ်ထားသော ပိတ်ဆို့အရေးယူမှုများကို ဖြေလျှော့ပေးသွားမည် မဟုတ်ကြောင်း ၎င်းက သတိပေးခဲ့သည်။

အမေရိကန်သမ္မတ ဒေါ်နယ်ထရန့်နှင့် မြောက်ကိုရီးယားခေါင်းဆောင်ကင်ဂျုံအွန်တို့အကြား ဇွန် ၁၂ ရက်၌ စင်ကာပူ သမိုင်းဝင် ထိပ်သီးအပြီးတွင် မြောက်ကိုရီးယားသည် အပြည့်အဝနှင့် စိစစ်အတည်ပြုနိုင်ပြီး နောက်ကြောင်းပြန်လှည့်၍ မရနိုင်သော နျူကလီးယားဖျက်သိမ်းမှုကို လုပ်ဆောင်ရမည်ဟု တောင်းဆိုချက်အား ဝါရှင်တန်က ဆက်လက် ကိုင်စွဲထားမည်ဖြစ်ကြောင်းလည်း ပွန်ပီယိုက ပြောကြားခဲ့သည်။

ထိုထိပ်သီးအပြီး ထရန့်၏ မှတ်ချက်များကြောင့် တိုကျိုနှင့် ဆိုးလ်တို့အား စိုးရိမ်မှုများ ထွက်ပေါ်စေခဲ့ပြီးနောက် ပွန်ပီယိုသည် ဆိုးလ်တွင် တောင်ကိုရီးယား၊ ဂျပန်နိုင်ငံခြားရေးဝန်ကြီးများနှင့် တွေ့ဆုံပြီး ထိပ်သီးအကြောင်းကို အသေးစိတ် ရှင်းလင်းခဲ့သည်။ သို့သော် မြောက်ကိုရီးယားနျူက လီးယားဖျက်သိမ်းရေးလုပ်ငန်းစဉ် အောင်မြင်ရန်အတွက် မဟာမိတ်နိုင်ငံများအကြား မည်သို့လုပ်ဆောင်ရမည်ကို သဘောထားကွဲလွဲမှု မရှိခဲ့ကြောင်း ၎င်းတို့၏ပူးတွဲသတင်းစာ ရှင်းလင်းပွဲတွင် ပွန်ပီယိုက ပြောကြားခဲ့သည်။ အတိတ်ကာလတွင် မြောက်ကိုရီးယားက နျူကလီးယား လုံးဝဖျက်သိမ်းမှု မလုပ်ဆောင်သေးမီ အမေရိကန်အစိုးရများက စီးပွားရေးနှင့် ဘဏ္ဍာရေးဆိုင်ရာ အကူအညီများ ထောက်ပံ့ပေးခဲ့ကြောင်း၊ သို့သော် ယခုအချိန်တွင် ယင်းကဲ့သို့ ဖြစ်လာမည် မဟုတ်ဟု သမ္မတထရန့်က ရှင်းရှင်းလင်းလင်း ပြောကြားထားကြောင်း ပွန်ပီယိုက ပြောကြားခဲ့သည်။

ကင်နှင့် ထိပ်သီးအပြီးတွင် ထရန့်က ကုန်ကျစရိတ်မြင့်မားသော အမေရိကန်-တောင်ကိုရီးယား ပူးတွဲစစ်ရေးလေ့ကျင့်မှုများအား ရပ်ဆိုင်းသွားမည်ဟု ကြေညာခဲ့ရာ ဆိုးလ်အပြင် ပင်တဂွန်ကိုပါ အံ့အားသင့်စေခဲ့သည်။ ပူးတွဲသတင်းစာရှင်းလင်းပွဲတွင် တောင်ကိုရီးယား နိုင်ငံခြားရေးဝန်ကြီး ကန်ယွန်းဝါက ထိုစစ်ရေးလေ့ကျင့်မှုကိစ္စသည် စစ်ဘက်အာဏာပိုင်များက ဆွေးနွေးရမည့် ကိစ္စသာဖြစ်ကြောင်း ပြောကြားခဲ့သည်။ ထိုကိစ္စတွင် ဂျပန်က တိုက်ရိုက်မပါဝင်သော်လည်း ပူးတွဲစစ်ရေးလေ့ကျင့်မှုသည် အရှေ့မြောက်အာရှ လုံခြုံရေးအတွက် အရေးပါသောကဏ္ဍမှ ပါဝင်ကြောင်း ဂျပန်နိုင်ငံခြားရေးဝန်ကြီး တာရိုကိုနိုက ပြောကြားခဲ့သည်။

စစ်ရေးလေ့ကျင့်မှုများ ရပ်ဆိုင်းမှုသည် ကောင်းမွန်သော ယုံကြည်မှုတွင် အပြုသဘော ဆွေးနွေးမှုများကို မူတည်နေကြောင်း ပွန်ပီယိုက ပြောကြားခဲ့သည်။ ၂၀၂၀ ပြည့်နှစ် မတိုင်မီ မြောက်ကိုရီးယားက လက်နက်များ ဖျက်သိမ်းမှုကို ပြုလုပ်မည်ဟု မျှော်လင့်ကြောင်းလည်း ပွန်ပီယိုက အစောပိုင်းတွင် ပြောကြားခဲ့သည်။

Ref: AFP

Most Read

Most Recent