ဇွန် ၁၂ ရက်က စင်ကာပူတွင် သမိုင်းဝင်ထိပ်သီး၌ အမေရိကန်သမ္မတ ထရန့်နှင့် မြောက်ကိုရီးယားခေါင်းဆောင် ကင်ဂျုံအွန်တို့ လက်ဆွဲနှုတ်ဆက်နေကြစဉ် (Photo - AFP)

မြောက်ကိုရီးယားခေါင်းဆောင် ကင်ဂျုံအွန်နှင့် ပြုလုပ်ခဲ့သော သမိုင်းဝင်ထိပ်သီးက  ပြုံယမ်း၏ နျူကလီးယားခြိမ်းခြောက်မှုအား အဆုံးသတ်ခဲ့ပြီး ကမ္ဘာကြီးသည် ဘေးကင်းစွာ အိပ်စက်နိုင်ပြီဖြစ်ကြောင်း အမေရိကန် သမ္မတဒေါ်နယ်ထရန့်က ဝါရှင်တန်သို့ပြန်ရောက်ခဲ့ပြီးနောက် ဇွန် ၁၃ ရက်တွင် ပြောကြားခဲ့သည်။ “မြောက်ကိုရီးယားဆီကနေ နျူကလီးယားခြိမ်းခြောက်မှုတွေ မရှိတော့ဘူး” ဟု ထရန့်က Twitter ၌ ရေးသားခဲ့သည်။

လူတိုင်းသည် ၎င်းတာဝန်စတင်ထမ်း ဆောင်ခဲ့သည့်နေ့ကထက် ပိုမိုဘေးကင်းသွားပြီဟု ယူဆနိုင်ကြောင်း၊ လူတိုင်းသည် ယနေ့ည ကောင်းမွန်စွာ အိပ်စက်နိုင်ပြီဖြစ်ကြောင်းလည်း ထရန့်က ပြောကြားခဲ့သည်။

မြောက်ကိုရီးယားအာဏာရ အလုပ်သမားပါတီအာဘော်နေ့စဉ်သတင်းစာ ရိုဒေါင်ရှင်မွန်ကလည်း သတင်းစာပုံမှန်စာမျက်နှာ ခြောက်မျက်နှာအနက် လေးမျက်နှာတွင် ထိုထိပ်သီး၏ မှတ်တမ်းဓာတ်ပုံ ၃၃ ပုံထက်မနည်းကို ဖော်ပြခဲ့သည်။

ဇွန် ၁၂ ရက်တွင် စင်ကာပူ၌ သမိုင်းဝင် ထိပ်သီးကျင်းပစဉ်အတွင်း  ခေါင်းဆောင်နှစ်ဦးသည် အပြန်အလှန်ဖိတ်ကြားခဲ့ကြပြီး နှစ်ဦးစလုံးက ဖိတ်ကြားမှုများကို လက်ခံခဲ့ကြောင်း မြောက်ကိုရီးယားအစိုးရမီဒီယာ (KCNA) က ဇွန် ၁၃ ရက်တွင် ဖော်ပြခဲ့သည်။ ထိုထိပ်သီးသည် နျူကလီးယားလက်နက်များ ပိုင်ဆိုင်ထားသော စစ်အေးကာလ ရန်ဘက်နှစ်နိုင်ငံအကြား ဆက်ဆံရေး ဆိုးရွားနေမှုကို လုံးလုံးလျားလျား ပြောင်းလဲမှု၏ နိဒါန်းဟု KCNA က ဂုဏ်ပြုဖော်ပြခဲ့သည်။

