အာဆီယံခေါင်းဆောင်များက တောင်တရုတ်ပင်လယ်တွင် တည်ငြိမ်ရေးတောင်းဆိုခဲ့ပြီး သြစတြေးလျနှင့် ကာကွယ်ရေးပူးပေါင်းဆောင်ရွက်မှုမြှင့်တင်ရန် သဘောတူခဲ့

အာဆီယံခေါင်းဆောင်များက တောင်တရုတ်ပင်လယ်တွင် တည်ငြိမ်ရေးတောင်းဆိုခဲ့ပြီး သြစတြေးလျနှင့် ကာကွယ်ရေးပူးပေါင်းဆောင်ရွက်မှုမြှင့်တင်ရန် သဘောတူခဲ့
Published 20 March 2018

အာဆီယံ-သြစတြေးလျ ထိပ်သီးတွင် စင်ကာပူဝန်ကြီးချုပ် လီရှန်လွန်း(ဝဲ)နှင့် သြစတြေးလျဝန်ကြီးချုပ် မယ်ကွန်တန်ဘူး(ယာ)တို့ကိုတွေ့ရစဉ်

သြစတြေးလျနှင့် အာဆီယံခေါင်းဆောင်များသည် ကာကွယ်ရေးပူးပေါင်းဆောင်ရွက်မှုမြှင့်တင်ရန် သဘောတူညီခဲ့ကြပြီး အငြင်းပွား တောင်တရုတ်ပင်လယ်တွင် စစ်အသွင်မဆောင်ရန် အရေးကြီးကြောင်း ဆစ်ဒနီထိပ်သီးတွင် သဘောတူညီခဲ့ကြသည်။ ဘင်္ဂါလီ မွတ်စလင်အကျပ်အတည်းက အဓိကဖြစ်နေခဲ့သော ဆစ်ဒနီထိပ်သီးတွင် အရှေ့တောင်အာရှနိုင်ငံများမှ ခေါင်းဆောင်များသည် အစွန်းရောက်မှုများ၏ ခြိမ်းခြောက်မှုနှင့် ဘာသာရေးအစွန်းရောက်မှု အန္တရာယ်ပိုကြီးလာခြင်းတို့ကို အနီးကပ်ပူးပေါင်း ဆောင်ရွက်ရန် သဘောတူညီခဲ့ကြသည်။ သို့သော်လည်း နောက်ဆုံးထုတ်ပြန်သောကြေညာချက်တွင် အာဆီယံခေါင်းဆောင်များသည် အဖွဲ့ဝင်မြန်မာနိုင်ငံ၏ ဘင်္ဂါလီမွတ်စလင် အကျပ်အတည်းကို ကိုင်တွယ်မှုအပေါ် ကန့်ကွက်ရှုတ်ချရန် မဆောင်ရွက်ခဲ့ကြပေ။

'အာဆီယံပြည်သူများ၏ လူ့အခွင့်အရေးကို ကာကွယ်ရန်' ဖြေရှင်းမည်ဟု ယင်း ကြေညာချက်က ဖော်ပြခဲ့သည်။ သြစတြေးလျဝန်ကြီးချုပ် မယ်ကွန်တန်ဘူးက သုံးရက်ကြာ ထိပ်သီး၏ ပိတ်ပွဲ သတင်းစာရှင်းလင်းပွဲတွင် “ကျွန်တော်တို့ ရခိုင်ပြည်နယ်ရဲ့အခြေအနေကို ဒီနေ့တော်တော်ကြာကြာ ဆွေးနွေးခဲ့ပါတယ်။ ဒေါ်အောင်ဆန်းစုကြည်က အဲဒီ ပြဿနာကို ကျယ်ကျယ်ပြန့်ပြန့် ဆွေးနွေးခဲ့ပါတယ်။ ဒီပြဿနာက အလွန်ရှုပ်ထွေးတဲ့ ပြဿနာတစ်ခုပါ။ အားလုံးက အကျပ်အတည်းကြောင့် ဖြစ်လာတဲ့ ဒီဒုက္ခဆင်းရဲတွေကို အဆုံးသတ်ဖို့ ကြိုးပမ်းနေပါတယ်” ဟု ပြောကြားခဲ့သည်။

စင်ကာပူဝန်ကြီးချုပ် လီရှန်လွန်းက ထိုအကျပ်အတည်းသည် အာဆီယံနိုင်ငံအားလုံးအတွက် စိုးရိမ်မှုဖြစ်ကြောင်း၊ သို့သော်လည်း အာဆီယံသည် ရလဒ်တစ်ခုအတွက် ဖိအားပေးရန် ဝင်ရောက် မစွက်ဖက်နိုင်ကြောင်း ပြောကြားခဲ့သည်။

တရုတ်သည် စစ်လက်နက်ကိရိယာများ ထားရှိနိုင်ရန် ကျွန်းတုများ ဆက်လက် တည်ဆောက်နေသောကြောင့် တောင်တရုတ်ပင်လယ်တွင် တင်းမာမှုများသည်လည်း ဒေသတွင်းခေါင်းဆောင်များအတွက် စိုးရိမ်မှုကြီး ဖြစ်နေဆဲဖြစ်သည်။

တရုတ်နှင့်ဆက်ဆံရေး ပိုမိုနီးကပ်သည့် သမ္မတရိုဒရီဂိုဒူတာတေးလက်ထက်တွင် တောင်တရုတ်ပင်လယ် အငြင်းပွားမှု၌ ဖိလစ်ပိုင်က နောက်ဆုတ်နေခဲ့သောကြောင့် ဗီယက်နမ်သည် ရေပိုင်နက်အငြင်းပွားမှုတွင် အပြင်းထန်ဆုံး ဝေဖန်သည့်နိုင်ငံအဖြစ် ဆက်လက်ရှိနေခဲ့သည်။ ထိုင်ဝမ်၊ မလေးရှား၊ ဘရူနိုင်းတို့ကလည်း တောင်တရုတ်ပင်လယ်တွင် တရုတ်နှင့် ပိုင်ဆိုင်မှု အငြင်းပွားနေကြသည်။ တောင်တရုတ်ပင်လယ်တွင် ထိရောက်သော ကျင့်ထုံးတစ်ရပ် စောစီးစွာ ဖော်ထုတ်နိုင်ရန် လိုလားခဲ့ကြောင်း အာဆီယံခေါင်းဆောင် များက ထည့်သွင်းပြောကြားခဲ့သည်။ စည်းကမ်းကို အခြေပြုထားသည့် အစီအစဉ်တစ်ရပ်နှင့် ဒေသတွင်း၌ အပြည်ပြည်ဆိုင်ရာ ဥပဒေ ကျင့်သုံးမှုတို့ကို အာဆီယံနှင့် သြစတြေးလျတို့က ဆက်လက်ကိုင်စွဲထားမည်ဖြစ်ကြောင်း တန်ဘူးက အလေးထားပြောကြားခဲ့သည်။ တရုတ်က အင်အားထုတ်ပြလာနေသောကြောင့် အာဆီယံနှင့် သြစတြေးလျတို့သည် ကာကွယ်ရေး ပူးပေါင်းဆောင်ရွက်မှု၌ အရှိန်မြှင့်တင်ရေးကိုလည်း ကတိပြုခဲ့ကြသည်။

 

Most Read

Most Recent