အပြောကြမ်းသော ဒူတာတေး တောင်ကိုရီးယားတွင် အမျိုးသမီးတစ်ဦးကို နမ်းမှုကြောင့် ဝေဖန်ခံနေရ

အပြောကြမ်းသော ဒူတာတေး တောင်ကိုရီးယားတွင် အမျိုးသမီးတစ်ဦးကို နမ်းမှုကြောင့် ဝေဖန်ခံနေရ
Published 6 June 2018

PTV ရုပ်သံမှ ရိုက်ကူးထားမှုမှ ရယူထားသောဓာတ်ပုံတွင် ဇွန် ၃ ရက်က ဆိုးလ်၌ ပြည်ပရောက် ဖိလစ်ပိုင်အလုပ်သမားများနှင့် တွေ့ဆုံပွဲတွင် ဖိလစ်ပိုင်အမျိုးသမီးတစ်ဦးအား သမ္မတဒူတာတေးက နမ်းနေမှုကို တွေ့ရစဉ် (Photo - AP)

ဖိလစ်ပိုင်သမ္မတ ရိုဒရီဂိုဒူတာတေးသည် အပြောအဆိုကြမ်းမှုကြောင့် ထင်ရှားခဲ့ပြီး ယခုတစ်ကြိမ်တွင်မူ ထောင်ပေါင်းများစွာသော ထောက်ခံသူများရှေ့၌ စင်မြင့်ပေါ်တွင် အိမ်ထောင်သည် အမျိုးသမီးတစ်ဦး၏ နှုတ်ခမ်းအား နမ်းခဲ့မှုအတွက် ဝေဖန်ပြစ်တင်မှုများ ပွက်လောရိုက်ခဲ့သည်။

အပြောအဆိုကြမ်းမှုများနှင့် အခြားနောက်တီးနောက်တောက် အပြုအမူများကြောင့် ထင်ရှားသော ဒူတာတေးသည် ဇွန် ၃ ရက်က တောင်ကိုရီးယားတွင် ပြည်ပရောက် ဖိလစ်ပိုင်အလုပ်သမားများနှင့် တွေ့ဆုံသည့် အခမ်းအနား၌ ယင်းကဲ့သို့ နမ်းခဲ့မှုအတွက် ပြင်းပြင်းထန်ထန် ဝေဖန်ခံနေရခြင်း ဖြစ်သည်။ ဆိုးလ်တွင် ကျင်းပသော ယင်းအခမ်းအနားတွင် ဒူတာတေးက စာအုပ်တစ်အုပ်ကိုပေးရန် အဆိုပါ အမျိုးသမီးကို စင်ပေါ်သို့ ဖိတ်ခေါ်ပြီးနောက် ယင်းကဲ့သို့ နမ်းရန်တောင်းဆိုခဲ့သည်။

ယင်းလုပ်ရပ်သည် အပြောင်အပျက် တစ်ခုသာဖြစ်ကြောင်း ထိုအမျိုးသမီး၏ ခင်ပွန်းကို ရှင်းပြပေးနိုင်မလားဟု ဒူတာတေးက မေးမြန်းခဲ့သည်။ ထိုအမျိုးသမီးက ဒူတာတေး၏ မေးခွန်းအားလက်ခံကြောင်း ဖြေကြားချိန်တွင် ဒူတာတေးက သြဘာပေးနေကြသည့် ထောက်ခံသူများရှေ့၌ ထိုအမျိုးသမီးကို နမ်းခဲ့ခြင်းဖြစ်သည်။

နှစ်နာရီကြာမြင့်ခဲ့သော ထိုတွေ့ဆုံမှု အခမ်းအနားတွင် ဒူတာတေးက ကက်သလစ်ခရစ်ယာန်ဘုရားကျောင်းတွင် အကျင့်ပျက်ခြစားမှုနှင့် အလွဲသုံးစားပြုမှုတို့အကြောင်း ရေးသားသည့် စာအုပ်ကိုပေးရန် အမျိုးသမီးနှစ်ဦးအား လက်ညှိုးထိုး၍ စင်ပေါ်သို့ ဖိတ်ခေါ်ခဲ့သည်။ အမျိုးသမီးတစ်ဦးက အသက် ၇၃ နှစ်ရှိ ဒူတာတေးနှင့် ပါးချင်းအပ်လျက် နှုတ်ဆက်ခဲ့သည်။ ကျန်အမျိုး သမီကမူ လူကြီးအား လေးစားသမှုပြသည့်  အမူအရာအဖြစ် ၎င်း၏ နဖူးပေါ်တွင် သမ္မတလက်ကို တင်ခဲ့သည်။ သို့သော် ဒူတာတေးက ထိုအမျိုးသမီးအား အနားသို့ ကပ်လာရန်ခေါ်ပြီး ၎င်း၏နှုတ်ခမ်းကို ညွှန်ပြခဲ့သည်။

