သမ္မတ ထရန့်နှင့် ဝန်ကြီးချုပ် မာကယ်တို့ စကားပြောနေစဉ် ဂျီ-၇ ခေါင်းဆောင်များက ဝန်းရံရပ်နေကြသည်ကို ဂျာမန်အစိုးရ ဓာတ်ပုံဆရာက ရိုက်ကူးထားသည့် ဓာတ်ပုံ (Photo: AFP)

သံမဏိနှင့် အလူမီနီယမ် သွင်းကုန်များအား အမေရိကန်၏ စည်းကြပ်ခွန်ပြဋ္ဌာန်းမှုများကို ကနေဒါ ကဲ့သို့ပင် ဥရောပသမဂ္ဂကလည်း တန်ပြန်တုံ့ပြန်သွားမည်ဟု ဂျာမနီဝန်ကြီးချုပ် အင်ဂျလာမာကယ်က ဇွန် ၁၀ ရက်တွင် ပြောကြားခဲ့ပြီး ဂျီ-၇ ထိပ်သီး တရားဝင် ထုတ်ပြန်ချက်မှ အမေရိကန်သမ္မတ ဒေါ်နယ်ထရန့်၏ ရုတ်တရက် နုတ်ထွက်မှုအတွက် စိတ်မကောင်းဖြစ်မိကြောင်းလည်း ၎င်းက ပြောကြားခဲ့သည်။

ဝါရှင်တန်နှင့် ၎င်း၏ ထိပ်တန်းမဟာမိတ်များအကြား ကုန်သွယ်ရေး အငြင်းပွားမှုအတွက် ယိုင်နဲ့နေသော သဘောတူညီချက် ဖြစ်ဖွယ်ရှိဟု ယူဆရသည့် ဂျီ-၇ အဖွဲ့၏ ပူးတွဲ တရားဝင်ကြေညာချက်မှ နုတ်ထွက်ခဲ့ကြောင်း ကနေဒါတွင် ကျင်းပခဲ့သော ဂျီ-၇ ထိပ်သီးမှ စောစီးစွာ ထွက်ခွာခဲ့ပြီးနောက် ထရန့်က Twitter တွင် ကြေညာခဲ့သည်။

ထိုထိပ်သီးသည် ဥရောပနှင့် အမေရိကန့်အကြား အတ္တလန္တိတ် ဖြတ်ကျော် မိတ်ဖက်ပြုမှု၏ အဆုံးသတ်ဟု မရည်ညွှန်းကြောင်း မာကယ်က သဘောထားကွဲလွဲခဲ့သော ဂျီ-၇ ထိပ်သီးအပြီးတွင် ARD ရုပ်သံအင်တာဗျူး၌ ပြောကြားခဲ့သည်။ သို့သော် ဥရောပသည် ၎င်းတို့၏ မဟာမိတ် အမေရိကန်ကို မှီခိုနေ၍ မရတော့ကြောင်း၊ ကိုယ့်ကြမ္မာကို ကိုယ်တိုင် ဖန်တီးသင့်ကြောင်း မာကယ်က အကြိမ်ကြိမ် ပြောကြားခဲ့သည်။

ကမ္ဘာ့ကုန်သွယ်ရေးအဖွဲ့ (WTO) ၏ စည်းမျဉ်းများနှင့်အညီ တုံ့ပြန်ခဲ့သော ကနေဒါအတိုင်း ဥရောပသမဂ္ဂကလည်း အမေရိကန်၏ သံမဏိနှင့် အလူမီနီယမ် သွင်းကုန် စည်းကြပ်ခွန်များ ပြဋ္ဌာန်းမှုများကို တန်ပြန်တုံ့ပြန်ရန် ကြိုတင် ပြင်ဆင်နေကြောင်း မာကယ်က ပြောကြားခဲ့သည်။

ဥရောပသမဂ္ဂ၏ ထိုတန်ပြန်တုံ့ပြန်မှုများအား ထရန့်က ကားတင်သွင်းမှုများအား စည်းကြပ်ခွန်များ ပြဋ္ဌာန်း၍ တန်ပြန်လာနိုင်မှုကို စိုးရိမ်မှုရှိသလားဟု မေးမြန်းခဲ့ရာ မာကယ်က ပထမဆုံးအနေဖြင့် ၎င်းတို့သည် ထိုကိစ္စအား ကြိုတင် ဟန့်တားနိုင်ခြင်းရှိ၊ မရှိ ကြိုးပမ်းသွားမည် ဖြစ်ကြောင်း၊ ယင်းနောက် ဥရောပသမဂ္ဂက အလားတူညီညွတ်မှုဖြင့် ထပ်မံ၍ ပြန်လည်တုံ့ပြန်သွားလိမ့်မည်ဟု ယုံကြည်ကြောင်း ဖြေကြားခဲ့သည်။

ဂျီ-၇ ခေါင်းဆောင်များသည် ၎င်းတို့အကြား ကုန်သွယ်ရေး ဆက်နွှယ်မှုများအား ပြန်လည်သုံးသပ်ရန်၊ နောက်ထပ် ကုန်သွယ်ရေး အတားအဆီးများမှ ရှောင်လွဲှနိုင်ရန်အတွက် ရှိပြီးသား အတားအဆီးများ၏ အတိုင်းအတာများအား ပြန်လည် ချင့်တွက်သွားရန် သဘောတူခဲ့ကြကြောင်း ဂျာမနီဝန်ကြီးချုပ်က ပြောကြားခဲ့သည်။ ဂျီ-၇ မဟာမိတ်များအကြား ကုန်သွယ်ရေးအတားအဆီး ကင်းလွတ်သောဇုန် တည်ထောင်မှုသည် အကောင်းဆုံးရလဒ် ဖြစ်ကြောင်း၊ သို့သော် ယင်းကဲ့သို့ လွတ်လပ်သော ကုန်သွယ်ရေးအဖွဲ့ ထူထောင်နိုင်ရေးအတွက် မည်သည့် ဆွေးနွေးပွဲတွင်မဆို ကုန်သွယ်ရေး၌ မည်သည့် အတားအဆီးမျှ မရှိမှုအပြင် အစိုးရတင်ဒါများအား လွတ်လပ်စွာ ယှဉ်ပြိုင်ခွင့်တို့သည် ပါဝင်ရမည်ဖြစ်ကြောင်း ဗဟို လက်ယာယိမ်း ဝါဒီခေါင်းဆောင် မာကယ်က ပြောကြားခဲ့သည်။

၂၀၁၄ ခုနှစ်တွင် ယူကရိန်း၏ ခရိုင်းမီးယားကျွန်းဆွယ်အား သိမ်းယူခဲ့မှုကြောင့် ယင်းအချိန်က ဂျီ-၈ အဖွဲ့မှ ထုတ်ပယ်ခံခဲ့ရသော ရုရှားသည် ဂျီ-၇ အဖွဲ့၏ ကဏ္ဍအချို့၌ ပြန်လည်ပါဝင်နိုင်ရန် မျှော်မှန်းနိုင်ကြောင်း၊ သို့ သော် ရုရှားသည် ပထမဦးစွာ ယူကရိန်းဆိုင်ရာ ငြိမ်းချမ်းရေးအစီအစဉ်ကို အကောင်အထည်ဖော်မှုတွင် တိုးတက်မှုရှိရန် လုပ်ဆောင်ရမည်ဖြစ်ကြောင်း မာကယ်က ပြောကြားခဲ့သည်။