ဖေဖော်ဝါရီ ၁၂ ရက်က ယီမင်တောင်ပိုင်းရှိ ဟိုဒေးဒါတွင် ဆော်ဒီကျောထောက်နောက်ခံပြု ယီမင်တောင်ပိုင်းခုခံရေးတပ်ဖွဲ့ဝင်များအား တွေ့ရစဉ် (Ref ; AFP)

အာရပ်နိုင်ငံများ၏ မဟာမိတ်အဖွဲ့နှင့် အီရန်ကျောထောက်နောက်ခံပြု ဟူသီသူပုန်တို့အကြား သုံးနှစ်ကြာစစ်ပွဲတွင် အကြီးမားဆုံးတိုက်ပွဲအဖြစ် ဆော်ဒီဦးဆောင်သော ညွန့်ပေါင်းအဖွဲ့က ယီမင်၏ အဓိကဆိပ်ကမ်းဖြစ်သော ဟိုဒေးဒါကို ဇွန် ၁၃ ရက်တွင် စတင်တိုက်ခိုက်ခဲ့သည်။

မြို့တော် ဆာနာနှင့် ယီမင်၏ လူဦးရေထူထပ်သည့် အဓိကဒေသများကို ထိန်းချုပ်ထားသည့် ဟူသီသူပုန်များကို  ၎င်းတို့ထိန်းချုပ်ထားသည့် ဆိပ်ကမ်းမှထွက်ခွာရန် ယူအေအီးက နောက်ဆုံးသတ်မှတ်ထားသည့် ရက်ကျော်လွန်ခဲ့ပြီးနောက် Golden Victory စစ်ဆင်ရေးကို စတင်ခဲ့ခြင်း ဖြစ်သည်။

ညွန့်ပေါင်းတပ်ဖွဲ့သည် ဆိပ်ကမ်းစီမံခန့်ခွဲမှုကို ထိန်းချုပ်ရန် စီစဉ်နေသော်လည်း ဟူသီသူပုန်များသည် ၎င်းတို့ ဆုတ်ခွာချိန်တွင် အခြေခံအဆောက်အအုံကို ဖျက်ဆီးပြီး မြေပြင်နှင့် ပင်လယ်ထဲတွင် မိုင်းများချထား နိုင်သည်ဟု ယူအေအီးက သတိပေးခဲ့သည်။

ပင်လယ်နီတွင်ရှိသည့် ဟိုဒေးဒါဆိပ်ကမ်းသည် ယီမင်နိုင်ငံသားများအတွက် အသက်သွေးကြောတစ်ခုဖြစ်ပြီး ဆင်းရဲသည့် ယီမင်နိုင်ငံအတွက် အခြေခံလိုအပ်သည့် ကုန်ပစ္စည်း ၈၀ ရာခိုင်နှုန်းကို စီမံခန့်ခွဲသည့် ဆိပ်ကမ်းဖြစ်သည်။ ယင်းဆိပ်ကမ်းကို တိုက်ခိုက်ခြင်းသည် ကမ္ဘာ့အဆိုးရွားဆုံးလူသား ချင်းစာနာထောက်ထားမှုဆိုင်ရာ အကျပ်အတည်းဖြစ်နိုင်ခြေရှိသည်ဟု ကုလသမဂ္ဂက သတိပေးခဲ့သည်။ ယီမင်တွင် လူဦးရေ ၈ ဒသမ ၄ သန်းခန့်သည် အငတ်ဘေးကြုံရလုနီး အခြေအနေနှင့် ကြုံတွေ့နေရသည်ဟု ကမ္ဘာ့ကျန်းမာရေးအဖွဲ့WHO က ထုတ်ပြန်ခဲ့သည်။

မဟာဗျူဟာကျသည့် ပင်လယ်နီရှိ သင်္ဘောများသွားလာသည့် လမ်းကြောင်းတစ်လျှောက်တွင် ရေနံတင်သင်္ဘောများကို တိုက်ခိုက်မည်ဟု ခြိမ်းခြောက်ခဲ့သည့် ဟူသီသူပုန်ခေါင်းဆောင် မိုဟာမက်အလီအယ်ဟူသီက  ဆိပ်ကမ်းကိုမတိုက်ခိုက်ရန် အနောက်ကျော ထောက်နောက်ခံပြုမဟာ မိတ်အဖွဲ့ကို သတိပေးခဲ့သည်။ ၎င်း၏ တပ်ဖွဲ့ဝင်များသည် ညွန့် ပေါင်းအဖွဲ့၏ သင်္ဘောတစ်စင်းကို ချိန်ရွယ်ထားသည်ဟု Twitter တွင် ရေးသားခဲ့သည်။

ဟူသီသူပုန်တို့ ဦးစီးသည့် Al Masirah ရုပ်သံက သင်္ဘောကို ဒုံးကျည်နှစ်စင်းဖြင့် တိုက်ခိုက်ခဲ့သည်ဟု ထုတ်ပြန်ခဲ့သော်လည်း ညွန့်ပေါင်းအဖွဲ့က အတည်ပြုချက် မထုတ်ပြန်ခဲ့ပေ။

ဟိုဒေးဒါဆိပ်ကမ်းကို တိုက်ခိုက်မှုအား ရှောင်လွှဲနိုင်မည့် သဘောတူညီချက်ရရှိရန် ကုလသမဂ္ဂက  ကြိုးစားနေသည်။ ယင်းဆိပ်ကမ်းကို တိုက်ခိုက်မှုသည်  ကာလဝမ်းရောဂါ အပါအဝင် ရောဂါများနှင့် ရင်ဆိုင်နေရသည့်  သန်းနှင့်ချီသော ယီမင်နိုင်ငံသားများထံ စားနပ်ရိက္ခာ၊ လောင်စာနှင့် ဆေးဝါးများ ရောက်ရှိရန် နောက်ထပ် ကြန့်ကြာမှုဖြစ်စေမည်ကို ကုလသမဂ္ဂက စိုးရိမ်ခဲ့သည်။ ယင်းဒေသတွင် လူ ၆၀၀,၀၀၀ ခန့်ရှိကြောင်း၊ စစ်ပွဲကြောင့် လူ ၂၅၀,၀၀၀ သေဆုံးနိုင်သည့်အပြင် သန်းနှင့်ချီသောသူများအတွက် အကူအညီနှင့် အခြားထောက်ပံ့မှုများ ရပ်ဆိုင်းနိုင်ကြောင်း ကုလသမဂ္ဂက ခန့်မှန်းခဲ့သည်။ ယင်းတိုက် ခိုက်မှုသည်  ၂၀၁၅ ခုနှစ်တွင် စစ်ပွဲ၌  ဆော်ဒီကျောထောက်နောက်ခံပြု ညွန့်ပေါင်းအဖွဲ့ ပါဝင်ခဲ့ပြီးနောက် ပထမဆုံးအကြိမ် တိုက်ခိုက်မှုဖြစ်သည်။

Ref ;Reuters