ပရိသတ်များထံမှ အော်ဟစ်သံများ ထွက်ပေါ်လာစဉ် ဒူတာတေးက ထိုအမျိုးသမီးအား အိမ်ထောင် ရှိ၊ မရှိ နှင့် ရှိပါက ထိုပွဲတွင် ရှိ၊ မရှိကို မေးမြန်းခဲ့သည်။ ယင်းနောက် ထိုနမ်းမှုသည် အပျော်သက်သက်သာဖြစ်ကြောင်း ၎င်း၏ခင်ပွန်းအား ရှင်းပြရန် ဒူတာတေးက ထိုအမျိုးသမီးကို မေးမြန်းခဲ့သည်။

ထိုအမျိုးသမီးသည် တောင်ကိုရီးယား အမျိုးသားတစ်ဦးနှင့် အိမ်ထောင်ကျထားပြီး သမီးနှစ်ဦးရှိကြောင်း၊ သမ္မတနှင့် မျက်နှာချင်းဆိုင်တွေ့ခဲ့ရသဖြင့် အလွန်အမင်း စိတ်လှုပ်ရှားခဲ့ကြောင်း၊ သမ္မတ၏ အနမ်းတွင် မလိုတမာစိတ်မရှိကြောင်း နောက်ပိုင်းတွင် ရုပ်သံအင်တာဗျူး၌ ကာကွယ်ဖြေကြားခဲ့သည်။

သမ္မတ ဒူတာတေးသည် အရာအားလုံးကို ၎င်းစိတ်ကြိုက်ပြုမူနိုင်သည်ဟု အခွင့်အရေးရှိကြောင်း ယူဆနေသည့် ဘုရင်တစ်ဦးကဲ့သို့ ပြုမူခဲ့ကြောင်း ဖိလစ်ပိုင်အထက် လွှတ်တော်အမတ် ရီဆာဟွန်တီဗာရို့စ်က ပြင်းပြင်းထန်ထန် ဝေဖန်ခဲ့သည်။ ထိုလုပ်ရပ်သည် နှစ်ဦးသဘောတူဖြစ်သည် ဆိုလျှင်ပင်  ယင်းကဲ့သို့ နမ်းရန်အတွက် အစပျိုးသူသည် သြဇာအာဏာပိုင်ဆိုင်ထားသည့် သမ္မတသာဖြစ်ကြောင်း ၎င်းက ပြောကြားခဲ့သည်။

ဒူတာတေး၏ ယင်းလုပ်ရပ်သည် ၎င်း၏ ယောကျ်ားမာန်ဝါဒနှင့် မိန်းမမုန်းတီးရေးဝါဒကို မီးမောင်းထိုးပြနေကြောင်း လက်ဝဲယိမ်းဝါဒီ Gabriela အမျိုးသမီးပါတီကလည်း ကန့်ကွက်ရှုတ်ချခဲ့သည်။

မူးယစ်ဆေးမှောင်ခိုကူးသူများဟု သံသယရှိသူ အများအပြားပါဝင်သည့် လူထောင်ပေါင်းများစွာ သေဆုံးခဲ့ရသော ၎င်း၏ တရားမဝင် မူးယစ်ဆေးဝါး တိုက်ဖျက်ရေး စစ်ပွဲအတွက် နိုင်ငံတကာ၏ ပြင်းပြင်းထန်ထန် ဝေဖန်ခံနေရသည့် ဒူတာတေးသည် ကွန်မြူနစ်ပြောက်ကျားသူပုန်များအား ပြင်းပြင်းထန်ထန် ဝေဖန်ပြောဆိုမှုအတွင်း ထိုအမျိုးသမီးသူပုန်များ၏ အင်္ဂါများကို ပစ်ခတ်ရန် ဖိလစ်ပိုင်စစ်သားများအား ညွှန်ကြားမှု အပါအဝင် ပြင်းထန်ဆိုးရွားသော မှတ်ချက်များအတွက်လည်း ပြင်းပြင်းထန်ထန် ရှုတ်ချခံနေရသည်။

Ref ; AFP

Most Read

Most Recent