ဧပြီ ၉ ရက်က ရှန်ဟိုင်းရှိ ယန်ရှန်းရေနက်ဆိပ်ကမ်းအား ရိုက်ကူးထားသော ဓာတ်ပုံ (Photo: ADB)

ဖွံ့ဖြိုးဆဲအာရှတွင် ယခုနှစ်စီးပွားရေးတိုးတက်မှုသည် ခြောက်ရာခိုင်နှုန်းအထိ ရှိနိုင်ကြောင်း ကမ္ဘာလုံးဆိုင်ရာ ပို့ကုန်ဝယ်လိုအား မြင့်တက်မှုကြောင့် အာရှစီးပွားရေး အလားအလာ ကောင်းမွန်နေကြောင်း အာရှဖွံ့ဖြိုးရေးဘဏ် ADB က ဧပြီ ၁၁ ရက်တွင် ခန့်မှန်းခဲ့သည်။ သို့သော်လည်း အမေရိကန်၊ တရုတ် ကုန်သွယ်ရေးစစ်ပွဲအလားအလာကြောင့် စွန့်စားမှုဆိုင်ရာ အန္တရာယ်များရှိနိုင်ကြောင်း ADB က သတိပေးခဲ့သည်။

ထို့ပြင် နည်းပညာဆိုင်ရာ အဆင့်မြင့်တက်လာမှုကြောင့် ဒေသတွင်း၌ အလုပ်အကိုင်များအပေါ် သက်ရောက်မှုရှိလာနိုင်ပြီး ဆိုးရွားနေပြီဖြစ်သည့် မညီမျှမှုကို ပို၍ဆိုးစေနိုင်ကြောင်း ADB က သတိပေးခဲ့သည်။

ADB က အာရှစီးပွားရေးသည် ၅ ဒသမ ၇ ရာ ခိုင်နှုန်းတိုးတက်မည်ဟု ခန့်မှန်း ထားမှုကို ပြင်ဆင်ခဲ့ပြီး ယခုနှစ်တွင် ခြောက်ရာခိုင်နှုန်း တိုးတက်မည်ဟု ပြင်ဆင်ခန့်မှန်းခဲ့သည်။ ထို့ပြင် ၂၀၁၉ ခုနှစ်တွင် အာရှစီးပွားရေးသည် ၅ ဒသမ ၉ ရာခိုင်နှုန်း တိုးတက်မည်ဟု ADB က ခန့်မှန်းထားသည်။

ကမ္ဘာ့အကြီးဆုံး စီးပွားရေးများဖြစ်ပြီး ကမ္ဘာ့စီးပွားရေးတိုးတက်မှုအတွက် အဓိကတွန်းအားများဖြစ်သော အမေရိကန်နှင့် တရုတ်တို့အကြား ကုန်သွယ်ရေးတင်းမာမှုများ မြင့်တက်နေချိန်တွင် ADB ၏ ခန့်မှန်းချက် ထွက်ပေါ်ခဲ့ခြင်းဖြစ်သည်။

အမေရိကန်သမ္မတ ဒေါ်နယ်ထရန့်က သူ၏ ပထမမူဝါဒအတွက် သံမဏိနှင့် အလူမီနီယံသွင်းကုန်များကို စည်းကြပ်ခွန်များ ကောက်ခံရန် မတ်လတွင် ပြဋ္ဌာန်းခဲ့ပြီးနောက် တရုတ်နှင့် အမေရိကန်တို့သည် ဒေါ်လာဘီလျံနှင့်ချီသော ကုန်ပစ္စည်းများအား စည်း ကြပ်ခွန်ပြဋ္ဌာန်းမှုများအား အပြန်အလှန် ဆောင်ရွက်နေသည်။

ထိုအလားအလာများသည် စိုးရိမ်စရာ ဖြစ်ပြီး ကိုယ်ကျိုးစီးပွားကာကွယ်မှုများနှင့် လက်တုံ့ပြန်ဆောင်ရွက်မှုများက မကြာသေးမီတွင် ကုန်သွယ်ရေးဖွံ့ဖြိုးမှု ပြန်လည်တိုးတက်လာခြင်းကို ထိခိုက်စေနိုင်ကြောင်း ADB ၏ စီးပွားရေးပညာရှင် ယာဆူယူကီဆာဝါဒါ က ပြောကြားခဲ့သည်။

အမေရိကန်က ယခုအချိန်အထိ အကောင်အထည်ဖော်နေသော အရေးယူ ဆောင်ရွက်မှုများသည် ဖွံ့ဖြိုးဆဲအာရှနိုင်ငံများမှ ကုန်သွယ်မှုများကို သိသိသာသာ မထိခိုက်သေးသော်လည်း ထပ်မံအရေးယူဆောင်ရွက်မှုများနှင့် လက်တုံ့ပြန်မှုများကြောင့် ထိ ခိုက်မှုရှိလာနိုင်ကြောင်း ADB ၏ အစီရင်ခံစာက သတိပေးခဲ့သည်။

တရုတ်စီးပွားရေးသည် ယခုနှစ်တွင် ၆ ဒသမ ၆ ရာခိုင်နှုန်း တိုးတက်ပြီး တိုးတက်မှု နှေးကွေးသွားနိုင်ကြောင်း ဘဏ္ဍာရေးတည်ငြိမ်မှုကို ရှေးရှုနေသောကြောင့် ၂၀၁၉ ခုနှစ် တွင် ၆ ဒသမ ၄ ရာခိုင်နှုန်းသို့ ထပ်မံနှေးကွေးသွားနိုင်ကြောင်း ADB က ခန့်မှန်းခဲ့သည်။

ကြွေးမြီအလွန်အမင်းများပြားနေပြီး လေထုညစ်ညမ်းမှု ဆိုးရွားလွန်းခြင်းတို့ကို ရင်ဆိုင်ခဲ့ရသော်လည်း တရုတ်စီးပွားရေးသည် ယမန်နှစ်က ၆ ဒသမ ၉ ရာခိုင်နှုန်း တိုးတက်ခဲ့သည်။ အာရှစီးပွားရေးအင်အားကြီး တစ်နိုင်ငံဖြစ်သော အိန္ဒိယသည် ဘဏ်လုပ် ငန်းစနစ်ပြုပြင်ပြောင်းလဲမှုနှင့် အခွန်စနစ်သစ်ကြောင့် ထုတ်လုပ်မှုတိုးတက်လာခြင်းတို့မှ အကျိုးကျေးဇူးခံစားခဲ့ရပြီး ၇ ဒသမ ၃ ရာခိုင်နှုန်း စီးပွားရေးတိုးတက်မည်ဟု ADB က ဆို သည်။ အရှေ့တောင်အာရှနိုင်ငံအများစုသည် ယမန်နှစ်က ၅ ဒသမ ၂ ရာခိုင်နှုန်းတိုးတက်မှုကို ဆက်လက်ထိန်းသိမ်းနိုင်ဖွယ်ရှိကြောင်း၊ ထိုထက်ကျော်လွန်မှုလည်း ရှိနိုင်ကြောင်း   ADB က ပြောကြားခဲ့သည်။