မတ် ၁၅ ရက်က မော်စကိုတွင် လူငယ်ဖိုရမ်တစ်ခု၌ သမ္မတပူတင်က စကားပြောနေစဉ် (Photo- AFP)

ရုရှားသမ္မတ ဗလာဒီမာပူတင်က ၎င်းအနိုင်ရရှိရန် သေချာနေသည့် မတ် ၁၈ ရက် ရွေးကောက်ပွဲတွင် မဲထည့်ကြရန် ရုရှားပြည်သူများကို တိုက်တွန်းခဲ့ပြီး ထိုမဲပေးမှုသည် နိုင်ငံ၏ အနာဂတ်ကို ပုံဖော်ပေးလိမ့်မည်ဟု ပြောကြားသွားခဲ့သည်။

ရုရှားနိုင်ငံသား တစ်ဦးချင်းစီ၏ ဆန္ဒသည်နိုင်ငံရှေ့ဆက်သွားရမည့် လမ်းကြောင်းကို ဆုံးဖြတ်ပေးလိမ့်မည်ဖြစ်ကြောင်း ပူတင်က မတ် ၁၆ ရက်က ရုပ်သံမှ ထုတ်လွှင့်သည့် မိန့်ခွန်းအတွင်း ပြောကြားခဲ့ခြင်း ဖြစ်သည်။

လူထုထောက်ခံမှု ရာခိုင်နှုန်း ၈၀ကျော် ရရှိထားသော ရုရှားခေါင်းဆောင် ပူတင်သည် လာမည့်ရွေးကောက်ပွဲတွင် ပြိုင်ဘက်ခုနစ်ဦးကို ဖြတ်ကျော်ကာ နောက်ထပ်သမ္မတ သက်တမ်းခြောက်နှစ်ကို လွယ်ကူစွာပင် ထမ်းဆောင်ခွင့်ရရှိသွားလိမ့်မည် ဖြစ်သည်။ သို့သော် ရုရှားအစိုးရသည် ယခုရွေးကောက်ပွဲအား လူထု၏ စိတ်ဝင်စားမှုနည်းပါးမည်ကို စိုးရိမ်နေပြီး ပူတင်၏ အောင်ပွဲမှာ အထင်ကြီးစရာ ဖြစ်လာစေရန် လာရောက်မဲပေးသူဦးရေကို မြင့်တက်ရေးအတွက် ကြိုးပမ်းနေခြင်း ဖြစ်သည်။

အားလုံးချစ်မြတ်နိုးကြမည့် ကြီးမြတ်သော ရုရှားဖြစ်လာစေရေး အနာဂတ်ကို ရွေးချယ်ရန် အခွင့်အရေးကို အသုံးချကြရန် ပူတင်က ပြည်သူများကို တိုက်တွန်းခဲ့သည်။ မဲမပေးခြင်းဆိုသည်မှာ အဆုံးအဖြတ်ပေးသည့် ထိုရွေးချယ်မှုမှာ  သင်တို့၏ အကြံဉာဏ် မပါဘဲ လုပ်ဆောင်လိုက်ခြင်းဖြစ်သည်ဟုလည်း ပူတင်က သတိပေးခဲ့သည်။

မဲဆွယ်စည်းရုံးရေး၏ နောက်ဆုံးနေ့ဖြစ်သော မတ် ၁၆ ရက်က ပူတင်သည် ၎င်း၏ မွေးရပ်စိန့်ပီတာစဘတ်တွင်ရှိသည် ဆေးဘက်ဆိုင်ရာ စင်တာတစ်ခုသို့ သွားရောက်ခဲ့ပြီး နိုင်ငံ၏ကျန်းမာရေးစောင့် ရှောက်မှုစနစ်ကို အဆင့်မြှင့်တင်ပေးမည်ဖြစ်ကြောင်း ကတိပြုခဲ့သည်။ ပူတင်သည် မဲဆွယ်စည်းရုံးရေးကာလအတွင်း နိုင်ငံအနှံ့သို့ သွားရောက်ခဲ့ပြီး လုပ်ခလစာများတိုးမြှင့်ရေး၊ ယိုင်နဲ့နေသော ကျန်းမာရေးစောင့်ရှောက်မှုနှင့် ပညာရေးစနစ်ထဲသို့ ရန်ပုံငွေများ ပိုမိုပုံအောပေးရေးနှင့် ယိုယွင်းနေသော အခြေခံအဆောက်အအုံများကို အဆင့်မြှင့်တင်ပေးရေးတို့အတွက် ကတိများပေးခဲ့သည်။

ထို့ပြင် ပူတင်က ရုရှားအပေါ်ချမှတ်ထားသော အနောက်နိုင်ငံများ၏ ပိတ်ဆို့မှုများသည် ရုရှားကို အထီးကျန်ဖြစ်ကာ အားနည်းစေရန် အမေရိကန်နှင့် မဟာမိတ်များ၏ ကြိုးပမ်းမှုများ၏ သက်သေဖြစ်ကြောင်းလည်း ထောက်ပြသွားခဲ့သည်။

ရုရှားသမ္မတရွေးကောက်ပွဲသည် ၂၀၁၄ ခုနှစ်က ခရိုင်းမီးယားဒေသကို ယူကရိန်းထံမှ သိမ်းပိုက်ခဲ့မှု၏ နှစ်ပတ်လည်အချိန်တွင် ကျင်းပခဲ့ခြင်းဖြစ်သည်။ ထိုဖြစ်စဉ်သည် ရုရှားပြည်တွင်း၌မူ ပူတင်၏ လူကြိုက်များမှုကို ထိုးတက်သွားစေခဲ့သည်။ ခရိုင်းမီးယားကို သိမ်းပိုက်မှုကြောင့် အနောက်နိုင်ငံများက ပိတ်ဆို့အရေးယူမှုများသည် ရုရှား၏နှစ်နှစ် ဆက်တိုက်စီးပွားရေးကျဆင်းမှု၏ အကြောင်းရင်း တစ်စိတ်တစ်ပိုင်း ဖြစ်လာခဲ့သည်။ သို့သော် လူထုသဘောထား စစ်တမ်းများအရ ရုရှားပြည်သူအများစုသည် ခရိုင်းမီးယားကို သိမ်းပိုက်မှုအား အကြီးမားဆုံးအောင်မြင်မှုကြီးအဖြစ် ဆက်လက်ရှုမြင်လိုနေကြသည်ဟု သိရသည်။

ယူကရိန်းနိုင်ငံထဲရှိ ရုရှားနိုင်ငံသားများကို ရွေးကောက်ပွဲအတွက် သံရုံးများသို့ သွားရောက်မဲပေးရန် ခွင့်ပြုမည်မဟုတ်ကြောင်း ယူကရိန်း ပြည်ထဲရေးဝန်ကြီး အာဆင်အဗာကို့ဗ်က မတ် ၁၆ ရက်တွင်ကြေညာ ခဲ့သည်။ ရုရှားရွေးကောက်ပွဲဆိုင်ရာ အရာရှိများက ထိုလုပ်ရပ်သည် နိုင်ငံတကာ ဥပဒေကို ချိုးဖောက်ခြင်းဖြစ်သည်ဟု ပြောခဲ့ကြသည်။

Ref; AFP