ဇွန် ၁၂ ရက်က စင်ကာပူတွင် သမိုင်းဝင်ထိပ်သီး၌ အမေရိကန်သမ္မတ ထရန့်နှင့် မြောက်ကိုရီးယားခေါင်းဆောင် ကင်ဂျုံအွန်တို့ လက်ဆွဲနှုတ်ဆက်နေကြစဉ် (Photo - AFP)

ဇွန် ၁၂ ရက်တွင် စင်ကာပူ၌ အမေရိကန်သမ္မတ ဒေါ်နယ်ထရန့်နှင့် မြောက်ကိုရီးယားခေါင်းဆောင် ကင်ဂျုံအွန်တို့က သမိုင်းဝင် ထိပ်သီးကျင်းပစဉ်အတွင်း ကင်ကထရန့်အား မြောက်ကိုရီးယားသို့ လာရောက်ရန် ဖိတ်ကြားခဲ့ပြီး ထရန့်က လက်ခံခဲ့ကြောင်း မြောက်ကိုရီးယားအစိုးရမီဒီယာ (KCNA) က ဇွန် ၁၃ ရက်တွင် ဖော်ပြခဲ့သည်။

ခေါင်းဆောင်နှစ်ဦးသည် ၎င်းတို့၏ နိုင်ငံများသို့ လာရောက်လည်ပတ်ရန် အပြန်အလှန်ဖိတ်ကြားခဲ့ကြပြီး နှစ်ဦးစလုံးက ဖိတ်ကြားမှုများကို လက်ခံခဲ့ကြောင်း KCNA က ဖော်ပြခဲ့သည်။ ထိုထိပ်သီးသည် နျူကလီးယား လက်နက်များ ပိုင်ဆိုင်ထားသော စစ်အေးကာလ ရန်ဘက် နှစ်နိုင်ငံအကြား ဆက်ဆံရေး ဆိုးရွားနေမှုကို လုံးလုံးလျားလျား ပြောင်းလဲမှု၏ နိဒါန်းဖြစ်ကြောင်းလည်း KCNA က ဂုဏ်ပြုဖော်ပြခဲ့သည်။

ဇွန် ၁၂ ရက်က ပြုလုပ်ခဲ့သော မကြုံစဖူး တွေ့ဆုံမှုတွင် ကမ္ဘာ့သြဇာအကြီးဆုံး ဒီမိုကရေစီ နိုင်ငံခေါင်းဆောင်က အာဏာရှင်မျိုးဆက်၏ တတိယမျိုးဆက်ခေါင်းဆောင်အား ၎င်းတို့၏ နိုင်ငံ အလံများရှေ့တွင် ယှဉ်တွဲရပ်လျက် လက်ဆွဲနှုတ်ဆက်ခဲ့ကြခြင်း ဖြစ်သည်။ ကင်က မြောက်ကိုရီးယားသည် ကိုရီးယား ကျွန်းဆွယ်တွင် အလုံးစုံ နျူကလီးယား ဖျက်သိမ်းရေးကို ဆောင်ရွက်သွားရန် ကတိပြုခဲ့သည်။ သို့သော် ယင်းကတိပြုမှုသည် မြောက်ကိုရီးယားက ၎င်းတို့၏ နျူကလီးယားလက်နက်များအား စိစစ်အတည်ပြုနိုင်ပြီး နောက်ကြောင်းပြန်လှည့်၍မရသော နည်းလမ်းဖြင့် စွန့်လွှတ်ရမည်ဟု အမေရိကန်၏ ကာလရှည်ကြာ တောင်းဆိုမှုကိုမူ မပြည့်မီခဲ့ပေ။

အထီးကျန်နိုင်ငံဖြစ်ပြီး ပိတ်ဆို့အရေး ယူမှုများစွာ ချမှတ်ခံထားရကာ နိုင်ငံတကာထံမှ တရားဝင်ဖြစ်မှုကို ကာလရှည်ကြာ ကြိုးပမ်းနေသော မြောက်ကိုရီးယားအတွက် ထိုထိပ်သီးသည် အကျိုးအမြတ် အလွန်အမင်း ရရှိခဲ့သည်။ မြောက်ကိုရီးယားအား ကျူးကျော်ရန် အစမ်းလေ့ကျင့်မှုဟု ရှုတ်ချပြီး ထိုလေ့ကျင့်မှုများအား ရပ်ဆိုင်းရန် ပြုံယမ်းက ကာလရှည်ကြာတောင်းဆိုမှုဖြစ်သော တောင်ကိုရီးယားနှင့် အမေရိကန်ကြား ပူးတွဲစစ်ရေးလေ့ကျင့်မှုများကို အမေရိကန်က ရပ်ဆိုင်းသွားမည်ဟု ထရန့်က ထိပ်သီးအပြီး သတင်းစာရှင်းလင်းပွဲတွင် ကြေညာခဲ့သည်။