ဇွန် ၁၂ ရက်က ပြုလုပ်ခဲ့သော မကြုံစဖူး တွေ့ဆုံမှုတွင် ကမ္ဘာ့သြဇာအကြီးဆုံး ဒီမိုကရေစီနိုင်ငံခေါင်းဆောင်က အာဏာရှင်မျိုးဆက်၏ တတိယမျိုးဆက်ခေါင်းဆောင်အား ၎င်းတို့၏ နိုင်ငံအလံများရှေ့တွင် လက်ဆွဲ နှုတ်ဆက်ခဲ့ခြင်းဖြစ်သည်။ ကင်က မြောက်ကိုရီးယားသည် ကိုရီးယားကျွန်းဆွယ်တွင် အလုံးစုံ နျူကလီးယား ဖျက်သိမ်းရေးကို ဆောင်ရွက်သွားမည်ဟု ကတိပြုခဲ့သည်။ သို့သော် ယင်းကတိပြုမှုသည် မြောက်ကိုရီးယားက ၎င်းတို့၏ နျူကလီးယားလက်နက်များအား စိစစ်အတည်ပြုနိုင်ပြီး နောက်ကြောင်းပြန်လှည့်၍မရသော နည်းလမ်းဖြင့် စွန့်လွှတ်ရမည်ဟု အမေရိကန်၏ ကာလရှည်ကြာ တောင်းဆိုမှုကိုမူ မပြည့်မီခဲ့ပေ။

အထီးကျန်နိုင်ငံဖြစ်ပြီး ပိတ်ဆို့အရေး ယူမှုများစွာ ချမှတ်ခံထားရကာ နိုင်ငံတကာထံမှ တရားဝင်ဖြစ်မှုရရှိရန် ကာလကြာ ကြိုး ပမ်းနေသော မြောက်ကိုရီးယားအတွက် ထိုထိပ်သီးသည် အကျိုးအမြတ် အလွန်အမင်း ရရှိခဲ့သည်။ မြောက်ကိုရီးယားအား ကျူးကျော် ရန် အစမ်းလေ့ကျင့်မှုဟု ရှုတ်ချပြီး ထိုလေ့ကျင့်မှုများအား ရပ်ဆိုင်းရန် ပြုံယမ်းက ကာလရှည်ကြာတောင်းဆိုမှုဖြစ်သော တောင်ကိုရီးယားနှင့် အမေရိကန်ကြား ပူးတွဲစစ်ရေးလေ့ ကျင့်မှုများကို အမေရိကန်က ရပ်ဆိုင်းသွားမည်ဟု ထရန့်က ထိပ်သီးအပြီး သတင်းစာရှင်း လင်းပွဲတွင် ကြေညာခဲ့သည်။

နျူကလီးယားကိစ္စများသည် ဆွေးနွေးစရာ မဟုတ်တော့သည့် အချိန်ကာလရောက်လျှင် မြောက်ကိုရီးယားအား ပိတ်ဆို့အရေးယူမှုများ ရုပ်သိမ်းပေးရန် ရည်ရွယ်ချက်ရှိကြောင်း ထရန့်က ပြောကြားခဲ့သည်။ မြောက်ကိုရီးယားက ကိုရီးယားကျွန်းဆွယ်တွင် နျူကလီးယား ဖျက်သိမ်းမှုသည် နှစ်ဖက်စလုံးက ရန်ပြုမှုမှ ထိန်းချုပ်ခြင်း၊ အပြန်အလှန်နားလည်မှုမရှိတော့ခြင်းတို့အပေါ် မူတည်နေမည်ဖြစ်ကြောင်း KCNA က ဖော်ပြခဲ့သည်။

အတိတ်ကာလတွင် မြောက်ကိုရီးယားနှင့်ရရှိခဲ့သော သဘောတူညီချက်အများအပြားသည် နောက်ပိုင်းတွင် ပျက်ပြားသွားခဲ့ခြင်းကြောင့် ယခုထိပ်သီးမတိုင်မီ ကျွမ်းကျင်ပညာရှင်များက ထိုဆွေးနွေးပွဲသည် မည်မည်ရရ တိုးတက်မှုထက် သတင်းခေါင်းစီးများတွင် ပါဝင်မှုကိုသာ အာရုံစိုက်မည့် အန္တရာယ်ကို စိုးရိမ်ခဲ့ကြသည်။ ထို့ပြင် ထိုထိပ်သီးသည် ကင်ဂျုံအွန်အား တရားဝင်အဖြစ် အသိအမှတ်ပြုလိုက်ခြင်းဖြစ်ပြီး လူ့အခွင့်အရေး ချိုးဖောက်မှုများအား ကျယ်ကျယ်ပြန့်ပြန့် ကျူးလွန်ခဲ့သည့် အစိုးရကို ဂုဏ်ပြုလိုက်ခြင်းဖြစ်ကြောင်းလည်း ဝေဖန်သူများက ထောက်ပြခဲ့သည်။

Ref ;AFP