မေ ၁၀ ရက်က ဆီးရီးယားနယ်စပ်အနီး ဂိုလန်ကုန်းမြင့်၌ အစ္စရေးတင့်ကားများအား တွေ့ရစဉ် (Photo - AFP)

ပဋိပက္ခများကြောင့် ပြီးခဲ့သည့်နှစ်က ပြည်တွင်းမှာပင် ရွှေ့ပြောင်းထွက်ပြေးခဲ့ရသူ ဦးရေသည် ၁၂ သန်းနီးပါးရှိလာပြီဟု နိုင်ငံတကာစောင့်ကြည့်ရေးအဖွဲ့များက မေ ၁၆ ရက်တွင် ထုတ်ပြန်ခဲ့သည်။ ယင်းပမာဏသည် ၁၀ နှစ်အတွင်း အမြင့်ဆုံးဖြစ်နေကြောင်း သိရသည်။

၂၀၁၇ ခုနှစ်က အိုးအိမ်တို့မှ စွန့်ခွာပြီး နိုင်ငံတွင်းမှာပင် နေရပ်ရွှေ့ပြောင်းခဲ့ရသူဦး ရေစုစုပေါင်းသည် ၁၁ ဒသမ ၈ သန်း ရှိနေသည်။ ထိုလူဦးရေသည် ၆ ဒသမ ၉ သန်း ရှိခဲ့သော ၂၀၁၆ ခုနှစ်ကထက် နှစ်ဆနီးပါးပိုမို များပြားနေခြင်းဖြစ်ကြောင်း နိုင်ငံတွင်း ရွှေ့ပြောင်းအခြေချမှု စောင့်ကြည့်ရေးစင်တာ (IDMC) နှင့် နော်ဝေဒုက္ခသည်ရေးရာကောင်စီ  (NRC) တို့၏ အစီရင်ခံစာအရ သိရသည်။

“ဒါဟာ ကျွန်တော်တို့ စာရင်းပြုစုခဲ့တဲ့ ၁၀ နှစ်ကြာကာလအတွင်းမှာ အမြင့်ဆုံးဦးရေ ဖြစ်ပါတယ်” ဟု IDMC အကြီးအကဲ အလက်ဇန္ဒားဘီလာခ်က ဂျီနီဗာတွင် သတင်းထောက်များကို ပြောကြားခဲ့သည်။

ယခု ရွှေ့ပြောင်းထွက်ပြေးရသူအသစ်များ ထပ်တိုးလာသဖြင့် ကမ္ဘာတစ်ဝန်း၌ ပြည်တွင်း ရွှေ့ပြောင်းထွက်ပြေးရသူဦးရေ စုစုပေါင်းသည် သန်း ၄၀ ပြည့်တော့မည်ဖြစ်သည်ဟု လေ့လာမှုအရ သိရသည်။ ယမန်နှစ်က ပြည်တွင်း ရွှေ့ပြောင်းထွက်ပြေးရသူဦးရေ စုစုပေါင်း၏ ၇၆ ရာခိုင်နှုန်းသည် ၁၀ နိုင်ငံ တည်းတွင်သာ ဖြစ်ပွားခဲ့ခြင်း ဖြစ်သည်။ ဆီးရီးယား၊ ဒီမိုကရက်တစ်ရီပတ် ဘလစ်ကွန်ဂိုနှင့် အီရတ်သုံးနိုင်ငံတည်းမှ ပြည်တွင်းရွှေ့ပြောင်း ထွက်ပြေးသူဦးရေသည် ကမ္ဘာတစ်ဝန်းလုံး အတိုင်းအတာ၏ ထက်ဝက်ကိုပင် ကျော်နေကြောင်း သိရသည်။

ဆီးရီးယားတွင်မူ ပြီးခဲ့သည့်နှစ်က ရွှေ့ပြောင်းထွက်ပြေးရသူဦးရေ ၂ ဒသမ ၉ သန်းရှိပြီး ၎င်းတို့ထဲမှ အများစုမှာ နှစ်ကြိမ် သို့မဟုတ် သုံးကြိမ်မြောက် ရွှေ့ပြောင်းကြရခြင်း ဖြစ်သည်။ ထို့ကြောင့် ဆီးရီးယားနိုင်ငံတွင်းမှာပင် ရွှေ့ပြောင်းထွက်ပြေးရသူ စုစုပေါင်းသည် ၆ ဒသမ ၈ သန်းဝန်းကျင်ရှိနေပြီ ဖြစ်သည်။

လွန်ခဲ့သည့်တစ်နှစ်ကျော်က စာရင်း၏ ထိပ်ဆုံးတွင် ရှိခဲ့သည့် ယီမင်မှာမူ ၂၀၁၇ ခု နှစ်တွင် ပြည်တွင်းရွှေ့ပြောင်းအခြေချသူ အများဆုံး ထိပ်ဆုံး ၁၀ နိုင်ငံ စာရင်းမှာပင် မပါတော့ပေ။ ယင်းသည် ယီမင်ပြည်တွင်း အခြေအနေဆိုးရွားနေမှုနှင့် အချက်အလက် မရရှိနိုင်မှုတို့ကြောင့် ယီမင်က စာရင်းတွင် ထိပ်တန်း၌ မပါဝင်ခဲ့ခြင်း ဖြစ်သည်။

ရေကြီးမှု၊ မုန်တိုင်းများ၊ ဆိုင်ကလုန်းများ အစရှိသော သဘာဝဘေးအန္တရာယ်တို့ကြောင့် ယမန်နှစ်က နိုင်ငံပေါင်း ၁၃၅ နိုင်ငံ၌ ရွှေ့ပြောင်းထွက်ပြေးရသူဦးရေမှာမူ ၁၈ ဒသမ ၈ သန်း ရှိနေသည်။ သဘာဝဘေးအန္တရာယ်နှင့် ပဋိပက္ခတို့ကြောင့် ထွက်ပြေးရသူ ဦးရေကို ပေါင်းလိုက်ပါက တစ်နေ့လျှင် ပျမ်းမျှခြင်းအားဖြင့် နေရပ်တို့မှထွက်ပြေးရသူဦး ရေသည် ၈၀၀၀၀ ကျော် ရှိနေသည်။

သဘာဝဘေးအန္တရာယ်ကြောင့် ရွှေ့ပြောင်းအခြေချရမှု အဆိုးဆုံးဖြစ်ပွားသည့် နိုင်ငံများမှာ တရုတ်၊ ဖိလစ်ပိုင်၊ ကျူးဘားနှင့် အမေရိကန်တို့ ဖြစ်သည်။

ယခင်နှစ်အတွင်းက အတ္တလန္တိတ်ဟာ ရီကိန်းကြီးသုံးခုဖြစ်သည့် ဟာဗေး၊ အီမာနှင့် မာရီယာတို့လည်း ဖြစ်ပွားခဲ့သည်။ သဘာဝဘေးအန္တရာယ်ကြောင့် ထွက်ပြေးရသူများကိုပါ ထည့်တွက်ပါက ယမန်နှစ်က ပြည်တွင်းမှာပင် ရွှေ့ပြောင်းထွက်ပြေးရသူ ဦးရေသည် ၃၁ သန်းနီးပါးဖြစ်သွားမည် ဖြစ်သည်။

Ref ; AFP