စစ်အေးခေတ်ရန်ဘက်နှစ်နိုင်ငံ၏ တာဝန်ထမ်းဆောင်ဆဲ ခေါင်းဆောင်နှစ်ဦး၏ ထိပ်သီးသည် ကမ္ဘာကြီးအား နျူကလီးယား ကပ်ဆိုးဘေးကြုံရမှုမှ ရှောင်လွှဲနိုင်စေခဲ့ကြောင်း ထရန့်က Twitter ၌ ရေးသားခဲ့သည်။ “ဒုံးပစ်လွှတ်မှုတွေ မရှိတော့ဘူး။ နျူကလီးယားစမ်းသပ်မှု ဒါမှမဟုတ် သုတေသနပြုမှုတွေ မရှိတော့ဘူး။ ဖမ်းဆီးခံထားရတဲ့သူတွေလည်း အိမ်ကို ပြန်ခွင့်ရပြီးတော့ သူတို့ရဲ့မိသားစုတွေနဲ့ ပြန်လည် ပေါင်းစည်းခွင့်ရတော့မယ်။ ဥက္ကဋ္ဌကင်ကို ကျေးဇူးတင်ပါတယ်။ ကျုပ်တို့ တွေ့ဆုံခဲ့တဲ့နေ့ကတော့ သမိုင်းဝင်ခဲ့ပါပြီ” ဟု ထရန့်က ရေးသားခဲ့သည်။

နျူကလီးယားကိစ္စများသည် ဆွေးနွေး စရာ မဟုတ်တော့သည့် အချိန်ကာလရောက် လျှင် မြောက်ကိုရီးယားအား ပိတ်ဆို့အရေးယူ မှုများ ရုပ်သိမ်းပေးရန် ရည်ရွယ်ချက်ရှိကြောင်း ထရန့်က ပြောကြားခဲ့သည်။ မြောက်ကိုရီးယား ကမူ ကိုရီးယားကျွန်းဆွယ်တွင် နျူကလီးယား ဖျက်သိမ်းမှုသည် နှစ်ဖက်စလုံးက ရန်ပြုမှုမှ ထိန်းချုပ်ခြင်း၊ အပြန်အလှန်နားလည်မှုမရှိ တော့ခြင်းတို့အပေါ် မူတည်နေမည်ဖြစ် ကြောင်း KCNAက ဖော်ပြခဲ့သည်။

အတိတ်ကာလတွင် မြောက်ကိုရီးယားနှင့် ရရှိခဲ့သော သဘောတူညီချက်အများအပြားသည် နောက်ပိုင်းတွင် ပျက်ပြားသွားခဲ့ခြင်းကြောင့် ယခုထိပ်သီးမတိုင်မီ ကျွမ်းကျင်ပညာရှင်များက ထိုဆွေးနွေးပွဲသည် မည်မည် ရရတိုးတက်မှုထက် သတင်းခေါင်းစီးများတွင် ပါဝင်မှုကိုသာ အာရုံစိုက်မည့် အန္တရာယ်ကို စိုးရိမ်ခဲ့ကြသည်။ ထို့ပြင် ထိုထိပ်သီးသည် ကင်ဂျုံအွန်အား တရားဝင်အဖြစ် အသိအမှတ်ပြုလိုက်ခြင်းဖြစ်ပြီး လူ့အခွင့်အရေး ချိုးဖောက်မှုများအား ကျယ်ကျယ်ပြန့်ပြန့် ကျူးလွန်ခဲ့သည့် အစိုးရကို ဂုဏ်ပြုလိုက်ခြင်းဖြစ်ကြောင်းလည်း ဝေဖန်သူများက ထောက်ပြခဲ့သည်။

Ref ; AFP